ဖားကန့်မှာ မြေစာပြိုလို့ လူနှစ်ယောက် သေဆုံးပြန်
အောက်တိုဘာ ၂၄
ဖားကန့်ဒေသ ၊ဆိုင်းတောင်ရွာအုပ်စု ၊ နမ့်မှော်ကျေးရွာရှိ ပအို့ဝ် မြေစာပုံဟောင်း လုပ်ကွက်မှာ မနေ့က အောက်တိုဘာ ၂၃ ရက်နေ့ ညနေပိုင်းက မြေစာပုံပြိုကျလို့ ရေမဆေးကျောက် ရှာဖွေသူအမျိုးသားနှစ်ယောက် သေဆုံးပြီး အမျိုးသားတယောက်ထိခိုက်ဒဏ်ရာရရှိမှုဖြစ်ပွား ခဲ့တယ်လို့သိရပါတယ်။
"ကျောက်ရှာနေချိန် မြေစာပုံကပြိုကျပြီး သူတို့အပေါ်ပိမိသွားတာပါ။ မြေစာပုံပြိုကျပြီးတော့ လူပိသွားတယ်ဆိုတာသိလို့ ကုမ္ပဏီဘက်က ဘက်ဟိုးကားနဲ့မြေစာ ဖော်ပေမယ့် အသက်မမီလိုက်ဘူး။ပွဲချင်းပြီးဆုံးသွားတယ်။ဒဏ်ရာရတဲ့ကောင်လေးက ခြေထောက်မှာပဲ ထိခိုက်မိတယ်။မစိုးရိမ်ရပါဘူး။ " လို့ ဖြစ်စဥ်သိသူ ဖားကန့်ဒေသခံကပြောပါတယ်။
မြေစာပုံပြိုကျမှုကြောင့် သေဆုံးသူအမျိုးသားနှစ်ယောက်မှာ အသက် ၃၀ ပတ်ချာလည်အရွယ်လောက်ဖြစ်ပြီး မိသားစုနဲ့ နေထိုင်ရာဇာတိကိုမသိရသေးတဲ့အတွက် မိသားစုနဲ့အဆက်အသွယ်မရသေးကြောင်း ၊ ထိခိုက်ဒဏ်ရာရတဲ့အမျိုးသားကတော့ အသက် ၁၄ နှစ်သာရှိသေးတယ်လို့သိရပါတယ်။
ဖားကန့်ဒေသမှာ ရေမဆေးကျောက်ရှာဖွေနေသူတွေထဲမှာ ဒေသခံတွေပါသလို အခြားဒေသတွေကနေလည်း အများအပြားလာရောက်ပြီး ကျောက်ရှာဖွေမှုရှိနေတာဖြစ်တယ်လို့သိရပါတယ်။
အောက်တိုဘာ ၁၄ ရက်ကလည်း ဖားကန့်ဒေသရှိ
ကုဋေလုပ်ကွက်ဟောင်းတခုမှာ လက်ကျင်းတူးရာမှ ခြေချော်ကျပြီး အမျိုးသားတယောက် ရေနစ်သေဆုံးမှု ရှိခဲ့တယ်လို့သိရပါတယ်။
အောက်တိုဘာ ၃ ရက်နေ့ကလည်း ဖားကန့်၊ မှော်စီစာကျေးရွာ၊ သာယာကုန်းမှာ ကျောက်စိမ်းလုပ်ကွက်ရှိ မြေစာပုံပြိုမှုကြောင့် အမျိုးသားတယောက် သေဆုံးပြီး အမျိုးသားတယောက် ထိခိုက် ဒဏ်ရာရရှိခဲ့ပါတယ်။
ဇူလိုင် ၂၁ ရက်နေ့ကလည်း ဖားကန့် ၊မှော်စီစာ ၊တောင်ယာကုန်းရှိ စိန်စိန် ဂျိတ်ပါဝါကြော လုပ်ကွက်မှာ မြေပြိုကျမှုဖြစ်ပွားပြီး ကျောက်ရှာဖွေသူအပါအဝင် သေဆုံးသူ ၁၇ ယောက်ထက်မနည်း ရှိနေ တယ်လို့ သိရပါတယ်။
ဇွန် ၂၀ ရက်ကလည်း ဖားကန့်မြို့နယ်၊ မှော်ရှန်ကုန်းကျေးရွာက ကျောက်စိမ်းလုပ်ကွက်မှာ စွန့်ပစ်မြေစာ ပြိုကျမှုကြောင့် ရေမဆေးကျောက် ရှာဖွေတဲ့ ညီအစ်ကိုနှစ်ယောက် သေဆုံးမှုရှိခဲ့ပါတယ်။
ဇန်နဝါရီ ၁၃ ရက်ကလည်း ဖားကန့်၊ ဆိပ်မူကျေးရွာအုပ်စု၊ စပေါ့ကျေးရွာက ကျောက်စိမ်းတွင်းဟောင်းမှာ နွံပေါက်ကျမှုဖြစ်ပွားပြီး သေဆုံးသူ အယောက် ၃၀ ကျော် ရှိခဲ့တယ်လို့သိရပါတယ်။
၂၀၂၄ ခုနှစ်၊ နိုဝင်ဘာ ၁၀ ရက်နေ့ကလည်း မှော်စီစာကျေးရွာ၊ အောင်သာယာရပ်ကွက်ရှိ ဒေသအခေါ် တင်အောင်ကြိုင်လုပ်ကွက်မှာ မြေစာပုံ ပြိုကျခဲ့မှုကြောင့် မြေစာသွန်တဲ့ ကားနှစ်စီးနဲ့ ကျောက်ရှာဖွေသူ ၁၀ ယောက်ထက်မနည်း ရေကန်အတွင်း ပြုတ်ကျ ပျောက်ဆုံးမှု ဖြစ်ပွားခဲ့ပါသေးတယ်။
၂၀၂၃ ခုနှစ်၊ ဇွန်လ ၁၃ ရက်နေ့ကလည်း ဖားကန့်မြို့နယ်၊ အေးမြသာယာအုပ်စု၊ မနမှော်က ကျောက်စိမ်းတူးတဲ့ လုပ်ကွက်ဟောင်းမှာ မြေပြိုမှု ဖြစ်ပွားခဲ့ပြီး ရေမဆေးကျောက် ရှာဖွေသူ အယောက် ၃၀ ကျော် သေဆုံးခဲ့ရပါတယ်။
ဒါအပြင် ၂၀၂၀ ခုနှစ်၊ ဇူလိုင်လအတွင်း ဖြစ်ပွားခဲ့တဲ့ ဝှေခါကျေးရွာက ကျောက်စိမ်းလုပ်ကွက် ကမ်းပါးပြိုကျမှုမှာလည်း ရေမဆေးကျောက်ရှာဖွေသူ ၁၇၀ ကျော် နွံနစ်သေဆုံးခဲ့ပြီး အသေအပျောက် အများဆုံး ဖြစ်ခဲ့ပါတယ်။
