ထိုင်း-မလေးရှားနယ်စပ်အနီး ဒုက္ခသည်စက်လှေနစ်မြု့ပ်မှု လူဒါဇင်များစွာ ပျောက်ဆုံး
ထိုင်းနဲ့ မလေးရှားနယ်စပ်အနီးမှာ ရွှေ့ပြောင်ဒုက္ခသည်တွေကို တင်ဆောင်လာတဲ့ စက်လှေတစင်း နစ်မြုပ်ပြီးနောက် လူဒါဇင်ပေါင်းများစွာ ပျောက်ဆုံးနေပြီး တစ်ဦးသေဆုံးခဲ့တယ်လို့ တာဝန်ရှိသူတွေက ပြောပါတယ်.
အဲဒီစက်လှေဟာ Ko Tarutao ကျွန်းအနီးမှာ ပြီးခဲ့တဲ့ ကြသာပတေးနေ့က တိမ်းမှောက်ခဲ့တာလို့ ယုံကြည်ကြောင်း မလေးရှားကမ်းခြေစောင့်တပ်က ပြောပါတယ်။ လူ ၁၀ ယောက်ကို ကယ်တင်နိုင်ခဲ့ပြီး အမျိုးသမီးတယောက်အလောင်းကို ပင်လယ်ထဲမျောနေတာ တွေ့ခဲ့တယ်လို့ ဆိုပါတယ်။
သေဆုံးသူတွေဟာ စက်လှေကြီးတစင်းနဲ့ လာရောက်ခဲ့ပြီး မလေးရှားကိုချဉ်းကပ်ချိန်မှာ စက်လှေငယ်တွေပေါ် တက်ခဲ့ကြတဲ့ လူ ၃၀၀ ထဲကအဖွဲ့ငယ်ဖြစ်တယ်လို့ ကမ်းခြေစောင့်တပ်က ပြောပါတယ်။
မလေးရှားနိုင်ငံ လန်ကာဝီအပန်းဖြေစခန်းအနီးမှာ ကယ်ဆယ်ခံရသူတွေထဲမှာ မြန်မာနိုင်ငံသား သုံးယောက်၊ ရိုဟင်ဂျာ အမျိုးသားနှစ်ယောက်နဲ့ ဘင်္ဂလားဒေ့ရှ် အမျိုးသားတယောက် ပါဝင်ကြောင်း မလေးရှားနိုင်ငံပိုင်သတင်းဌာန Bernama က ရဲတပ်ဖွဲ့ကို ကိုးကားပြီး ဖော်ပြထားပါတယ်။
ရေထဲမှာ တွေ့ရှိခဲ့တဲ့ အလောင်းဟာ ရိုဟင်ဂျာအမျိုးသမီးတယောက် အလောင်းဖြစ်တယ်လို့ ဆိုပါတယ်။ အသက်ရှင်ကျန်ရစ်သူတွေကို ရှာဖွေမှုတွေ ဆက်လက်လုပ်ဆောင်နေပါတယ်။ မြန်မာနိုင်ငံ ရခိုင်ပြည်နယ်က ရိုဟင်ဂျာတွေဟာ ဘင်္ဂလားဒေ့ရှ်ကို ထွက်ပြေးပြီးနောက် မလေးရှား ၊ ထိုင်းစတဲ့ နိုင်ငံတွေကို အန္တရာယ်များတဲ့ ရေကြောင်းခရီးနဲ့ သွားရောက်လေ့ရှိပါတယ်။
ထွက်ပြေးလာသူအများစုဟာ ဒီခရီးလမ်းအတွက် ဒေါ်လာ ၃၀၀၀ ကျော်ပေးရလေ့ရှိတယ်လို့ မလေးရှား တာဝန်ရှိသူတွေက ပြောပါတယ်။
