လစ်သူယေးနီးယား လေပိုင်နက်အတွင်း ရုရှားစစ်လေယာဉ်တွေ ချိုးဖောက်ဝင်ရောက်
အောက်တိုဘာ ၂၄
ရုရှား စစ်လေယာဉ်နှစ်စင်း လေပိုင်နက်အတွင်း ချိုးဖောက်ဝင်ရောက်ခဲ့မှုနဲ့ပတ်သက်၍ လစ်သူယေးနီးယားက ရှုတ်ချလိုက်ပါတယ်။ ဒါပေမယ့်လည်း ရုရှားကတော့ ဒီစွပ်စွဲချက်တွေကို ပယ်ချထားပါတယ်။
ကြာသပတေးနေ့မှာ ရုရှားရဲ့ Sukhoi-30 တိုက်လေယာဉ်တစင်းနဲ့ Ilyushin-78 လေကြောင်းလောင်စာဆီဖြည့် လေယာဉ်တစင်းတို့ဟာ လစ်သူယေးနီးယားလေပိုင်နက်ထဲကို မီတာ ၇၀၀ ခန့် ပျံသန်းခဲ့ပြီး ၁၈ စက္ကန့်ကြာ ရှိနေခဲ့တယ်လို့ လစ်သူယေားနီးယားက စွပ်စွဲထားပါတယ်။
ရုရှားလေယာဉ်နှစ်စင်းဟာ လစ်သူယေးနီးယားနဲ့ နယ်နိမိတ်ချင်းထိစပ်ပြီး ဘောလ်တစ်ပင်လယ်ကို မျက်နှာမူထားတဲ့ ရုရှားပိုင်နက်တခုဖြစ်တဲ့ ကာလီနင်ဂရက်ကနေ လေပိုင်နက်ထဲသို့ ဝင်ရောက်ခဲ့တာလို့ လစ်သူယေးနီးယား စစ်တပ်တာဝန်ရှိသူတွေက ပြောပါတယ်။
အခြေအနေအပေါ် တုံ့ပြန်တဲ့အနေနဲ့ နေတိုးတိုက်လေယာဉ်နှစ်စင်းကို အရေးပေါ်စေလွှတ်ခဲ့တယ်လို့ ဆိုပါတယ်။ လစ်သူယေးနီးယားသမ္မတကတော့ ဒီကိစ္စအပေါ် ရုရှားကို ရှုတ်ချထားပြီး ဒါဟာ နိုင်ငံတကာဥပဒေနဲ့ လစ်သူယေးနီးယား အချုပ်အခြာအာဏာကို ပြင်းပြင်းထန်ထန် ချိုးဖောက်တာဖြစ်ကာ ဒီကိစ္စကို တုံ့ပြန်မယ်လို့ ဆိုပါတယ်။
ရုရှားကာကွယ်ရေးဝန်ကြီးဌာနကတော့ ဒီစွပ်စွဲချက်တွေကို ပယ်ချထားပြီး လေယာဉ်တွေဟာ ကာလီနင်ဂရက်ဒေသပေါ်မှာ စီစဉ်ထားတဲ့အတိုင်း လေ့ကျင့်ရေးပျံသန်းမှုတွေ ပြုလုပ်ခဲ့တယ်လို့ ဆိုပါတယ်။
"လေယာဉ်တွေဟာ ပျံသန်းမှုလမ်းကြောင်းမှ သွေဖည်ခြင်းလည်းမရှိ၊ အခြားနိုင်ငံတွေရဲ့ နယ်နိမိတ်တွေကိုလည်း ချိုးဖောက်ခြင်းမရှိပါ" လို့ပြောပါတယ်။
နောက်ထပ်ဘောလ်တစ်နိုင်ငံဖြစ်တဲ့ အက်စ်တိုးနီးယားက ပြီးခဲ့တဲ့လက ရုရှားတိုက်လေယာဉ်သုံးစင်း လေပိုင်နက်ကို ချိုးဖောက်ခဲ့ကြောင်း ပြောပါတယ်။ ပိုလန်နဲ့ ရိုမေးနီးယားတို့ကလည်း ရုရှားဒရုန်းတွေ လေပိုင်နက်အတွင်း ကျူးကျော်ဝင်ရောက်ခဲ့တယ်လို့ မကြာသေးမီကထုတ်ဖော်ပြောကြားထားပါတယ်။
