ဒဏ်ရာကို စစ်ဆေးမှု ခံယူရမယ့် ရီးရဲလ်မက်ဒရစ်နှင့် စပိန်နောက်ခံလူဒိန်းဟွိုက်ဆန်
==================
စပိန်နှင့် ရီးရဲလ်မက်ဒရစ်ဗဟိုနောက်ခံလူဒိန်းဟွိုက်ဆန်ဟာ ပေါင်ခြံသက်တောင့်သက်သာ ဖြစ်မနေမှုကြောင့် စပိန်အသင်းမှ နုတ်ထွက်လာရပြီးနောက် ဒဏ်ရာကို စစ်ဆေးမှု ပြုလုပ်လာရတော့မှာ ဖြစ်ပါတယ်။
ဒိန်းဟွိုက်ဆန်ဟာ မနေ့ညတုန်းက ဂျော်ဂျီယာကို ၄-၀ ဂိုးဖြင့် အနိုင်ရတဲ့ပွဲကို လွဲချော်ခဲ့သလို အင်္ဂါနေ့ည တူရကီနှင့် ကမ္ဘာ့ဖလားနောက်ဆုံးခြေစစ်ပွဲကိုလည်း လွဲချော်လာမယ့် အခြေအနေမှာ ရှိနေပါတယ်။
စပိန်ဟာ မနေ့ညတုန်းက ဂျော်ဂျီယာကို အနိုင်ရရှိပြီးနောက် ကမ္ဘာ့ဖလားခြေစစ်ပွဲ တိုက်ရိုက်အောင်မြင်ခဲ့ပြီလည်း ဖြစ်ပါတယ်။
ဒါပေမယ့် ဟွိုက်ဆန်ဟာ သောကြာနေ့တုန်းက လေ့ကျင့်ခန်းအစီအစဉ်တွင် ပေါင်ခြံ သက်တောင့်သက်သာ ဖြစ်မနေမှုနှင့်အတူ ဒဏ်ရာအခြေအနေအား အတိအကျ သိနိုင်စေရန်အတွက် ဆေးစစ်ဆေးမှု ပြုလုပ်လာရမှာလည်း ဖြစ်ပါတယ်။
တကယ်လို့များ ဟွိုက်ဆန်မှာ ပေါင်ခြံဒဏ်ရာ ရရှိနေခြင်း မရှိဘဲ ပြန်လည် သက်သာလာမည်ဆိုပါက တူရကီနှင့် နောက်ဆုံး ကမ္ဘာ့ဖလားခြေစစ်ပွဲတွင် ပါဝင်လာမှာလည်း ဖြစ်ပါတယ်။
ဟွိုက်ဆန်ဟာ နွေရာသီတွင် ဘုန်းမောက်မှ ပြောင်းလာပြီးနောက် ရီးရဲလ်မက်ဒရစ်တွင် အဓိက ကစားသမားအဖြစ် ခြေစွမ်းပြလာသူ ဖြစ်ပါတယ်။
ရီးရဲလ်မက်ဒရစ်ဟာ လာမယ့်အပတ်အကုန်တွင် အဆင့် ၁၁ နေရာမှ အယ်ချီနှင့် ရင်ဆိုင်ကစားရပါမယ်။
လက်ရှိအချိန်တွင် ရီးရဲလ်မက်ဒရစ်ဟာ ဒါနီကာဗာဂျယ်၊ ရူဒီဂါတို့ ဒဏ်ရာရရှိနေတဲ့အပြင် ဘက်ပေးနှင့် ကာမာဗန်ဂါတို့မှာလည်း ပြင်သစ်အသင်းမှ ဒဏ်ရာကြောင့် နုတ်ထွက်ထားရမှုနှင့်အတူ ဒဏ်ရာပြဿနာအကြီးအကျယ်ကြုံတွေ့လာမှာ စိုးရိမ်နေရပါတယ်။
