◾️ တားဆီးပိတ်ဆို့မှုများကြောင့် ပိုင်ဆိုင်မှုများကိုရောင်းချသွားမည်ဟု ရုရှားရေနံကုမ္ပဏီကြီးထုတ်ပြန်
ပြီးခဲ့သည့်သီတင်းပတ်အတွင်း အမေရိကန်ကကြေညာခဲ့တဲ့ တားဆီးပိတ်ဆိုမှုများထွက်ပေါ်လာခဲ့ပြီးနောက် ၎င်းတို့၏နိုင်ငံရပ်ခြားလုပ်ငန်းများနှင့်ပိုင်ဆိုင်မှုများကို ရောင်းချသွားမည်ဖြစ်ကြောင်း ရုရှားနိုင်ငံ၏ ဒုတိယအကြီးဆုံးရေနံကုမ္ပဏီကြီး Lukoil ကထုတ်ပြန်သည်။
Lukoil က ၎င်းတို့ပိုင်ဆိုင်မှုများအားရောင်းချရန်စီစဉ်ခြင်းမှာ ၂၀၂၂ ခုနှစ်၊ ဖေဖော်ဝါရီလကစတင်ခဲ့သော ယူကရိန်းစစ်ပွဲကိစ္စနှင့်ဆက်စပ်၍ အနောက်တိုင်း၏တားဆီးပိတ်ဆို့မှုများကြောင့် ရုရှားကုမ္ပဏီတစ်ခုက လုပ်ဆောင်သည့် နောက်ဆက်တွဲအကြီးမားဆုံးလုပ်ရပ်ဖြစ်ကြောင်း ရိုက်တာသတင်းကဖော်ပြသည်။
နိုင်ငံရပ်ခြားပိုင်ဆိုင်မှုများထိန်းချုပ်ရေးရုံး(OFAC)ပိတ်သိမ်းမှုလိုင်စင်အရ နိုင်ငံခြားပိုင်ဆိုင်မှုများအား ရောင်းချခြင်းဖြစ်ကြောင်းနှင့် နိုင်ငံတကာပိုင်ဆိုင်မှုများ၏လည်ပတ်မှုများ ထိခိုက်မှုမရှိစေရန်လိုအပ်ပါက လိုင်စင်ကိုသက်တမ်းတိုးသွားမည်ဖြစ်ကြောင်း ကုမ္ပဏီထုတ်ပြန်ချက်ကဖော်ပြပြီး ပိုင်ဆိုင်မှုများအား ဝယ်ယူလိုသူများ၏ကမ်းလှမ်းမှုများကို စတင်စဉ်းစားနေပြီဟုလည်းဆက်ပြောသည်။
အောက်တိုဘာ ၂၂ ရက်တွင် အမေရိကန်သမ္မတဒေါ်နယ်ထရန့်က ရုရှားနိုင်ငံ၏အကြီးဆုံး ရေနံကုမ္ပဏီ ကြီးများဖြစ်သော Lukoil နှင့် Rosneft တို့အပေါ် ယူကရိန်းနှင့်ဆက်စပ်သောတားဆီးပိတ်ဆို့မှုများ ချမှတ်ခဲ့သည်။
ယင်းမတိုင်မီအောက်တိုဘာ ၁၅ ရက်ကပင် ဗြိတိန်က Lukoil နှင့် Rosneft တို့အပြင် ရုရှားက ရေနံခိုးပို့ နေသော ရေနံတင်သင်္ဘောအုပ်စုကိုပါပစ်မှတ်ထား၍ တားဆီးပိတ်ဆို့မှုများလုပ်ခဲ့ပြီး စွမ်းအင်ပိတ်ပင်မှု များကို ပိုမိုတင်းကျပ်ရန်နှင့် ကရင်မလင်၏ဝင်ငွေလမ်းကြောင်းကို ဖြတ်တောက်ရန်ဟု ပြောကြားခဲ့ သည်။
