အမြင်ကျဉ်းမြောင်းမှုများကြောင့် အမေရိကန်လာလီဂါပွဲ ဖျက်သိမ်းလိုက်ရကာ အခွင့်အရေးတစ်ရပ် ဆုံးရှုံးလိုက်ရ
=====================
လာလီဂါအကြီးအကဲဂျာဗီးယားတီဘက်စ်က အမေရိကန်တွင် ကစားမယ့် ဗီလာရီးရဲလ်နှင့် ဘာစီလိုနာတို့ရဲ့ လာလီဂါပွဲ ဖျက်သိမ်းလိုက်ရမှုမှာ လာလီဂါပြိုင်ပွဲအတွက် ကြီးမားတဲ့ ဆုံးရှုံးနစ်နာမှုတစ်ခုဖြစ်ကြောင်း ပြောကြားလာပါတယ်။
ဩဂုတ်လတုန်းက စပိန်ဘောလုံးအဖွဲ့ချုပ်ဟာ ဒီဇင်ဘာလ ၂၀ ရက်နေ့ ဗီလာရီးရဲလ်နှင့် ဘာစီလိုနာတို့ရဲ့ လာလီဂါပွဲစဉ်အား မိုင်ယာမီရှိ Hard Rock Stadium တွင် ကစားရန် ခွင့်ပြုချက်ပေးခဲ့ပါတယ်။
ဒါပေမယ့် ပြီးခဲ့တဲ့အပတ် လာလီဂါပွဲစဉ်များအားလုံးတွင် ကစားသမားများဟာ ပွဲအစ ၁၅ စက္ကန့်ကို မကစားဘဲ နိုင်ငံခြားတွင် ကစားမယ့် လာလီဂါပွဲအား ဆန့်ကျင်သပိတ်မှောက်လာမှုနှင့်အတူ ယင်းပွဲအား ဖျက်သိမ်းလိုက်ရပြီ ဖြစ်ပါတယ်။
ဘီတက်စ်က "ဒီကနေ့မှာ စပိန်ဘောလုံးလောကဟာ အသာစီးရမယ့် အခွင့်အရေး၊ တစ်ကမ္ဘာလုံးသိလာမယ့် စီမံကိန်း၊ အနာဂတ်မှာ သန်မာလာမယ့် အခွင့်အရေး ဆုံးရှုံးခဲ့ရတယ်။ ကျဉ်းမြောင်းတဲ့ အမြင်နဲ့ အစဉ်အလာကို ကာကွယ်ကြတယ်။ စိတ်အမြင်ကျဉ်းတယ်။ ဥရောပဘောလုံးလောကရဲ့ စစ်မှန်တဲ့ အစဉ်အလာက အစိုးရအဖွဲ့အစည်းတွေရဲ့ ဆုံးဖြတ်ချက်တွေကြောင့် တစ်နှစ်ပြီးတစ်နှစ် ဖျက်ဆီးလာတယ်။ နိုင်ငံလိဂ်ကလည်း တစ်နှစ်ပြီးတစ်နှစ် ပျက်စီးလာနေတယ်။ လာလီဂါဟာ ဒါတွေကို ဘယ်လိုပဲ ဖျက်ဆီးလာပါစေ အလုပ်၊ ခိုင်မာမှု၊ ယုံကြည်မှုတွေနဲ့ ဆက်ပြီး ကြံ့ကြံ့ခံသွားမယ်။ ဒါပေမယ့် အစဉ်အလာကို အစဉ်သဖြင့် လေးစားပြီး ရေရှည်တည်တန့်အောင် လုပ်သွားမယ်"လို့ ဆိုသွားပါတယ်။
ဆက်လက်ပြီး တီဘက်စ်က စပိန်ဘောလုံးလောကမှာ အကြောက်တရားကင်းကင်းဖြင့် ရည်မှန်းချက်ကြီးကြီးဖြင့် ရှေ့ဆက်သွားမှာ ဖြစ်ပြီး နောင်တွင်လည်း နိုင်ငံခြားတွင် လိဂ်ပွဲဆက်ကစားနိုင်ရေး လုပ်ဆောင်သွားမယ်လို့ ဆိုသွားပါတယ်။
တဖက်တွင် အေစီမီလန်နှင့် ကိုမိုတို့ရဲ့ စီးရီးအေပွဲစဉ်ကိုတော့ ဖေဖော်ဝါရီလတွင် ဩစတြေးလျတွင် ကစားလာပါဦးမယ်။
