မီလန်တွင် ဟာလန်းရဲ့ သွင်းဂိုးတွေနဲ့ အီတလီကို ဂိုးပြတ် အနိုင်ယူပြီး ကမ္ဘာ့ဖလားခြေစစ်ပွဲ အောင်မြင်လာတဲ့ နော်ဝေ
====================
အာလင်းဟာလန်းရဲ့ သွင်းဂိုးတွေနဲ့အတူ နော်ဝေဟာ မီလန်တွင် အီတလီကို ၄-၁ ဖြင့် အနိုင်ယူပြီး ၂၈ နှစ်အတွင်း ပထမဆုံးကမ္ဘာ့ဖလားခြေစစ်ပွဲ အောင်မြင်လာပါတယ်။
နော်ဝေဟာ ကြာသပတေးနေ့တုန်းက အက်စ်တိုးနီးယားကို အနိုင်ရပြီးတဲ့နောက် ကမ္ဘာ့ဖလားခြေစစ်ပွဲအောင်မြင်ရန် သေချာသလောက် ရှိနေခဲ့တာလည်း ဖြစ်ပါတယ်။ အီတလီဟာ ယခုပွဲတွင် နော်ဝေကို ၉ ဂိုးပြတ် အနိုင်ရရှိမှသာလျှင် ကမ္ဘာ့ဖလားတိုက်ရိုက်ခြေစစ်ပွဲ အောင်မြင်လာမှာလည်း ဖြစ်ပါတယ်။
အီတလီဟာ ပွဲအစ ၁၁ မိနစ်တွင် အက်စ်ပိုဆီတိုရဲ့ ဂိုးဖြင့် ပွဲကို စောစောစီးစီး ဦးဆောင်ထားနိုင်မှုနဲ့အတူ မျှော်လင်ချက်အလင်းရောင်သန်းခဲ့ပါတယ်။
ဒါပေမယ့် အီတလီဟာ ပထမပိုင်းမှာ ပွဲကို ထိန်းချုပ် ကစားနိုင်ခဲ့ပေမယ့်လည်း ဂိုးပေါက်ရှာမတွေ့ခဲ့ပါဘူး။
ဒုတိယပိုင်းမှာတော့ နော်ဝေနဲ့ဟာလန်းတို့ အရမ်းကောင်းလာခဲ့ပါတယ်။
၆၃ မိနစ်တွင် နူဆာက လှပတဲ့ ကန်ချက်ဖြင့် ချေပဂိုးသွင်းခဲ့ပြီး ၇၈ မိနစ်မှာ ဘော့ဘ်ရဲ့ ဖြတ်တင်ဘောကနေ ဟာလန်းက Volley ကန်ချက်ဖြင့် ဦးဆောင်ဂိုးသွင်းခဲ့ပါတယ်။ ယင်းနောက် တစ်မိနစ်အကြာမှာ ဟာလန်းကပဲ ဂိုးထပ်မံသွင်းယူခဲ့ပါတယ်။ နော်ဝေအတွက် အပိတ်ဂိုးကို နာကျင်အချိန်ပိုမှာ စထရန်းလာဆင်က သွင်းယူခဲ့ပါတယ်။
ဟာလန်းဟာ ကမ္ဘာ့ဖလားခြေစစ်ပွဲ ၈ ပွဲမှာ ၁၆ ဂိုးအထိ သွင်းယူထားနိုင်ခဲ့ပါတယ်။ ဒါ့အပြင် ဟာလန်းဟာ ဖခင်ဖြစ်သူ အယ်ဖီရဲ့ ခြေရာကို နင်းလာနိုင်တော့မှာလည်း ဖြစ်ပါတယ်။ ဟာလန်းရဲ့ဖခင် အယ်ဖီဟာ နော်ဝေရဲ့ နောက်ဆုံး ကမ္ဘာ့ဖလား ၁၉၉၈ ကမ္ဘာ့ဖလားမှာ ပါဝင်ကစားခဲ့ပါတယ်။
တဖက်မှာ အီတလီကတော့ ကမ္ဘာ့ဖလားခြေစစ်ပွဲအောင်မြင်ရေး ပလေးအော့ဖ်မှ တဆင့် ကြိုးပမ်းရတော့မှာ ဖြစ်ပါတယ်။
အီတလီဟာ ၂၀၁၈ ကမ္ဘာ့ဖလားတုန်းက ဆွီဒင်ကို နှစ်ကျော့ပေါင်းရလဒ် ၁-၀ ဖြင့် ရှုံးနိမ့်ကာ ခြေစစ်ပွဲ ကျခဲ့သလို ၂၀၂၂ ကမ္ဘာ့ဖလားတုန်းကလည်း မြေက်မက်ဒိုးနီးယားကို ရှုံးနိမ့်ကာ ခြေစစ်ပွဲကျခဲ့ပါတယ်။
