◾️ အဆင့်မြှင့်ထားသော ကုန်သွယ်ရေးသဘောတူညီချက် အာဆီယံနှင့် တရုတ် လက်မှတ်ထိုး
အရှေ့တောင်အာရှနိုင်ငံများအသင်း (ASEAN) နှင့် တရုတ်ကြား အဆင့်မြှင့်တင်ထားသော လွတ်လပ်စွာ ကုန်သွယ်ရေးသဘောတူစာချုပ်တစ်ရပ်ကို လက်မှတ်ရေးထိုးလိုက်ကြကြောင်းနှင့် ယင်းတွင် ဒစ်ဂျစ်တယ်နှင့် အစိမ်းရောင်စီးပွားရေးအပြင် အခြားလုပ်ငန်းနယ်ပယ်သစ်များလည်းပါဝင်ကြောင်း တရုတ်စီးပွားကူးသန်းဝန်ကြီးဌာနကပြောကြားသည်။
အဖွဲ့ဝင်နိုင်ငံ ၁၁ နိုင်ငံပါဝင်သောအာဆီယံအဖွဲ့သည် တရုတ်နိုင်ငံ၏အကြီးမားဆုံးကုန်သွယ်ဖက်ဖြစ်ကာ ပြီးခဲ့သည့်နှစ်က နှစ်ဖက်ကြားကုန်သွယ်မှု ကန်ဒေါ်လာ ၇၇၁ ဘီလီယံအထိရောက်ရှိခဲ့ကြောင်း အာဆီယံကိန်းဂဏာန်းများအရသိရသည်။
အမေရိကန်သမ္မတဒေါ်နယ်ထရန့်အစိုးရကချမှတ်လိုက်သော များပြားသည့်သွင်းကုန်ခွန်များကိုတန်ပြန်ရန် တရုတ်နိုင်ငံကအာဆီယံနိုင်ငံများနှင့်ထိတွေ့ဆက်ဆံမှုများကို တိုးမြှင့်ရန်ကြိုးစားနေသည်။ အာဆီယံသည် နှစ်စဉ်ဂျီဒီပီကန်ဒေါ်လာ ၃ ဒသမ ၈ ထရီလီယံအထိသုံးစွဲလျက်ရှိသည်။
အဆင့်မြှင့်ထားသော သဘောတူညီချက်သည် နိုင်ငံပေါင်းစုံပါဝင်ခြင်းဝါဒနှင့် လွတ်လပ်စွာကုန်သွယ်မှု အပေါ်နှစ်ဖက်စလုံးကထားရှိသော ခိုင်မာလေးနက်သည့်ပိုင်းဖြတ်မှုကို အပြည့်အဝထင်ဟပ်နေကြောင်း တရုတ်စီးပွားကူးသန်းဝန်ကြီးဌာနက ထုတ်ပြန်ချက်တစ်ရပ်တွင်ပြောကြားသည်။
မြေရှားသတ္တများနှင့် အခြားအရေးပါသော သတ္တုများအပေါ် တရုတ်တို့၏ တိုးချဲ့ပိတ်ပင်မှုများကြောင့် အခြားစီးပွားရေးနိုင်ငံကြီးများ၏ ဝေဖန်မှုများရှိနေသော်လည်း ပိုမို၍ပွင့်လင်းသောစီးပွားရေးနိုင်ငံအဖြစ်နေရာချရန် ဘေဂျင်းက ကြိုးစားနေကြောင်း ရိုက်တာသတင်းက ဖော်ပြသည်။
အာဆီယံနှင့် တရုတ်ကြား လွတ်လပ်စွာကုန်သွယ်ရေးသဘောတူညီချက်ကို မလေးရှားနိုင်ငံ၌ ကျင်းပနေသည့် အာဆီယံထိပ်သီးဆွေးနွေးပွဲတွင် လက်မှတ်ရေးထိုးခဲ့ကြခြင်းဖြစ်သည်။
အဆင့်မြှင့်ထားသော အာဆီယံ-တရုတ်ကုန်သွယ်ရေးသဘောတူညီချက်ကို ၂၀၂၂ ခုနှစ်၊ နိုဝင်ဘာလက စတင်ညှိနှိုင်းဆွေးနွေးခဲ့ကြခြင်းဖြစ်ပြီး ထရန့်၏ အခွန်ထိုးစစ်စတင်ခဲ့သော ယခုနှစ်မေလတွင် အပြီးသတ်ခဲ့သည်။ နှစ်ဖက်ကြားပထမဆုံးကုန်သွယ်ရေးသဘောတူညီချက်သည် ၂၀၁၀ တွင် စတင်အသက်ဝင်ခဲ့ကြောင်း သိရသည်။
တရုတ်နှင့် အာဆီယံနှစ်ဖက်စလုံးသည် ဒေသဆိုင်ရာကျယ်ပြန့်သော စီးပွားရေးပူးပေါင်းဆောင်ရွက်မှု (RCEP) အဖွဲ့တွင်ပါဝင်ကြသူများဖြစ်ပြီး ယင်းအဖွဲ့သည်ကမ္ဘာ့လူဦးရေသုံးပုံတစ်ပုံနှင့် ကမ္ဘာ့ဂျီဒီပီ ၃၀ ရာခိုင်နှုန်းကို လွှမ်းခြုံပိုင်ဆိုင်ထားသည်။
RCEP အဖွဲ့အစည်းအဝေးကို မလေးရှားက ယမန်နေ့က အိမ်ရှင်အဖြစ် လက်ခံကျင်းပခဲ့ပြီး ငါးနှစ်အတွင်း ပထမဆုံးအကြိမ်ပြန်လည်ကျင်းပကြခြင်းဖြစ်သည်။
ယင်းအုပ်စုအား အမေရိကန်ကချမှတ်ထားသော အခွန်အကောက်များသက်ရောက်မှုကို ကာကွယ်ပေး မည့် ကြားခံနယ်မြေတစ်ခုဖြစ်လာနိုင်သည်ဟု ရူမြင်ထားကြကြောင်း လေ့လာသူများကဆိုသည်။
သတင်း - ရဲမင်း
ကိုးကား - Reuters
#နိုင်ငံတကာသတင်း
