◾️ တောင်ကြီး၌ မီးပုံးပျံယမ်းပေါက်ကွဲ၊ အမျိုးသမီးတစ်ဦးသေဆုံး၊ နှစ်ဦးဒဏ်ရာရ
ရှမ်းပြည်နယ်(တောင်ပိုင်း)၊ တောင်ကြီးမြို့ဖာမွန်းကျေးရွာ၌ ယနေ့ (အောက်တိုဘာ ၂၈ ရက်) နံနက် ၉ နာရီခန့်က ယမ်းပေါက်ကွဲမှုကြောင့် အမျိုးသမီးတစ်ဦးသေဆုံးပြီး နှစ်ဦးဒဏ်ရာရရှိခဲ့ကြောင်း ဒေသခံများထံမှသိရသည်။
ဖာမွန်းကျေးရွာအုပ်စု၊ ကောင်ရွေးရွာ၌ တန်ဆောင်တိုင်မီးပုံးပျံပွဲအတွက် ပြင်ဆင်နေသည့်မီးပုံးပျံမှ ယမ်းပေါက်ကွဲခဲ့ရာ အသက်(၄၀) ကျော် ကွမ်းယာရောင်းနေသူ အမျိုးသမီးတစ်ဦးသေဆုံးပြီး အမျိုးသားနှစ်ဦးထိခိုက်ဒဏ်ရာရရှိခဲ့ကြောင်းသိရသည်။
အခင်းဖြစ်နေရာသို့ကြက်ခြေနီတပ်ဖွဲ့မှရောက်ရှိလာပြီး သေဆုံးသူနှင့်ဒဏ်ရာရသူများကို တောင်ကြီးစဝ်စံထွန်းဆေးရုံသို့ပို့ဆောင်ခဲ့ကြောင်းသိရသည်။
ယမန်နှစ်ကလည်း မီးပုံးပျံအတွက်ယမ်းထောင်းနေစဉ် ပေါက်ကွဲမှုကြောင့် အောင်ပန်းမြို့မှသုံးဦးသေဆုံးကာ နေအိမ်မီးလောင်ခဲ့ကြောင်း သတင်းမှတ်တမ်းများအရသိရသည်။
ယခုနှစ်တောင်ကြီးတန်ဆောင်တိုင်မီးပုံပျံပွဲတော်ကို တောင်ကြီးမြို့အဝေရာမီးပုံးပျံကွင်း၌ ယမန်နေ့ (အောက်တိုဘာ ၂၇ ရက်) မှ စတင်ကျင်းပနေပြီး နိုဝင်ဘာ ၄ ရက်အထိပြုလုပ်သွားမည်ဖြစ်ကြောင်း၊ မီးပုံးပျံပြိုင်ပွဲတွင် ဝင်ရောက်ယှဉ်ပြိုင်ရန် မီးပုံးပျံအလုံး ၄၀၀ ကျော်စာရင်းပေးထားကြောင်း သိရသည်။
သတင်း - ပိုင်လေး
ဓာတ်ပုံ - Pa-O's Supporter Group
#ပြည်တွင်းသတင်း