တရားမဝင် ကုန်သွယ်မှုနဲ့ ဖမ်းခံထားရတဲ့ ကုန်ပစ္စည်းအများစုကို ဒဏ်ကြေးနဲ့ ပြန်ထုတ်ခွင့်ပြုမယ်
တရားမဝင် ကုန်သွယ်မှုကြောင့် ဖမ်းဆီးခံထားရတဲ့ ကုန်ပစ္စည်းတွေထဲကအများစုကို ဒဏ်ကြေးရိဆောင်ပြီး ပြန်ရွေးနိုင်မယ့်အစီအစဥ် အကောက်ခွန်ဦးစီးဌာနက ခွင့်ပြုလိုက်တယ်လို့ ကုန်သည်တွေ ဆီကသိရပါတယ်။
ပြီးခဲတဲ့ ဇူလိုင်လ ၁၄ ရက်မှ စက်တင်ဘာလ ၃ ရက်အထိ ကရင်ပြည်နယ်၊ မွန်ပြည်နယ်၊ မန္တလေးတိုင်းဒေသကြီး၊ ရှမ်းပြည်နယ်အထူးအဖွဲ့တွေနဲ့ အကောက်ခွန်ဦးစီးဌာနတို့က ဖမ်းဆီးရမိခဲ့တဲ့ လိုင်စင်မဲ့/ အကောက်ခွန်မဲ့ ကုန်ပစ္စည်းတွေနဲ့ ပိတ်ပင်တားမြစ်ကုန်ပစ္စည်းတင် မော်တော်ယာဉ် ၄၇၀ ပေါ်မှ ကုန်ပစ္စည်းအချို့ကို ဒဏ်ကြေးနဲ့ ရွေးယူခွင့် ပြုမှာဖြစ်တယ်လို့ သိရပါတယ် ။
" ဒဏ်ကြေးဆောင်ပြီး ပစ္စည်းတွေ ပြန်ရွေးခွင့်ပြုတာ ဟုတ်ပါတယ်။ ဒါပေမယ့် ကျွန်တော့် အသိတွေထဲတော့ ပြန်ရွေးတာမျိုး မကြားမိသေးဘူး ။ ဒီလိုရှိတယ်ဗျ ။ ပြန်ရွေးရမယ့် နူန်းနဲ့ ပစ္စည်းတန်ဖိုးကို တွက်ပြီး စျေးကွက် ပြန်ရောင်းချရမယ့် တန်ဖိုးမမျှတဲ့အခါ ပြန်မရွေးကြ တော့တာမျိုးလည်း ရှိတယ် ။ ဒဏ်ကြေးပေးပြီး ကိုယ့်အတွက် တွက်ချေကိုက်မယ်ဆိုရင် ရွေးကြမှာပါ။ ပစ္စည်းတန်ဖိုးအလိုက် ဒဏ်ကြေးကလည်း အနည်းအများ ကွာတယ် ။ " လို့ သွင်းကုန် ၊ပို့ကုန် လုပ်ငန်းရှင်တယောက်က ပြောပါတယ် ။
ဒဏ်ကြေးဆောင်ပြီး ပြန်ရွေးယူခွင့် ရှိတဲ့ ကုန်ပစ္စည်းတွေကိုတော့ အကောက်ခွန်ဦးစီးဌာနက ဒဏ်ကြေးငွေ နှစ်ဆ ၊ တဆ၊ ဆဝက်၊ ၀.၇၅ ဆ နူန်း သတ်မှတ်ပြီး ဒဏ်ကြေးကောက်ခံမှာ ဖြစ်တယ်လို့ သိရပါတယ်။
ဒဏ်ကြေးပေးပြီး ပြန်ထုတ်ယူနိုင်တဲ့ ပစ္စည်းတွေကတော့ ဆေးဝါး၊ ဆေးအထောက်အကူပြုပစ္စည်းများ၊ ပိုးသတ် ဆေး ၊ မျိုးစေ့၊ စားသုံးဆီ၊ မွေးမြူရေး လုပ်ငန်းသုံးကုန်ကြမ်း၊ တိရစ္ဆာန်သုံးဆေးဝါး၊ ဆေးဝါးကုန်ကြမ်း ပစ္စည်းနဲ့ ပရဆေးကုန်ကြမ်း၊ လယ်ယာသုံး စက်နဲ့ စက်ပစ္စည်း၊ စားသောက်ကုန်၊ လယ်ယာလုပ် ငန်းသုံး ထော်လာဂျီ / E Three Wheel Motocycle ၊ Paper and Stationary စက်မှုကုန်ကြမ်း၊ ပလတ်စတစ်ကုန်ကြမ်း တို့ဖြစ်တယ်လို့ သိရပါတယ်။
