တူနီးရှားကမ်းလွန်မှာ စက်လှေနစ်မြုပ်လို့ ရွှေ့ပြောင်းနေထိုင်သူ ၄၀ ကျော်သေဆုံး
အောက်တိုဘာ ၂၄
တူနီးရှားကမ်းလွန်မှာ စက်လှေနစ်မြုပ်ပြီးနောက် ကလေးငယ်တွေအပါအဝင် ရွှေ့ပြောင်းနေထိုင်သူ ၄၀ ထက်မနည်းသေဆုံးခဲ့ပြိး ယခုနှစ်အတွင်း ဒေသတွင်းမှာ အဆိုးရွားဆုံး ရေကြောင်းမတော်ဆမှုဖြစ်တယ်လို့ အာဏာပိုင်တွေက ပြောပါတယ်။
ရွှေ့ပြောင်းနေထိုင်သူ ၇၀ ခန့်ကို တင်ဆောင်လာတဲ့ အဲဒီစက်လှေဟာ တူနီးရှားအလယ်ပိုင်း မာဒီယာ မြေထဲပင်လယ်ဆိပ်ကမ်းမှာ နစ်မြုပ်ခဲ့တာလို့ ဆိုပါတယ်။ လိုက်ပါသူအားလုံးဟာ ဆာဟာရအောက်ပိုင်း အာဖရိကဒေသလို့ အာဏာပိုင်တွေက ဆိုပေမယ့် အသေးစိတ်ကိုတော့ မပြောပါဘူး။
ဒီလမ်းကြောင်းဟာ အာဖရိကမှ ဥရောပကို မြေထဲပင်လယ်ကို ဖြတ်ကျော်ပြီး ရောက်ရှိဖို့ ကြိုးစားလေ့ရှိတဲ့ ရေလမ်းကြောင်းတခုဖြစ်ပါတယ်။ ကုလသမဂ္ဂရဲ့ အချက်အလက်တွေအရ ၂၀၂၃ ခုနှစ်အတွင်. မြေထဲပင်လယ်အလယ်ပိုင်းကို ဖြတ်ကျော်ဖို့ကြိုးပမ်းသူ နှစ်သိန်းတသောင်းကျော်ရှိတယ်လို့ ဆိုပါတယ်။
လူ ၆၀၀၀၀ ကျော်ကို ကြားဖြတ်ဖမ်းဆီးကာ အာဖရိကကမ်းခြေတွေကို ပြန်ပို့ခဲ့ပြီး နှစ်ထောင်နီးပါး သေဆုံးခဲ့ပါတယ်။ လက်ရှိ ဖြစ်ပွားခဲ့တဲ့ စက်လှေနစ်မြုပ်မှုမှာတော့ လူ ၃၀ ခန့်ကို ကယ်တင်နိုင်ခဲ့ပါတယ်။
စက်လှေနစ်မြုပ်မှု အကြောင်းရင်းနဲ့ အခြေအနေတွေကို စုံစမ်းစစ်ဆေးမှု စတင်နေတယ်လို့ တူနီးရှားအာဏာပိုင်တွေက ဆိုပါတယ်။ ဥရောပမှာ ပိုမိုကောင်းမွန်တဲ့ အခွင့်အလမ်းတွေကို ရှာဖွေဖို့ ပဋိပက္ခနဲ့ ဆင်းရဲမွဲတေမှုမှ ထွက်ပြေးလာတဲ့ ရွှေ့ပြောင်းနေထိုင်သူအရေးဟာလည်း နိုင်ငံတကာမှ ဖိအားတွေတိုးလာနေပါတယ်။
အာဖရိကနဲ့ ဥရောပကြားရှိ ပင်လယ်ရေကြောင်း ရွှေ့ပြောင်းနေထိုင်သူတွေအတွက် ကမ္ဘာပေါ်မှာ အန္တရာယ်အများဆုံး ရေလမ်းကြောင်းတခုဖြစ်ပါတယ်။ ပြီးခဲ့တဲ့ ဖေဖော်ဝါရီလက ဆူဒန်နိုင်ငံသား ၄၀ ကျော် လိုက်ပါလာတဲ့ စက်လှေတစီး တူနီးရှားနိုင်ငံ ဆဖက် မြို့အနီး နစ်မြုပ်ခဲ့ပါသေးတယ်။