မော်စကိုမြို့တွင်ရုံးချုပ်ထားရှိသော Lukoil သည် ကမ္ဘာ့ရေနံထုတ်လုပ်မှုစုစုပေါင်း၏ နှစ်ရာခိုင်နှုန်းကို ထုတ်လုပ်ပေးနေပြီး ၎င်းတို့အဓိကရေနံရှာဖွေမှုလုပ်ဆောင်ခဲ့သော ဆိုက်ဘေးရီးယားအနောက်ပိုင်းမှ Langepas, Urai နှင့် Kogalym ဒေသသုံးခုနာမည်ကိုအဖျားဆွတ်၍ ကုမ္ပဏီနာမည်ကို ရယူထားခြင်း ဖြစ်သည်။
ကုမ္ပဏီ၏ထုတ်ပြန်ချက်၌ မည်သည့်နိုင်ငံခြားပိုင်ဆိုင်မှုများကိုရောင်းချသွားမည်ဆိုခြင်းကို ဖော်ပြမထားပေ။
၎င်းတို့၏အကြီးမားဆုံးနိုင်ငံရပ်ခြားပိုင်ဆိုင်မှုမှာ အီရတ်နိုင်ငံမှကမ္ဘာ့အကြီးဆုံးရေနံမြေတစ်ခုဖြစ်သော West Qurna 2 ရေနံမြေဖြစ်ပြီး ယင်းတွင် Lukoil က ၇၅ ရာခိုင်နှုန်းကိုပိုင်ဆိုင်ထားသည်။
အဆိုပါရေနံမြေ၏ အများဆုံးထုတ်လုပ်နိုင်စွမ်းသည် ဧပြီလကတစ်နေ့စည်ပေါင်း ၄၈၀၀၀၀ ရှိခဲ့ကြောင်း ရုရှားအင်တာဖက်စ်သတင်းအရ သိရသည်။ ထို့ပြင်ဘော်လကန်ဒေသတွင် တစ်နေ့လျှင်ရေနံစည်ပေါင်း ၁၉၀၀၀၀ ထုတ်လုပ်နိုင်သော ဘူလ်ဂေးရီးယားနိုင်ငံမှ Lukoil Neftohim Burgas ရေနံချက်စက်ရုံကို လုပ်ကိုင်နေသကဲ့သို့ ရိုမေးနီးယားနိုင်ငံမှ Petrotel ရေနံချက်စက်ရုံကိုလည်း Lukoil ကလုပ်ကိုင်နေ သည်။
Lukoil ကဟန်ဂေရီနှင့်စလိုဗက်ကီးယားကို ရေနံများပေးပို့နေသကဲ့သို့ တူရကီနိုင်ငံတွင်ရှိပြီး အဇာဘိုင်ဂျန်နိုင်ငံမှ SOCAR ကုမ္ပဏီကပိုင်ဆိုင်သည့် STAR ရေနံချက်စက်ရုံကလည်း ၎င်းတို့ပေးပို့သော ရေနံများကိုအဓိကချက်လုပ်နေသည်။
ထို့ပြင် ဥရောပရေနံဆိပ်ကမ်းများနှင့် လက်လီရေနံအရောင်းဆိုင်လုပ်ငန်းများတွင်လည်း Lukoil ၏ ပိုင်ဆိုင်မှုများပါရှိကာ လက်တင်အမေရိက၊ အာဖရိကနှင့် ကာဇက်စတန်အပါအဝင် အာရှအလယ်ပိုင်း တွင်လည်း ရေနံနှင့်ပတ်သက်သော အထက်ဆန်၊ အောက်စုန်လုပ်ငန်းအများအပြားကို လုပ်ကိုင်နေ ကြောင်း သိရသည်။
သတင်း - ရဲမင်း
ကိုးကား - By Reuters
#နိုင်ငံတကာသတင်း
