နိုင်ငံ(၁၀)နိုင်ငံမှ ပြည်ပနိုင်ငံသား(၁၅၁)ဦးကို ထပ်မံဖော်ထုတ်ထိန်းသိမ်း
ကရင်ပြည်နယ်၊ မြဝတီမြို့နယ်၊ မဲထော်သလေးကျေးရွာအုပ်စုရှိ KK Park တွင်အလုပ်လုပ်ကိုင်နေရာမှ လုံခြုံရေးအဖွဲ့ဝင်များနှင့် BGF နယ်ခြားစောင့်တပ်များက ဝင်ရောက်ရှာဖွေစစ်ဆေးစဥ် ထွက်ပြေးတိမ်းရှောင်သွားခဲ့သည့် နိုင်ငံ(၁၀)နိုင်ငံမှ ပြည်ပနိုင်ငံသား(၁၅၁)ဦးကို ယနေ့ အောက်တိုဘာ ၂၄ ရက်က ထပ်မံဖော်ထုတ်ထိန်းသိမ်းနိုင်ခဲ့ကြောင်း သိရသည်။
KK Park မှထွက်ပြေးတိမ်းရှောင်လာသူများသည် မြဝတီမြို့ပေါ်ရပ်ကွက်၊ မဲထော်သလေးကျေးရွာအုပ်စု၊ ဖလူးကျေးရွာအုပ်စု၊ မင်းလက်ပံကျေးရွာနှင့် ထိုင်းနိုင်ငံ၊ မဲဆောက်မြို့တို့သို့ ထွက်ပြေးတိမ်းရှောင်လျက်ရှိ၍ ဖော်ထုတ်ထိန်းသိမ်းမှုများပြုလုပ်ခဲ့ခြင်းဖြစ်ကြောင်း သိရသည်။
ထိုသို့ ဖော်ထုတ်ထိန်းသိမ်းနိုင်ခဲ့ပြီးနောက် ၎င်းတို့အား သက်ဆိုင်ရာနိုင်ငံများသို့ ပြန်လည်လွှဲပြောင်း/လက်ခံ ဆောင်ရွက်ခြင်းမပြုမီ အမှတ်(၄)ရပ်ကွက်၊ မိုးလုံလေလုံအားကစားခန်းမ၌ထိန်းသိမ်းထားရှိကြောင်း သိရသည်။
၎င်းတို့၏ လုံခြုံရေး၊ ကျွေးမွေးရေး၊ အုပ်ချုပ်ထောက်ပံ့မှုစနစ်တကျရှိစေရေးတို့အတွက် မြဝတီခရိုင်စီမံခန့်ခွဲရေးနှင့် အုပ်ချုပ်ရေးကော်မတီဥက္ကဋ္ဌ၊ ခရိုင်အုပ်ချုပ်ရေးမှူးနှင့် တာဝန်ရှိသူများကကြည့်ရှုစစ်ဆေးခဲ့ကြကြောင်း သိရသည်။
