ထရမ့်သည် ရုရှားကို စစ်ကြေညာလိုက်သည့် သဘောဆောင်နေပြီဟု မက်ဗီဒက်ဗ်ဆို
အမေရိကန်သမ္မတ ဒေါ်နယ်လ် ထရမ့်သည် ရုရှားကို စစ်ကြေညာလိုက်သည့် သဘောပင်ဖြစ်ကြောင်း ရုရှားသမ္မတဟောင်း ဒီမီထရီ မက်ဗီဒက်ဗ်ကပြောကြားလိုက်သည်။
အမေရိကန်ဘဏ္ဍာရေးဌာနက ရုရှားရေနံကုမ္ပဏီနှစ်ခုအပေါ် ပိတ်ဆို့အရေးယူမှုများ ကြေညာပြီးနောက် တစ်ရက်အကြာ ကြာသပတေးနေ့တွင် မက်ဗီဒက်ဗ်က ယခုကဲ့သို့ ပြောကြားခြင်းဖြစ်ပြီး၊ ရုရှားနိုင်ငံအနေဖြင့် သမ္မတထရမ့်နှင့် "အဓိပ္ပာယ်မရှိသော" ငြိမ်းချမ်းရေး ဆွေးနွေးပွဲများအတွက်လည်း စိုးရိမ်စရာ မလိုတော့ကြောင်း ပြောကြားခဲ့သည်။
"ထရမ့်ရဲ့ ဆုံးဖြတ်ချက်တွေဟာ ရုရှားကို ဆန့်ကျင်တဲ့ စစ်ပွဲတစ်ရပ်ပါပဲ။ အခုဆိုရင် ထရမ့်ဟာ ဥရောပနဲ့ လုံးဝကို ပေါင်းစည်းသွားပြီ" ဟု သူက ထပ်လောင်းပြောကြားသည်။
လက်ရှိတွင်လည်း ရုရှားလုံခြုံရေးကောင်စီ၏ ဒုတိယဥက္ကဋ္ဌဖြစ်သူ မက်ဗီဒက်ဗ်က Telegram ပို့စ်တစ်ခုတွင် "အမေရိကန်ဟာ ကျွန်တော်တို့ရဲ့ ရန်သူဖြစ်ပြီး၊ သူတို့ရဲ့ စကားများတဲ့ ‘ငြိမ်းချမ်းရေး ဖော်ဆောင်သူ’ ဟာ အခုဆိုရင် ရုရှားကို တင်းတင်းမာမာ ဆန့်ကျင်တဲ့ စစ်ခရီးလမ်းကို လုံး၀ လိုက်ပါသွားပြီ" ဟု ရေးသားခဲ့သေးသည်။
"တချို့ကတော့ ကွန်ဂရက်ရဲ့ဖိအားတွေကြောင့် သူအခုလိုလုပ်ဖို့ အခြားရွေးချယ်စရာမရှိဘူးလို့ ပြောကြမှာပေါ့၊ ဒါပေမဲ့ အရေးအကြီးဆုံးအချက်ကိုတော့ မပြောင်းလဲနိုင်ပါဘူး" ဟု မက်ဗီဒက်ဗ်က ပြောသည်။
"ထရမ့်ရဲ့ ဒန်းစီးသလို လှုပ်ရှားမှုရဲ့ ဆိုလိုရင်းကတော့ ရုရှားအနေနဲ့ ယူကရိန်းကို လက်နက်အမျိုးမျိုးနဲ့ ပစ်ခတ်ဖို့အတွက် မလိုအပ်တဲ့ ညှိနှိုင်းမှုတွေကို ထည့်စဉ်းစားစရာမလိုတော့ဘူး လို့ ရိုးရှင်းစွာ အဓိပ္ပာယ်သက်ရောက်တယ်"ဟုလည်း မက်ဗီဒက်ဗ်က ပြောကြားခဲ့သည်။
မက်ဗီဒက်ဗ်၏ မှတ်ချက်များကို ခရမ်လင်နန်းတော်မှ ယခုအချိန်အထိတရားဝင် မှတ်ချက်ပြုခြင်း မရှိသေးပေ။
