နျူစွမ်းအင်သုံးဒုံးကျည်က မည်သည့်ကာကွယ်ရေးစနစ်ကိုမဆို ရှောင်ကွင်းနိုင်--ပူတင်

ရုရှားနိုင်ငံသည် နျူကလီးယားထိပ်ဖူးတပ်ဆင်နိုင်သည့် နျူကလီးယားစွမ်းအင်သုံး ဘူရက်ဗ်ဘက်စ်နစ်ခ် ခရုဇ်ဒုံးကျည်ကို အောင်မြင်စွာစမ်းသပ်နိုင်ခဲ့ကြောင်း၊ ယင်းလက်နက်သည် မည်သည့်ကာကွယ်ရေးစနစ်ကိုမဆို ရှောင်ကွင်းနိုင်ကြောင်း မော်စကိုက ပြောကြားခဲ့သည်။ အဆိုပါလက်နက်ကိုဖြန့်ကျက်ရန် ဆက်လက်ဆောင်ရွက်သွားမည်ဟု သမ္မတ ဗလာဒီမာပူတင်က တနင်္ဂနွေနေ့တွင် ပြောကြားခဲ့သည်။

အောက်တိုဘာလ ၂၁ ရက်နေ့က ဒုံးကျည်ကိုစမ်းသပ်ရာ၌ ဒုံးကျည်သည် အကွာအဝေး ၈,၇၀၀ မိုင်အထိ ပျံသန်းခဲ့ကာ ဝေဟင်တွင် ၁၅ နာရီကြာအထိ ရှိနေခဲ့သည်ဟု ရုရှားစစ်ဦးစီး အရာရှိချုပ် ရုရှားထိပ်တန်းဗိုလ်ချုပ်ကြီး ဗယ်လာရီ ဂါရာစီမော့ဗ်က ပူတင်ကို ပြောကြားခဲ့သည်။

နေတိုးအဖွဲ့က SSC-X-9 Skyfall ဟု အမည်ပေးထားသော 9M730 ခရုဇ်ဒုံးကျည်သည် အကန့်အသတ်မဲ့လုနီးပါးဖြစ်သော အကွာအဝေးနှင့် ကြိုတင်မခန့်မှန်းနိုင်သည့် ပျံသန်းရာလမ်းကြောင်းတို့ကြောင့် လက်ရှိနှင့် အနာဂတ် ဒုံးကျည်ကာကွယ်ရေးစနစ်များက သူ့ကိုဟန့်တားနိုင်စွမ်းမရှိကြောင်း ရုရှားက ပြောကြားခဲ့သည်။

ယင်းလက်နက်သည် ကမ္ဘာပေါ်တွင် မည်သူမျှ မပိုင်ဆိုင်သေးသော တုနှိုင်းမမီလက်နက်တစ်ခုဖြစ်သည်ဟု ယူကရိန်းစစ်ပွဲကို ကြီးကြပ်ရသော ဗိုလ်ချုပ်ကြီးများနှင့် ပြုလုပ်ခဲ့သည့် ကွပ်ကဲရေးဌာနအစည်းအဝေးတွင် ရှေ့တန်းစစ်မြေပြင်သုံး ယူနီဖောင်းကို ဝတ်ဆင်ထားသည့် ပူတင်က ပြောကြားခဲ့ကြောင်း တနင်္ဂနွေနေ့က ခရမ္မလင်၏ သတင်းထုတ်ပြန်ချက်၌ ဖော်ပြခဲ့သည်။

ရုရှားပညာရှင်အချို့က ထိုလက်နက်သည် လုံးဝဖြစ်နိုင်ဖွယ်ရာမရှိဟု တစ်ချိန်က သူ့ကိုပြောကြားခဲ့ကြသော်လည်း ယခုတွင်မူ လက်နက်၏ အရေးကြီးသောစမ်းသပ်မှုကို ပြီးမြောက်အောင်မြင်ခဲ့ပြီဟု ပူတင်က ပြောကြားခဲ့သည်။