ဒါရိုက်တာမိုက်တီး၊ သရုပ်ဆောင်ကျော်ဝင်းထွဋ်နှင့် အုန်းဒိုင်းတို့ကို ပါတီစုံဒီမိုကရေစီအထွေထွေရွေးကောက်ပွဲများကို နှောင့်ယှက်ဟန့်တားဖျက်ဆီးခြင်းမှကာကွယ်ပေးရေးဥပဒေဖြင့် ဖမ်းဆီးအရေးယူ
------------------------------
ဒါရိုက်တာမိုက်တီး(ခ)သန်းထွန်းဇော် ၊ ဇာတ်ပို့သရုပ်ဆောင် ကျော်ဝင်းထွဋ်(ခ)ကျော်မင်းထွဋ်နဲ့ ဟာသသရုပ်ဆောင် အုန်းဒိုင်း(ခ)ဇော်မြင့်တို့ကို ပါတီစုံဒီမိုကရေစီအထွေထွေရွေးကောက်ပွဲများကို နှောင့်ယှက်ဟန့်တားဖျက်ဆီးခြင်းမှကာကွယ်ပေးရေးဥပဒေနဲ့ ဖမ်းဆီးအရေးယူထားတယ်လို့ အမျိုးသားကာကွယ်ရေးနှင့် လုံခြုံရေးကောင်စီ သတင်းထုတ်ပြန်ရေးအဖွဲ့က အောက်တိုဘာ၂၉ရက်မှာ သတင်းထုတ်ပြန်ပါတယ်။
“ခေတ်သမိုင်းကို ဒုန်းစိုင်းမည့်သူများ" ရွေးကောက်ပွဲအသိပညာပေးဇာတ်လမ်းနဲ့ ဇာတ်လမ်းမှာပါဝင်သရုပ်ဆောင်ခဲ့တဲ့ အနုပညာရှင်တွေကို လူမှုကွန်ရက်ကတစ်ဆင့် မဟုတ်မမှန်ဝေဖန်ရေးသားပြီး ရွေးကောက်ပွဲအပေါ် ပြည်သူလူထု အထင်အမြင်လွဲမှားစေဖို့ လှုံ့ဆော်ခဲ့တာကြောင့် ဖမ်းဆီးခဲ့တာဖြစ်တယ်လို့ ထုတ်ပြန်ချက်မှာ ဖော်ပြထားပါတယ်။
အခုဖမ်းဆီးလိုက်တဲ့သူတွေထဲက ဒါရိုက်တာမိုက်တီး(ခ)သန်းထွန်းဇော်ဟာ ၂၀၂၁ခုနှစ်က ပုဒ်မ၅၀၅-ကနဲ့ အမှုဖွင့်အရေးယူခံခဲ့ရပြီး နောက်တစ်ကြိမ်ပြစ်မှုကျူးလွန်ရင် အဲဒီပြစ်ဒဏ်အပြင် အခုကျခံဖို့ကျန်ရှိတဲ့ပြစ်ဒဏ်တွေကိုပါ ဆက်လက်ကျခံပါမယ်ဆိုတဲ့ စည်းကမ်းသတ်မှတ်ချက်နဲ့ ၂၀၂၂ခုနှစ် အောက်တိုဘာ၂၈ရက်မှာ ပြစ်ဒဏ်ကနေ လွတ်ငြိမ်းခွင့်ရခဲ့သူဖြစ်တယ်လို့ ဆိုပါတယ်။
နိုင်ငံတော်အစိုးရအနေနဲ့ ပါတီစုံဒီမိုကရေစီအထွေထွေရွေးကောက်ပွဲလုပ်ငန်းစဉ်တွေအောင်မြင်ပြီး ပြည်သူလူထုတစ်ရပ်လုံး လိုလားတောင့်တတဲ့ ပါတီစုံဒီမိုကရေစီစနစ်ကို အောင်မြင်စွာလျှောက်လှမ်းနိုင်ရေး ပြည်သူလူထုရဲ့ ပူးပေါင်းပါဝင်မှုနဲ့ အထွေထွေရွေးကောက်ပွဲကို ဆက်လက်အကောင်အထည်ဖော် ဆောင်ရွက်သွားမှာဖြစ်တယ်လို့ သတင်းထုတ်ပြန်ထားပါတယ်။
