ဂါဇာမှာ ကျန်ရှိနေတဲ့ အစ္စရေးဓါးစာခံအလောင်းတွေ ICRC နဲ့ အီဂျစ် ပူးပေါင်းရှာဖွေ
ဂါဇာမှာ ကျန်ရှိနေသေးတဲ့ အစ္စရေးဓါးစာခံတွေရဲ့ ရုပ်အလောင်းတွေကို နိုင်ငံတကာ ကြက်ခြေနီအဖွဲ့ (ICRC ) နဲ့အတူ အီဂျစ်နိုင်ငံကလည်း ပူးပေါင်းရှာဖွေနေပါတယ်။
အမေရိကန်သမ္မတ ဒေါ်နယ်ထရန့်ကတော့ ဟားမတ်စ်အနေနဲ့ ရုပ်အလောင်းတွေကို မြန်မြန်ပြန်ပို့ရန်နဲ့ မဟုတ်ပါက ငြိမ်းချမ်းရေးလုပ်ငန်းစဉ်မှာပါဝင်တဲ့ ပါဝင်တဲ့ အခြားနိုင်ငံတွေက အရေးယူဆောင်ရွက်လိမ့်မယ်လို့ သတိပေးထားပါတယ်။
အီဂျစ်အဖွဲ့ဟာ အလောင်းများကို ရှာဖွေဖို့ ICRC နဲ့ ပူးပေါင်းဆောင်ရွက်ခွင့် ရရှိထားပြီး အဝါရောင်မျဉ်း ကျော်လွန်ပြီး ရှာဖွေဖို့အတွက် တူးဖော်စက်တွေနဲ့ ထရပ်ကားတွေကို အသုံးပြုမယ်လို့ အစ္စရေးတာဝန်ရှိသူတွေက ပြောပါတယ်။
အဝါရောင်မျဉ်းဟာ အပစ်အခတ်ရပ်စဲရေး သဘောတူညီချက် ပထမအဆင့်ရဲ့ တစိတ်တပိုင်းအဖြစ် အစ္စရေး ဆုတ်ခွာသွားတဲ့ ဂါဇာ မြောက်ပိုင်း ၊ တောင်ပိုင်းနဲ့ အရှေ့ဘက်တစ်လျှောက် ဖြတ်သန်းသွားတဲ့ နယ်နိမိတ်ကို အမှတ်အသားပြုထားတာဖြစ်ပါတယ်။
ယခုအချိန်အထိ အစ္စရေးဟာ အဲဒီမျဉ်းကိုကျော်လွန်ပြီး ဘယ်အဖွဲ့ကိုမှ ဝင်ခွင့်မပြုသေးပါဘူး။ အီဂျစ်ဟာ ကာတာ၊ တူရကီတို့နဲ့ အတူ ယခုလအစောပိုင်းက အီဂျစ်အပန်းဖြေစခန်း ရှာမ်အယ်လ်ရှိတ် ဂါဇာအပစ်ရပ် လက်မှတ်ထိုးခဲ့တဲ့ နိုင်ငံထဲမှာ ပါဝင်ပါတယ်။
ICRC ကလည်း ဓားစာခံတွေ ပြန်ပို့ရာမှာ အဓိကနေရာကနေ ပါဝင်ပတ်သက်နေပါတယ်။
ဟားမတ်စ်ဟာ ဓါးစာခံတွေ သို့မဟုတ် သေဆုံးသွားသူတွေကို အစ္စရေးတပ်ထံ တိုက်ရိုက်လွှဲပြောင်းခြင်းမပြုဘဲ ICRC ကို လွှဲပြောင်းပေးအပ်ပြီး ဂါဇာမှတဆင့် အစ္စရေးကို ပို့ဆောင်တာဖြစ်ပါတယ်။ လက်ရှိမှာတော့ အလောင်း ၁၃ လောင်း ကျန်ရှိနေပါတယ်။
အစ္စရေးရဲ့ ပြင်းထန်တဲ့ ဗုံးကြဲတိုက်ခိုက်မှု နှစ်နှစ်ကျော်ကြာပြီးနောက် ဂါဇာ နယ်မြေရဲ့ ၈၄% အထိ ပျက်စီးသွားတယ်လို့ ကုလသမဂ္ဂက ခန့်မှန်းထားပါတယ်။ ကျန်ရှိနေတဲ့ ဓားစာခံအလောင်းတွေကို ပြန်လည်ရယူဖို့ အကောင်းဆုံးလုပ်ဆောင်နေပေမယ့် အပျက်အစီးတွေအောက်မှာ ရှာဖွေဖို့အခက်အခဲနဲ့ရင်ဆိုင်နေရတယ်လို့ ဟားမတ်စ်တို့က ပြောဆိုထားပါတယ်။
