အွန်လိုင်းစွယ်စုံကျမ်း Wikipedia နှင့် ယှဉ်ပြိုင်မည့် Grokipedia ကို Elon Musk ပွဲထုတ်

အီလွန်မတ်စ် သည် အွန်လိုင်းစွယ်စုံကျမ်း ဝီကီပီးဒီးယား ၏ ပြိုင်ဘက်အဖြစ် ရပ်တည်စေလိုသော၊ လူအများထံမှ အချက်အလက်များ စုစည်းထားသည့် အွန်လိုင်းစွယ်စုံကျမ်းတစ်ခုဖြစ်သည့် Grokipedia ဂရိုကီပီးဒီးယားကို စတင်လိုက်ပြီ ဖြစ်သည်။

Grokipedia dot com ကို “ယခု စတင်လွှင့်တင်လိုက်ပြီ” ဖြစ်ပြီး ၎င်း၏ ရည်မှန်းချက်မှာ “အမှန်တရား၊ အမှန်တရားတစ်ခုလုံးနှင့် အမှန်တရားမှလွဲ၍ အခြားဘာမျှမရှိ” ဟု ဆိုရှယ်မီဒီယာတွင် မတ်စ် ကပြောကြားခဲ့သည်။

မတ်စ်သည် ယခင်ကတည်းက Wikipedia ကို “ဝါဒဖြန့်မှုများ” ဖြင့် ပြည့်နှက်နေသည်ဟု ဝေဖန်ခဲ့ပြီး အကျိုးအမြတ်မယူဟုဆိုထားသောအဖွဲ့အစည်းမှ ကိုင်တွယ်ထိန်းသိမ်းနေသည့် ထိုအွန်လိုင်းစွယ်စုံကျမ်းဝက်ဘ်ဆိုက်အား လှူဒါန်းခြင်းကို ရပ်တန့်ရန် လူအများကို တောင်းဆိုခဲ့ဖူးသည်။

ယခုနှစ် စက်တင်ဘာလတွင်မူ သူ၏ ဉာဏ်ရည်တု ကုမ္ပဏီ xAI က Grokipedia ကို လုပ်ဆောင်နေကြောင်း ကြေညာခဲ့သည်။
Grokipedia ဝက်ဘ်ဆိုက်သည် ရှာဖွေရေးဘား (search bar) မှလွဲ၍ အခြားအရာများ မပါဝင်ဘဲ ရိုးရှင်းသောအသွင်အပြင် ရှိသည်။ ၎င်းတွင် ဆောင်းပါးပေါင်း ၈၈၅,၂၇၉ ခု ရှိကြောင်း ဖော်ပြထားသည်။ Wikipedia တွင်မူ အင်္ဂလိပ်ဘာသာဖြင့် ဆောင်းပါးပေါင်း ၇ သန်းကျော် ရှိသည်ဟု ဆိုသည်။

အသုံးပြုသူများသည် Wikipedia ကဲ့သို့ပင် အမျိုးမျိုးသော ခေါင်းစဉ်များရှိ ဆောင်းပါးများကို ရှာဖွေနိုင်သည်။

Wikipedia ကို စေတနာ့ဝန်ထမ်းများက ရေးသားတည်းဖြတ်ကြသော်လည်း Grokipedia ဆောင်းပါးများကို မည်သို့ ပေါင်းစပ်ဖန်တီးထားသည်ကို ရှင်းရှင်းလင်းလင်း မသိရသေးပေ။

အစီရင်ခံစာများအရ ဤဝက်ဘ်ဆိုက်သည် Musk ၏ Grok chatbot ကို အခြေခံထားသော xAI model အားဖြင့် စွမ်းအားဖြည့်ထားသော်လည်း အချို့ဆောင်းပါးများကိုမူ Wikipedia မှ ပြောင်းလဲယူထားခြင်းဖြစ်ပုံရသည်။