နောက်ပြီး စားသောက်ကုန်ကြမ်း၊ Packing Materials ၊ စက်ဆီ၊ ချောဆီနဲ့ အခြားစက်မှုသုံးဆီ၊ ကတ္တရာ၊ လျှပ်စစ်ဓာတ်အားထုတ်/လွှတ်/ ဖြတ်ပစ္စည်း၊ ဘိလပ်မြေ၊ Maching and spare parts အပိုပစ္စည်း (ယာဉ်/စက်/ဆက်သွယ်ရေး) ၊ Electrical Goods / လူသုံးကုန်ပစ္စည်း/ E Bicycle ၊ လေဆိပ်သုံး Tractor ၊ လယ်ယာသုံး (ထွန်စက်)တို့ လည်းပါဝင်တယ်လို့ သိရပါတယ်။
အလားတူ ဓာတ်မြေဩဇာ၊ ဒီဇယ်ဆီ၊ ဓာတ်ဆီ၊ LPG Gas ၊ သံနဲ့ သံမဏိပစ္စည်း ၊ Constru- ction Materials ၊ တာယာနဲ့ ရော်ဘာထုတ်ကုန်ပစ္စည်း၊ တယ်လီဖုန်းနဲ့ ဆက်သွယ်ရေးသုံး ပစ္စည်း ၊ လုပ်ငန်းသုံးမော်တော်ယာဉ် ၊ နောက်တွဲယာဉ် ၊ Electronic Goods ၊ ယန္တရား နဲ့ လူစီးမော်တော်ယာဥ်တို့ကိုလည်း သတ်မှတ် ဒဏ်ကြေး ဆောင်ပြီး ထုတ်ယူနိုင်တယ် လို့သိရပါတယ်။
ကုန်သွယ်ခွင့် ကန့်သတ်၊ တားမြစ်ထားတဲ့ ကုန်ပစ္စည်းတွေဖြစ်တဲ့ Vape၊ စီးကရက်၊ ဘီယာ၊ ဖဲထုပ် စတဲ့ ပစ္စည်းတွေကို ရွေးယူခွင့်မပြုဘဲ နိုင်ငံပိုင်အဖြစ် သိမ်းဆည်းမှာဖြစ်တယ်လို့ သိရပါတယ်။
" ဖမ်းမိတဲ့အထဲမှာ ကရင်ပြည်နယ်နဲ့ မွန်ဘက်က ပိုများမယ် ထင်တယ်။ အရင်လတွေတုန်းက ကုန်ကားတွေ ဖမ်းဆီးကြမ်းပြီး ပြန်မှမလွှတ် ပေးခဲ့တာလေ ။တချို့ကားဆို လိုင်စင်တွေလည်း အပြည့်စုံရှိရက်နဲ့ အဖမ်းခံခဲ့ရတာ ။ " လို့ ကုန်သည်ကထပ်မံ ပြောပါတယ် ။
ပြီးခဲ့တဲ့ အောက်တိုဘာလ မှာဆိုရင် ၆၄၇၇.၁၂၀ ကျပ်သန်း တန်ဖိုးရှိ တရားမဝင် ကုန်ပစ္စည်းတွေနဲ့အတူ အဆိုပါ တရားမဝင် ကုန်စည်ကို သယ်ဆောင်လာတဲ့ ကားနဲ့ဆိုင်ကယ်တွေကိုပါ ဖမ်းဆီးရမိခဲ့ကြောင်း သိရပါတယ်။
လက်ရှိ နိုဝင်ဘာလမှာ ဆိုရင်လည်း တရားမဝင်တင်သွင်း လာတဲ့ ကုန်ပစ္စည်းတွေကို တရားမဝင်ကုန်သွယ်မှု တိုက်ဖျက်ရေး ဦးဆောင်ကော်မတီမှ နေ့စဥ်နဲ့အမျှ ဖမ်းဆီးရမိမှုရှိနေကြောင်း သိရပါတယ်။
