◾️ သက်ကြီးအမျိုးသမီးနှစ်ဦးအား တူဖြင့် ရိုက်နှက်ခဲ့သူကို ဖမ်းမိ
မန္တလေးတိုင်း၊ ချမ်းမြသာစည်မြို့နယ်၌ သက်ကြီးအမျိုးသမီးနှစ်ဦးအား သံရိုက်တူဖြင့် ရိုက်နှက်ခဲ့သည်ဟုဆိုသူ အမျိုးသမီးတစ်ဦးကို ဖမ်းဆီးရမိကြောင်း ယနေ့ (အောက်တိုဘာ ၂၈ ရက်)ထုတ်နိုင်ငံပိုင်သတင်းစာတွင် ဖော်ပြသည်။
ယင်းဖြစ်စဉ်မှာ ယခုလအောက်တိုဘာ ၂၅ ရက်က ချမ်းမြသာစည်မြို့နယ်၊ မြို့သစ် (၂)ရပ်ကွက်၊ လမ်း ၇၀ (အေ)၊ ၁၀၇ လမ်းနှင့် ၁၀၈ လမ်းကြားရှိ အိမ်အမှတ် (၁၇၂)နေအိမ်၌ ဖြစ်ပွားခဲ့ခြင်းဖြစ်ပြီးမြေညီ ထပ်ဧည့်ခန်းအတွင်းရှိ ခုတင်ပေါ်တွင်အိပ်ပျော်နေသည့် အသက်(၃၈) နှစ်အရွယ်ရှိမအေးအေးခိုင်အား သံရိုက်တူဖြင့်သုံးချက်ခန့်ထုရိုက်ပြီး ထိုင်ခုံပေါ်ထိုင်နေသည့်အသက်(၈၄) နှစ်အရွယ်ရှိအဒေါ်ဖြစ်သူ ဒေါ်ခင်စိုးမြင့်၏ဦးခေါင်းငယ်ထိပ်အား တစ်ချက်ထုရိုက်ခဲ့ခြင်းဖြစ်ကြောင်း အဆိုပါသတင်းထုတ်ပြန်ချက် တွင်ဖော်ပြထားသည်။
ထို့နောက် အိပ်ခန်းအတွင်းရှိသံသေတ္တာအားတူဖြင့်ရိုက်ဖျက်ကာ သေတ္တာအတွင်းရှိ ရွှေ ၁၀ ကျပ်သား တုံးတစ်တုံး၊ အိပ်ယာပေါ်ရှိငွေကျပ်သိန်း ၁၀၀ တို့ကိုယူဆောင်ကာ ပြင်ဦးလွင်မြို့သို့ပြန်လာ၍ ရွှေတုံး အားရောင်းချကာ ၎င်းချေးငှားထားသည့်ငွေကြေးများပြန်လည်ပေးဆပ်ရန်သုံးစွဲခဲ့ကြောင်း ထွက်ဆို ထားသည်။
သေဆုံးသူမှာ အိမ်ပိုင်ရှင်အငြိမ်းစားစာကြည့်တိုက်မှူးဒေါ်ခင်စိုးမြင့်ဖြစ်ပြီး နေအိမ်မြေညီထပ်ဧည့်ခန်း အတွင်းရှိထိုင်ခုံပေါ်တွင် ဦးခေါင်းပေါက်ပြဲဒဏ်ရာဖြင့်သေဆုံးနေပြီး ၎င်းနှင့်အတူနေထိုင်သည့်မြေးဖြစ် သူ အသက် (၃၆)နှစ်အရွယ်ရှိ ဒေါ်အေးအေးခိုင်သည်လည်း မြေညီထပ်ဧည့်ခန်းခုတင်ပေါ်တွင် ဦးခေါင်း၊ ဝဲနားထင်တို့၌ ပေါက်ပြဲဒဏ်ရာနှစ်ချက်ရရှိထားသည်ကို စစ်ဆေးတွေ့ ရှိရသဖြင့် ချမ်းမြသာစည်မြို့နယ်၊ အမှတ်(၁၁)နယ်မြေရဲစခန်းမှ ရာဇသတ်ကြီး ပုဒ်မ ၃၀၂/၃၂၆ ဖြင့် အမှုဖွင့်ခဲ့ခြင်းဖြစ်ကြောင်းသိရသည်။
အဆိုပါပြစ်မှုကျူးလွန်သူဟုယူဆရသူမှာ သေဆုံးသူဒေါ်ခင်စိုးမြင့်၏ တူမတော်စပ်သူဖြစ်ပြီး ပြင်ဦးလွင် မြို့၊ ရပ်ကွက်ကြီး(၃)၊ အမှတ်(၄)အခြေခံပညာအလယ်တန်းကျောင်း၌ တွဲဘက်တာဝန်ထမ်းဆောင် နေသည့် အလယ်တန်းပြဆရာမ မစိုးစိုးထွန်းဖြစ်ကြောင်း၊ ၎င်းသည်အောက်တိုဘာ ၂၆ ရက်၊ ညနေ ၅ နာရီကျော်တွင် အခင်းဖြစ်ရာနေအိမ်သို့ ပြန်လည်ရောက်ရှိလာစဉ် ဖမ်းဆီးရမိခဲ့ခြင်းဖြစ်ကြောင်း ထုတ်ပြန်ချက်တွင် ဖော်ပြထားသည်။
ပြစ်မှုကျူးလွန်သူ၏ထွက်ဆိုချက်အရ ၎င်းသည် ပြင်ဦးလွင်မြို့၌အိမ်ငှားရမ်းနေထိုင်ရသူဖြစ်ပြီး ငွေကြေး အခက်အခဲရှိခဲ့ကြောင်း၊ ယခုနှစ်ဇူလိုင်လတွင် ၎င်း၏အဒေါ်တော်စပ်သူ ဒေါ်ခင်စိုးမြင့်(သေဆုံး)ထံမှ ငွေချေးယူခဲ့ရာ ဒေါ်ခင်စိုးမြင့်မှအိမ်ရောင်းရငွေရရှိပါက စီစဉ်ပေးမည်ဟုပြောကြားခဲ့သော်လည်း နေအိမ် အားပြန်လည်ဝယ်ယူပြောင်းရွှေ့နေထိုင်ခဲ့ပြီး ၎င်း၏အခက်အခဲအားဆောင်ရွက်ပေးခြင်းမရှိကြောင်း ထွက်ဆိုထားသည်။
ယင်းဖြစ်စဉ်နှင့်ပတ်သက်ပြီး ပြစ်မှုကျူးလွန်သူအား ထိရောက်စွာအရေးယူနိုင်ရန်နှင့် သိမ်းဆည်းရန်ကျန် သက်သေခံပစ္စည်းများ ပြန်လည်သိမ်းဆည်းရရှိနိုင်ရေး ဆက်လက်ဆောင်ရွက်လျက်ရှိကြောင်း ထုတ်ပြန် ချက်အရသိရသည်။
သတင်း - အင်ကြင်း
ဓာတ်ပုံ - MOI
#ပြည်တွင်းသတင်း
