အပစ်ရပ်သဘောတူညီချက် ချိုးဖောက်တယ်ဆိုကာ ဂါဇာကို အစ္စရေးက အပြင်းအထန်တိုက်ခိုက်လို့ လူ ၃၃ ယောက်သေဆုံး
ဂါဇာမှာ အစ္စရေးရဲ့ လေကြောင်းကနေ အပြင်းအထန် တိုက်ခိုက်မှုတွေကြောင့် ပါလက်စတိုင်း ၃၃ ယောက်သေဆုံးခဲ့တယ်လို့ ဂါဇာ ကျန်းမာရေးတာဝန်ရှိသူတွေက ပြောပါတယ်။
အမေရိကန်ကြားဝင်စေ့စပ်ပေးတဲ့ အပစ်အခတ်ရပ်စဲရေးသဘောတူညီချက်ကို ဟားမတ်စ်တို့က ချိုးဖောက်တယ်ဆိုကာ အစ္စရေးက လက်တုံ့ပြန်တိုက်ခိုက်ခဲ့တာပါ။ ဟားမတ်စ်တို့ဟာ အစ္စရေးတပ်ဖွဲ့ဝင်တွေကို တိုက်ခိုက်ခဲ့ပြီး ဓါးစာခံရုပ်အလောင်းတွေ ပြန်လည်ပေးအပ်ရာမှာလည်း စည်းကမ်းချက်တွေကို ချိုးဖောက်ခဲ့တယ်လို့ အစ္စရေးက စွပ်စွဲထားပါတယ်။
ဟားမတ်စ်ကတော့ အစ္စရေးတပ်ဖွဲ့ဝင်တွေကို တိုက်ခိုက်မှုနဲ့ မပတ်သက်ဘူးလို့ ဆိုထားပြီး အပစ်အခတ်ရပ်စဲရေးသဘောတူညီချက်ကို ကတိကဝတ်ပြုထားဆဲဖြစ်ကြောင်း အခိုင်အမာဆိုပါတယ်။
အမေရိကန်သမ္မတ ဒေါ်နယ်ထရန့်ကတော့ အပစ်အခတ်ရပ်စဲရေးကို မထိခိုက်သေးဘူးလို့ အခိုင်အမာပြောဆိုခဲ့ပေမယ့် အစ္စရေးစစ်တပ်ဖွဲ့ဝင်တွေ ပစ်မှတ်ထားခံရပါက ပြန်လည်တိုက်ခိုက်သင့်တယ်လို့ ပြောပါတယ်။
အစ္စရေး၏ တိုက်ခိုက်မှုတွေဟာ ဂါဇာစီးတီး ၊ဘိတ်လာဟီယာ၊ အယ်လ်ဘူရီ၊ နူဆီရတ်နဲ့ ခန်းယွန်နစ်ရှိ အိမ်တွေ၊ ကျောင်းတွေနဲ့ လူနေရပ်ကွက်တွေကို ထိမှန်ခဲ့ပါတယ်။ ကယ်ဆယ်ရေးအဖွဲ့တွေဟာ ဗုံးကြဲတိုက်ခိုက်မှုတွေနဲ့ ပစ္စည်းကိရိယာတွေ ချို့တဲ့မှုကြောင့် အလွန်ခက်ခဲတဲ့ အခြေအနေတွေကြားမှာ ကယ်ဆယ်ရေးလုပ်နေရတယ်လို့ တာဝန်ရှိသူတွေက ပြောပါတယ်။
ပျောက်ဆုံးနေသူအချို့ အပျက်အစီးတွေအောက်မှာ ရှိနေဆဲဖြစ်ပြီး သေဆုံးသူအရေအတွက် မြင့်တက်လာနိုင်တယ်လို့ ကယ်ဆယ်ရေးသမားတွေက ပြောပါတယ်။ အစ္စရေးဝန်ကြီးချုပ် ဘင်ဂျမင်နေတန်ယာဟုက ဂါဇာကို ချက်ချင်းတိုက်ခိုက်မှုတွေ အပြင်းအထန်လုပ်ဖို့ အင်္ဂါနေ့ညနေပိုင်းမှာ အမိန့်ပေးခဲ့ပြီး အကြောင်းရင် အသေးစိတ်ကို ထုတ်ပြန်တာမရှိသေးပါဘူး။
ဒါပေမယ့် ဟားမတ်စ်ဟာ ဂါဇာရှိ အစ္စရေးစစ်သားတွေကို အင်္ဂါနေ့က တိုက်ခိုက်မှုဟာ အနီရောင်မျဉ်းကို ဖြတ်ခဲ့တာလို့ အစ္စရေးကာကွယ်ရေးဝန်ကြီး ကက်ဇ်က ပြောပါတယ်။ ဟားမတ်စ်ဟာ အစ္စရေးစစ်သားတွေကို တိုက်ခိုက်ခြင်းနဲ့ သေဆုံးသွားတဲ့ ဓားစာခံတွေကို ပြန်လည်ပေးအပ်ဖို့ သဘောတူညီချက်ကို ချိုးဖောက်ခြင်းအတွက် အဆပေါင်းများစွာ ပေးဆပ်ရလိမ့်မယ်လို့ သူက သတိပေးထားပါတယ်။
