ဖူလ်ဟမ်အား အနိုင်ရတဲ့ပွဲတွင် တိုက်စစ်မှူးဘာရီကို ဆူပူကြိမ်းမောင်းခဲ့တဲ့ အဲဗာတန်နည်းပြမိုယက်စ်
====================
ဒေးဗစ်မိုယက်စ်ဟာ ဖူလ်ဟမ်ကို အနိုင်ရတဲ့ အဲဗာတန်ရဲ့ ပွဲစဉ်တွင် တိုက်စစ်မှူးသီယာနိုဘာရီကို ဆူပူကြိမ်းမောင်းမှု ပြုလုပ်ခဲ့ပါတယ်။
စကော့တလန်နည်းပြဟာ Hill Dickinson Stadium တွင် ပြင်သစ်တိုက်စစ်မှူးအား ပွဲထုတ်ခဲ့ပါတယ်။
အဲဗာတန်ပရိသတ်များဟာ ဘာရီမှာ ဂိုးမသွင်းနိုင်ခဲ့ပေမယ့်လည်း ခြေစွမ်းအပေါ် ကျေနပ်ခဲ့ကြပါတယ်။ ပရိသတ်အချို့တို့က ဘာရီမှာ နွေရာသီတုန်းက ဗီလာရီးရဲလ်မ ပေါင် ၂၇ သန်းဖြင့် ပြောင်းလာပြီးနောက် အကောင်းဆုံးပွဲကစားနိုင်ခဲ့ကြောင်း ဆိုနေကြပါတယ်။
အဲဗာတန်ဟာ မနေ့ညကပွဲတွင် ပထမပိုင်းပြီးခါနီး အိုင်ဒရက်စ်ဆာဂူယီရဲ့ ဂိုးဖြင့် ပွဲကို ဦးဆောင်ဂိုး ရရှိခဲ့ကာ ၈၁ မိနစ်တွင် မိုက်ကယ်ကိန်းက ၂-၀ ဖြင့် အနိုင်ရရှိစေမယ့် ဂိုးကို သွင်းခဲ့ပါတယ်။
ဒါပေမယ့် ဒုတိယဂိုး မရရှိမီ ၂ မိနစ်အလိုတွင် ဒေးဗစ်မိုယက်စ်ဟာ ဘာရီအား ဘီတိုနှင့် လူစားလဲလှယ်မှု ပြုလုပ်ခဲ့ပါတယ်။
ပြင်သစ်ယူ-၂၁ လက်ရွေးစင်တိုက်စစ်မှူးဟောင်းဟာ ပရိသတ်များကို လက်ခုပ်တီး နုတ်ဆက်ရင်း ကွင်းအတွင်းမှ ထွက်ခွာခဲ့ပါတယ်။
ယင်းအချိန်တွင် ဒေးဗစ်မိုယက်စ်ဟာ ဘာရီမှာ လူစားလဲလှယ်ခံရမှုအပေါ် စိတ်ပျက်နေတဲ့ ပုံစံ ဖြစ်နေမှုနှင့်အတူ ဒေါသတကြီး ဆူပူကြိမ်းမောင်းမှု ပြုလုပ်ခဲ့ပါတယ်။
ဒေးဗစ်မိုယက်စ်ဟာ ပွဲအတွင်းတွင် ဘာရီကို ဆူပူကြိမ်းမောင်းမှု ပြုလုပ်ခဲ့ပေမယ့်လည်း ပွဲပြီး သတင်းစာရှင်းလင်းပွဲတွင်တော့ ချီးကျူးပြောဆိုမှု ပြုလုပ်သွားတာ တေ့ရပါတယ်။
