မော်ရင်ဟိုကို နစ်နာကြေး ပေါင် ၁၃ သန်းပေးခဲ့ရတဲ့အပြင် ဟိုတယ်စရိတ် ပေါင် ၆၅၆၀၀၀ ပါ ရှင်းပေးခဲ့ရတဲ့ ဖီနာဘာချီ
ဟိုဆေးမော်ရင်ဟိုဟာ တူရကီနေ့ရက်တွေကို ဂန္ထဝင် Special One စတိုင်ဖြင့် အဆုံးသတ်ခဲ့ပါတယ်။
အသက် ၆၂ နှစ်ရှိ ပေါ်တူဂီလူမျိုးနည်းပြဟာ တူရကီကလပ် ဖီနာဘာချီကို ကိုင်တွယ်စဉ် တစ်နှစ်ကျော်ကာလအတွင်း ဟိုတယ်မှာ နေထိုင်ခဲ့ပြီး ကလပ်ဘက်က ဟိုတယ်စရိတ်တနင့်တပိုး ရှင်းပေးခဲ့ရပါတယ်။
တူရကီသတင်းစာ Yenicag Gazetesi ရဲ့ ဖော်ပြလာမှုအရ မော်ရင်ဟိုဟာ ဖီနာဘာချီကို ကိုင်တွယ်တဲ့ ၁၆ လအတွင်း ၁၅ လဝန်းကျင်ကို Four Seasons Hotel မှာ နေထိုင်ခဲ့ပါတယ်။
ယင်းကလပ်အတွင်း ဟိုတယ်နေထိုင်စရိတ် တူရကီလိုင်ရာ ၃၆.၅ သန်း (ပေါင် ၆၅၆၀၀၀) ရှိခဲ့ပါတယ်။ ယင်းဟိုတယ်စရိတ်တွေကို ကလပ်ဘက်ကပဲ ရှင်းပေးခဲ့ရတာပါ။
ယင်းဇိမ်ခံဟိုတယ်မှာ ဘော့စ်ဖရပ်စ်ကမ်းနဖူးတွင် တည်ရှိပြီး တစ်ညနေထိုင်စရိတ် ပေါင်ထောင်ချီပေးရပါတယ်။
မော်ရင်ဟိုဟာ ဖီနာဘာချီကို ကိုင်တွယ်စဉ်အတွင်း ဇိမ်ခံဟိုတယ်မှာ နေထိုင်ခဲ့တယ်ဆိုပေမယ့် ကွင်းထဲမှာ ရလဒ်ကောင်းကောင်း မရယူပေးနိုင်ခဲ့ပါဘူး။
သူဟာ ချန်ပီယံလိဂ်ပလေးအော့ဖ်အဆင့်မှ ထွက်ခွာခဲ့ရပြီးတဲ့နောက် ရာထူးမှ ထုတ်ပယ်ခြင်းခံခဲ့ရပါတယ်။
ကလပ်ဘက်က မော်ရင်ဟိုရဲ့ ဟိုတယ်စရိတ်ကို ရှင်းပေးရတာက စာချုပ်ပါ အချက်ကြောင့်လည်း ဖြစ်နိုင်ပါတယ်။
မော်ရင်ဟိုဟာ ၂၀၂၆ ခုနှစ်တွင်မှ ကုန်ဆုံးမယ့် စာချုပ်သက်တမ်းမကုန်ဆုံးမီ အထုတ်ခံခဲ့ရတာ ဖြစ်လို့ နစ်နာကြေး ပေါင် ၁၃ သန်း ရရှိခဲ့ပါသေးတယ်။
မော်ရင်ဟိုဟာ နည်းပြဘဝအတွင်း ထုတ်ပယ်ခြင်းခံခဲ့ရမှုများအတွက် နစ်နာကြေး ပေါင်သန်း ၁၀၀ နီးပါး ရရှိထားသူလည်း ဖြစ်ပါတယ်။
မော်ရင်ဟိုဟာ ကလပ်ကို ကိုင်တွယ်နေစဉ်အတွင်း အိမ်မှာ မနေဘဲ ဟိုတယ်မှာ နေတာ ပထမဆုံးအကြိမ် မဟုတ်ပါဘူး။
သူဟာ ယူနိုက်တက်ကို ကိုင်တွယ်စဉ်တုန်းကလည်း ဟိုတယ်မှာဘဲ နေထိုင်ခဲ့ကာ ဟိုတယ်စရိတ် ပေါင် ၅၀၀၀၀၀ အသုံးပြုခဲ့သူ ဖြစ်ပါတယ်။
မော်ရင်ဟိုဟာ ဖီနာဘာချီမှ ထုတ်ပယ်ခြင်းခံရပြီး ရက်သတ္တပတ်အနည်းငယ်အကြာမှာဘဲ နည်းပြဘဝ ပထမဆံ့းကိုင်တွယ်ခဲ့တဲ့ ဘင်ဖီကာနည်းပြအဖြစ် ခန့်အပ်ခြင်းခံခဲ့ရပါတယ်။
