ရီးရဲလ်မက်ဒရစ်ပရိသတ်များကို ဗီနီရှပ်စ်တောင်းပန်လာ
=====================
ရီးရဲလ်မက်ဒရစ်တောင်ပံကစားသမားဗီနီရှပ်စ်ဂျူနီယာဟာ ဘာစီလိုနာအား ၂-၁ ဖြင့် အနိုင်ရတဲ့ El Clasico ပွဲတွင် လူစားလဲလှယ်ခြင်းခံရမှုအပေါ် ဒေါသတကြီးတုံ့ပြန်ခဲ့မှုအတွက် ပရိသတ်များကို တောင်းပန်လာပါတယ်။
ဗီနီရှပ်စ်ဟာ ယင်းပွဲရဲ့ ပွဲချိန် ၇၂ မိနစ်တွင် လူစားလဲလှယ်ခြင်းခံခဲ့ရခြင်း ဖြစ်ပြီး ယင်းအပေါ် အကြီးအကျယ်ဒေါသထွက်ကာ ဥမင်လှိုဏ်ခေါင်းသို့ ဆင်းသွားခဲ့ပါတယ်။
နောက်ပိုင်းတွင် ဘရာဇီးကစားသမားဟာ အရန်ခုံသို့ ပြန်ရောက်လာခဲ့ပြီးနောက် ပွဲပြီးဆုံးချိန်တွင် ပွဲမတိုင်မီ ရီးရဲလ်မက်ဒရစ်အား ထိုးနှက်ပြောဆိုခဲ့တဲ့ လာမိန်းယာမဲလ်အား ရန်မူရန် ကြိုးပမ်းခဲ့ပါတယ်။
ယခုအခါ ဗီနီရှပ်စ်က "ဒီကနေ့မှာ Clasico ပွဲမှာ လူစားလဲလှယ်ခံရတုန်းက ကျွန်တော့်တုံ့ပြန်မှုအတွက် မက်ဒရစ်ပရိသတ်တွေကို တောင်းပန်လိုပါတယ်။ ဒီကနေ့ လေ့ကျင့်ရေးကွင်းမှာလည်း လုပ်ခဲ့ပြီးပြီ။ ကစားဖော်တွေ၊ ကလပ်နဲ့ ဥက္ကဌကို ထပ်မံတောင်းပန်လိုခဲ့လို့ပါ။ တခါတလေ စိတ်အားထက်သန်မှုက ကျွန်တော့်ရဲ့အကောင်းဆုံးကို ထွက်ပေါ်လာစေပါတယ်။ ဘာလို့လဲဆိုတော့ ကျွန်တော်က အမြဲအနိုင်ရချင်တယ်၊ အသင်းကို ကူညီချင်လို့ပါ။ ကျွန်တော့်ရဲ့ ပြိုင်ဆိုင်လိုစိတ်တွေက ဒီကလပ်နဲ့ ဒီကလပ်ကို ကိုယ်စားပြုတဲ့လူတွေအားလုံးအပေါ် ထားတဲ့ ကျွန်တော့် ချစ်ခြင်းမေတ္တာကနေ ပေါက်ဖွားလာတာပါ" လို ဆိုရှယ်မီဒီယာတွင် တင်သွားပါတယ်။
၂၀၁၈ ခုနှစ်တွင် ဖလာမင်ဂိုမှ ပေါင် ၃၈.၇ သန်းဖြင့် ပြောင်းလာတဲ့ ဗီနီရှပ်စ်ဟာ ရီးရဲလ်မက်ဒရစ်အတွက် ၃၃၅ ပွဲကစားထားရာမှာ ၁၁၁ ဂိုးသွင်းယူထားနိုင်ပါတယ်။
သူဟာ ပြီးခဲ့တဲ့လများအတွင်းတွင် စာချုပ်သစ်ချုပ်ဆိုရေး ဆွေးနွေးမှု အဆင်မပြေမှုနှင့်အတူ ရီးရဲလ်မက်ဒရစ်ဘက်က သင့်တော်တဲ့ကမ်းလှမ်းမှု ရရှိလာလျှင် ရောင်းချမယ်လို့လည်း သတင်းထွက်နေပါတယ်။
တနင်္ဂနွေနေ့တုန်းက လူစားလဲလှယ်ခြင်းခံရချိန်တွင် ဗီနီရှပ်စ်က "ငါပဲ အမြဲတမ်းအလဲခံရတာလား။ ဒီအသင်းက ထွက်ပြီ။ ငါထွက်သွားရင် အကောင်းဆုံး။ ငါ ထွက်ပြီ"လို့ အော်ဟစ် ပြောဆိုခဲ့ကြောင်း Dazn က ရိုက်ကူးမှတ်တမ်းတင်နိုင်ခဲ့ပါတယ်။
