ကမ္ဘာအသက်အကြီးဆုံး သမ္မတဖြစ်သူ ရွေးကောက်ပွဲမှာ ရှစ်ကြိမ်မြောက် အနိုင်ရပြန်
ကင်မရွန်းနိုင်ငံမှာ အသက် ၉၂ နှစ်အရွယ် သမ္မတ ပေါလ်ဘိုင်ယာဟာ အငြင်းပွားဖွယ်ရာ သမ္မတရွေးကောက်ပွဲမှာ ရှစ်ကြိမ်မြောက်သက်တမ်းအတွက် အနိုင်ရရှိခဲ့တယ်လို့ ရွေးကောက်ပွဲ ကော်မရှင်က ထုတ်ပြန်ပါတယ်။
ကမ္ဘာ့အသက်အကြီးဆုံး နိုင်ငံ့ခေါင်းဆောင်ဖြစ်သူ ပေါလ်ဘိုင်ယာဟာ ထောက်ခံမဲ မဲအရေအတွက်၏ ၅၃ ဒဿမ ၇ ရာခိုင်နှုန်းရရှိခဲ့ပြီး အတိုက်အခံခေါင်းဆောင် အစ်ဆာတီချီရိုမာဘာကာရီက ၃၅ ဒဿမ ၂ ရာခိုင်နှုန်းနဲ့ အနိုင်ရရှိခဲ့တယ်လို့ ထုတ်ပြန်ထားပါတယ်။
ကြေငြာချက်မထုတ်ပြန်မီမှာ သမ္မတဘိုင်ယာရဲ့ မဟာမိတ်ဟောင်းဖြစ်တဲ့ ဘာကာရီက ရွေးကောက်ပွဲမှာ သူအနိုင်ရကြောင်း အခိုင်အမာပြောကြားခဲ့ပေမယ့် လက်ရှိအာဏာရ ကင်မရွန်းပြည်သူ့ဒီမိုကရက်တစ် လှုပ်ရှားမှုပါတီက ပယ်ချခဲ့ပါတယ်။
အောက်တိုဘာ ၁၂ ရက်နေ့က ကျင်းပခဲ့တဲ့ ရွေးကောက်ပွဲဟာ လူအသေအပျောက်ရှိတဲ့ အကြမ်းဖက်မှုတွေပါ ဖြစ်ပွားခဲ့ပြီး မကြာသေးမီရက်တွေအတွင်း ဘာကာရီကို ထောက်ခံသူ ရာပေါင်းများစွာသည် မြို့အတော်များများမှာ ဆန္ဒပြပွဲတွေပြုလုပ်ခဲ့ပြီး လုံခြုံရေးတပ်ဖွဲ့တွေနဲ့ ပဋိပက္ခတွေ ဖြစ်ပွားခဲ့ပါတယ်။
သမ္မတ ပေါလ်ဘိုင်ယာကတော့ သူ့ကို နောက်တကြိမ်ထပ်မံယုံကြည့်ပေးလို့ မဲဆန္ဒရှင်တွေကို ကျေးဇူးတင်တယ်လို့ ဆိုပါတယ်။ မိမိတို့ အတူတကွ ငြိမ်းချမ်း၊ စည်းလုံးညီညွတ်ပြီး ကြွယ်ဝချမ်းသာတဲ့ ကင်မရွန်းနိုင်ငံကို တည်ဆောက်ဖို့ အသေအချာ လုပ်ဆောင်ကြလိမ့်မယ်လို့ မျှော်လင့်ကြောင်း သမ္မတက ကြေညာချက်မှာပြောပါတယ်။
တနင်္ဂနွေနေ့မှာတော့ ကင်မရွန်းနိုင်ငံရဲ့ စီးပွားရေးမြို့တော် ဒူအာလာမှာ ဆန္ဒပြပွဲတွေအတွင်း အနည်းဆုံး လူလေးယောက် သေဆုံးခဲ့ပါတယ်။ ဆန္ဒပြသူတွေဟာ ရဲစခန်းတွေကို တိုက်ခိုက်ခဲ့ပြီး လုံခြုံရေးတပ်ဖွဲ့တွေဟာ ကိုယ့်ကိုယ်ကိုယ် ကာကွယ်ခဲ့ကြောင်း ပြောဆိုထားပါတယ်။
