ခရစ္စတီယာနိုရော်နယ်ဒိုရဲ့ ပွဲပယ်ပြစ်ဒဏ်ကို ပေါ်တူဂီဘောလုံးအဖွဲ့ချုပ် အယူခံဝင်လာမည်
====================
ပေါ်တူဂီဘောလုံးအဖွဲ့ချုပ်ဟာ အသင်းခေါင်းဆောင်ခရစ္စတီယာနိုရော်နယ်ဒိုရဲ့ ၃ ပွဲပယ်ပြစ်ဒဏ်အား လျှော့ချနိုင်ရေးအတွက် ဖီဖာထံ အယူခံဝင်လာပါမယ်။
အသက် ၄၀ နှစ်ရှိ ခရစ္စတီယာနိုရော်နယ်ဒိုဟာ အိုင်ယာလန်အား ၂-၀ ဂိုးဖြင့် ရှုံးနိမ့်တဲ့ပွဲစဉ်တွင် အနီကတ်ပြသခြင်းခံရပြီးနောက် ၃ ပွဲပယ်ပြစ်ဒဏ်ချမှတ်ခြင်းခံထားရကာ လာမယ့် ၂၀၂၆ ကမ္ဘာ့ဖလားအဖွင့်ပွဲ ၂ ပွဲကိုပါ လွဲချော်မယ့်အခြေအနေနှင့် ကြုံနေရပါတယ်။
သူဟာ အိုင်ယာလန်နောက်ခံလူဒါရာအိုရှီးယားကို တံတောင်ဖြင့် တွက်ခဲ့မှုအတွက် အဝါကတ်ပြသခြင်းခံခဲ့ပြီး ဒိုင်လူကြီးက ကွင်းဘေး မော်နီတာတွင် စစ်ဆေးပြီးနောက် အနီကတ်တိုးမြှင့်ပြသခဲ့တာလည်း ဖြစ်ပါတယ်။
ခရစ္စတီယာနိုရော်နယ်ဒိုဟာ ၃ ပွဲပယ်ပြစ်ဒဏ်အား ယနေ့ည အာမေးနီးယားနှင့် ကမ္ဘာ့ဖလားခြေစစ်ပွဲ နောက်ဆုံးပွဲတွင် စတင် ကျခံရပါမယ်။
ပေါ်တူဂီဟာ အာမေးနီးယားနှင့်ပွဲတွင် အနိုင်ရရှိပါက အုပ်စု(F) မှ တိုက်ရိုက်ခြေစစ်ပွဲအောင်မြင်လာပါမယ်။
ဒါပေမယ့် ခရစ္စတီယာနိုရော်နယ်ဒိုဟာ ကျန် ၂ ပွဲပယ်ပြစ်ဒဏ်အား လာမယ့် ၂၀၂၆ ကမ္ဘာ့ဖလားအဖွင့်ပွဲ ၂ ပွဲအား လွဲလာပါမယ်။
တကယ်လို့များ ပေါ်တူဂီသာ တိုက်ရိုက်ခြေစစ်ပွဲ မအောင်မြင်ဘဲ ပလေးအော့ဖ်ထံမှ ကစားရမည်ဆိုပါက ရော်နယ်ဒိုမှာ ကမ္ဘာ့ဖလားတွင် ပြစ်ဒဏ်ကျခံလာရတော့မှာ မဟုတ်ပါဘူး။
တဖက်တွင် ပေါ်တူဂီဘောလုံးအဖွဲ့ချုပ်ဟာ ခရစ္စတီယာနိုရော်နယ်ဒိုအား ၁ ပွဲပြစ်ဒဏ်သာ ချမှတ်ရေး ဖီဖာထံ အယူခံဝင်ရန် စီစဉ်နေပါတယ်။
ပေါ်တူဂီဘောလုံးအဖွဲ့ချုပ်ဟာ အချက် ၃ ချက်ဖြင့် ခရစ္စတီယာနိုရော်နယ်ဒိုအား ပွဲပယ်ပြစ်ဒဏ်လျှော့ချရေး ကြိုးပမ်းလာမှာ ဖြစ်ပါတယ်။
ပေါ်တူဂီဘောလုံးအဖွဲ့ချုပ်က တင်ပြလာမယ့် အချက် ၃ ချက်တွင် ပထမအချက်က ပွဲမတိုင်မီ သတင်းစာရှင်းလင်းပွဲတွင် အိုင်ယာလန်နည်းပြဟိုင်မာဟေးလ်ဂရမ်ဆင်က ရော်နယ်ဒိုမှာ ဒိုင်ရဲ့ ဆုံးဖြတ်ချက်ကို လွှမ်းမိုးတယ်ဆိုပြီး ဒိုင်လူကြီးအား ဖိအားပေးမှု၊ ဒုတိယအချက်မှာ အိုရှီးယားနှင့် ရော်နယ်ဒိုတို့အကြား အနီကတ်ဖြစ်စဉ် မတိုင်မီကတည်းက အပြန်အလှန် အားသုံးလုပ်ဆောင်မှု၊ တတိယအချက်မှာ ခရစ္စတီယာနိုရော်နယ်ဒိုမှာ နိုင်ငံတကာပွဲစဉ်များတွင် ယခင်က တစ်ကြိမ်မျှ အနီကတ်ပြသခြင်းမခံရဘဲ စည်းကမ်းသေဝပ်စွာ ကစားနိုင်မှုတို့ ဖြစ်ပါတယ်။
ရော်နယ်ဒိုဟာ အနီကတ်ပြသခြင်းခံရပြီး အာမေးနီးယားပွဲအား လွဲချော်နေမှုနှင့်အတူ ပေါ်တူဂီအသင်းလေ့ကျင့်ရေးစခန်းမှ ထွက်ခွာကာ ဆော်ဒီသို့ ပြန်သွားပြီ ဖြစ်ပါတယ်။
