ဗီလာရီးရဲလ်နှင့် ချန်ပီယံလိဂ်ပွဲစဉ်မတိုင်မီ မန်စီးတီးပရိသတ် သေဆုံး
=====================
မန်စီးတီးပရိသတ်တစ်ဦးဟာ စပိန်တွင် ဗီလာရီးရဲလ်နှင့် ချန်ပီယံလိဂ်ပွဲစဉ်မတိုင်မီ ကွယ်လွန်သွားခဲ့ပါတယ်။
အသက် ၃၅ နှစ်ရှိ ဂိုင်းဘရက်ရှောဟာ သူငယ်ချင်းများနှင့်အတူ အင်္ဂါနေ့ည ဗီလာရီးရဲလ်နှင့် ချန်ပီယံလိဂ်ပွဲတွင် မန်စီးတီးအား အားပေးရန် ဘီနီဒွမ်သို့ ရောက်နေခဲ့တာပါ။
ဒါပေမယ့် ဝှိုက်သန်ရှာဝီမှ မန်စီးတီးကို ရာသက်ပန်အားပေးလာတဲ့ ပရိသတ်ကို အင်္ဂါနေ့ နံနက်ပိုင်းတွင် အခန်းအတွင်းတွင် သေဆုံးလျက်သား သူငယ်ချင်းများက တွေ့ရှိခဲ့ရပါတယ်။
လက်ရှိအချိန်တွင် ကလေးတစ်ဦးအဖေကို ဘယ်လိုအကြောင်းကြောင့် သေဆုံးသွားတယ်ဆိုတာ မသိရသေးပါဘူး။
ဒါပေမယ့် မိသားစုဝင်များရဲအ့ဆိုအရ ဂိုင်း သေဆုံးမှုတွင် မည်သည့်ပယောဂမှ ပါဝင်တဲ့ သံသယဖြစ်စရာအကြောင်းရင်း မတွေ့ရပါဘူး။
သူ့အဖေဖြစ်သူ မာတင်မှာလည်း ယင်းနေ့တွင် စပိန်သို့ သွားရောက်ကာ သားဖြစ်သူနှင့်အတူ မန်စီးတီးပွဲကြည့်ရန် စီစဉ်ထားတာပါ။
ဂိုင်းမှာ ခရီးသွားအာမခံ လုပ်ဆောင်ထားခြင်း မရှိမှုနှင့်အတူ သူ့ရုပ်အလောင်းအား မိသားစုဝင်များက အင်္ဂလန်သို့ ပြန်လည်ခေါ်ဆောင်ရေး အခက်တွေ့နေပါတယ်။
မိသားစုဝင်များဟာ ဂိုင်းရဲ့ ဈာပနအတွက် GoFundMe တွင် အကောင့်ဖွင့်လှစ်ကာ အကူအညီများ တောင်းထားပါတယ်။
ယင်းစာမျက်နှာမှ ရရှိတဲ့ ကူငွေများဖြင့် ဂိုင်းရဲ့ ရုပ်အလောင်းကို ဗြိတိန်သိ့ သယ်ဆောင်ရေး၊ ဈာပနချရေးတို့အတွက် အသုံးပြုသွားမှာလည်း ဖြစ်ပါတယ်။
မန်စီးတီးဟာ အင်္ဂါနေ့တုန်းက ဗီလာရီးရဲလ်နှင့်ပွဲတွင် ၂-၀ ဂိုးဖြင့် အနိုင်ရရှိကာ ၉ ပွဲဆက် ရှုံးပွဲမရှိမှတ်တမ်း ရရှိခဲ့ပါတယ်။ ယင်းပွဲတွင် ဂိုးသွင်းခဲ့တဲ့ အာလင်းဟာလန်းမှာ ခရစ္စတီယာနိုရော်နယ်ဒိုရဲ့ ကလပ်နှင့် နိုင်ငံအတွက် ၁၁ ပွဲဆက် ဂိုးသွင်းနိုင်တဲ့ မှတ်တမ်းအား လိုက်မီလာပါတယ်။
