ကင်ညာကမ်းရိုးတန်းမှာ လေယာဉ်ပျက်ကျမှု လိုက်ပါသူအားလုံး သေဆုံး

ကင်ညာကမ်းရိုးတန်းအနီးမှာ လေယာဉ်ပျက်ကျမှုကြောင့် ဥရောပခရီးသွား ၁၀ ယောက်နဲ့ ဒေသခံလေယာဉ်မှူးတယောက် သေဆုံးခဲ့ကြောင်း တာဝန်ရှိသူတွေက အတည်ပြုပြေကြားပါတယ်။

လေယာဉ်ဟာ လူကြိုက်များတဲ့ ဒိုင်ယာနီကမ်းခြေအပန်းဖြေစခန်းမှ ကမ္ဘာကျော် မာဆိုင်းမာရာဂိမ်းဥယျာဉ်ရှိ လေယာဉ်ကွင်းကို ပျံသန်းနေချိန်မှည ပျက်ကျခဲ့ကြောင်း ကင်ညာအရပ်ဘက်လေကြောင်းအာဏာပိုင်အဖွဲ့ ကဆိုပါတယ်။

လေယာဉ်ပေါ်မှာ ဟန်ဂေရီနိုင်ငံသား ရှစ်ယောက် ၊ ဂျာမနီနိုင်ငံသားနှစ်ယောက်နဲ့ ကင်ညာလေယာဉ်မှူးတယောက်တို့ လိုက်ပါလာပြီး လေယာဉ်ပျက်ကျမှုမှာ အားလုံးသေဆုံးခဲ့ကြောင်း Mombasa Air Safari က ပြောပါတယ်။

လက်ရှိမှာတော့ ထိခိုက်နစ်နာခဲ့ရတဲ့ မိသားစုတွေကို တတ်နိုင်သမျှ ပံ့ပိုးကူညီမှုအားလုံး ပေးအပ်ဖို့ဖြစ်တယ်လို့ ကြေညာချက်မှာ ဖော်ပြထားပါတယ်။ ဒေသခံမီဒီယာတွေကတော့ လေယာဉ်ပျက်ကျရာနေရာမှာ အပျက်အစီးတွေ ပြန့်ကျဲ မီးလောင်နေတဲ့ပုံတွေကို ဖော်ပြထားပါတယ်။

လေယာဉ်သည် ဒိုင်ယာနီမှ ပျံတက်ပြီးနောက် ကွာလီ မြို့မှ ၁၀ ကီလိုမီတာ ခန့်အကွာမှာ ပျက်ကျခဲ့တာပါ။ ပျက်ကျမှု အကြောင်းရင်းကို စုံစမ်းစစ်ဆေးမှုတွေ ပြုလုပ်နေဆဲဖြစ်ပေမယ့် ရာသီဥတုဆိုးရွားမှုကြောင့် ဖြစ်နိုင်ကြောင်း တာဝန်ရှိသူတွေက ပြောပါတယ်။

သြဂုတ်လအတွင်းကလည်း Amref ဆေးဘက်ဆိုင်ရာပရဟိတအဖွဲ့ပိုင် အပေါ့စားလေယာဉ်တစင်း မြို့တော် နိုင်ရိုဘီ ဆင်ခြေဖုံးမှာ ပျက်ကျခဲ့ပြီး လူခြောက်ယောက် သေဆုံးကာ နှစ်ယောက် ဒဏ်ရာရရှိခဲ့ပါတယ်။