◾️ရုရှားရေနံကုမ္ပဏီများအပေါ် ထရန့်တားဆီးပိတ်ပင်မှု ပူတင်ရှုတ်ချ
ယူကရိန်းစစ်ပွဲကို အဆုံးသတ်ရေးကရင်မလင်ခေါင်း ဆောင်အား ဖိအားပေးရန် အမေရိကန် သမ္မတ ဒေါ်နယ်ထရန့်က ရုရှားနိုင်ငံ၏ အကြီးဆုံးရေနံကုမ္ပဏီကြီးနှစ်ခုအား တားဆီးပိတ်ပင်မှုများ ချမှတ်ခဲ့ခြင်းကို ရုရှားသမ္မတ ဗလာဒီမာပူတင်က ရှုတ်ချလိုက်သည်။
ထရန့်၏ ပိတ်ဆို့မှုများကြောင့် ကမ္ဘာ့ရေနံဈေးနှုန်းကို ၅ ရာခိုင် နှုန်းမြင့်တက်သွားစေခဲ့ကြောင်း သိရသည်။
တားဆီးပိတ်ဆို့မှုများအား မိတ်ဆွေမဆန်သောလုပ်ရပ်ဟု မစ္စတာပူတင်က ပြောကြားသော်လည်း ယင်းပိတ်ဆို့မှုများကြောင့် ရုရှားစီးပွားရေးကို ထိခိုက်မည်မဟုတ်ကြောင်း နှင့် ကမ္ဘာ့ဈေးကွက်တွင် ရုရှား၏ အရေးပါမှုကို ၎င်းက မြှင့်တင်ပြောဆိုခဲ့သည်။
ကမ္ဘာ့ဈေးကွက်သို့ ရေနံပေးပို့မှု သိသာစွာကျဆင်းသွားခဲ့ပါက ဈေးနှုန်းများ မြင့်တက်လာမည်ဖြစ်၍ အမေရိကန်ကဲ့သို့ နိုင်ငံများအတွက် အဆင်ပြေနိုင်မည် မဟုတ်ကြောင်း ပူတင်က ပြောသည်။
“ ဒါဟာ ရုရှားနိုင်ငံအပေါ် ဖိအားပေးဖို့ ကြိုးစားတာဖြစ်ပါတယ်။ ကိုယ့်ကိုယ်ကိုယ် လေးစားတဲ့ ဘယ်နိုင်ငံ၊ ဘယ်လူ မျိုးကမှ ဖိအားပေးထားချိန်မှာ ဘာကိုမှ ဆုံးဖြတ်မှာမဟုတ်ပါဘူး။” ဟု ပူတင်က ပြောသည်။
တားဆီးပိတ်ဆို့မှုအသစ်များက ကြီးမားသောသက်ရောက်မှုရှိမည်မဟုတ်ကြောင်း ပူတင်၏မှ တ် ချက်နှင့်ပတ်သက် ၍ မေးမြန်းချိန်တွင် ဒေါ်နယ်ထရန့်က “ သူအဲဒီလို ထင်တဲ့အတွက် ဝမ်းသာပါတယ်။ ကောင်းပါတယ်။ အခုကစပြီးနောက်ခြောက်လနေရင် အဲဒီ ကိစ္စကို ပြန်ပြောပါမယ်။” ဟု သတင်းထောက်များအား ပြောကြားသည်။
အမေရိကန်၏ တားဆီးပိတ်ပင်မှုများကြောင့် ရုရှားရေနံများဝယ်ယူခြင်းအား ရေတိုကာလတွင် ဆိုင်းငံ့ထားရန် တ ရုတ်အစိုးရရေနံလုပ်ငန်းများက ဆုံးဖြတ်ထားကြောင်း ကုန်သွယ်ရေးသတင်းရင်းမြစ်များက ရိုက်တာ သတင်းဌာနကို ပြောကြားသည်။
ပင်လယ်ရေကြောင်းမှလာသော ရုရှားရေနံများကို အများဆုံးဝယ်ယူနေသည့် အိန္ဒိယရေနံချ က်လုပ် ငန်း များကလည်း ရုရှားရေနံစိမ်းတင်သွင်းမှုကို သိသိသာသာ လျှော့ချလိုက်သည်။
အမေရိကန်၏ တားဆီးပိတ်ဆို့မှုများက ရုရှားရေနံလုပ်ငန်းကြီးများဖြစ်သော Rosneft နှင့် Lukoil တို့ကို ပစ်မှတ်ထားခဲ့ပြီး အဆိုပါကုမ္ပဏီနှစ်ခုက ကမ္ဘာ့ရေနံ ၅ ရာခိုင်နှုန်းကို ထုတ်လုပ်ပေးနေသည်။
ယူကရိန်းစစ်ပွဲကို အဆုံးသတ်ရေးကြိုးစားရန် မကြာမီဘူဒါပက်စ်မြို့တွင် ရုရှားခေါင်းဆောင်နှင့် တွေ့ဆုံ သွားမည်ဖြစ် ကြောင်း ပြီးခဲ့သည့် သီတင်းပတ်ကပင် ပြောကြားခဲ့သော ဒေါ်နယ်ထရန့်ကလည်း ဒရာမာဆန်ဆန် နောက်ကြောင်းပြန်ကာ တားဆီးပိတ်ဆို့မှုများ ချမှတ်ခြင်းဖြစ်သည်။
ယင်းလုပ်ရပ်ကြောင့် ရေတိုကာလတွင် ရုရှားအပေါ် ဘဏ္ဍာရေးအရရိုက်ခတ်မှု အကန့်အ သတ် နှင့်သာဖြစ်ပေါ်နိုင်သော်လည်း ရုရှားအား ငွေရေးကြေးရေး ကျပ်တည်းအောင်လုပ်ပြီး သုံးနှစ်ခွဲကြာ ယူကရိန်းစစ်ပွဲ ငြိမ်းချမ်းရေး သဘောတူညီမှုအတွက် ကရင်မလင်အား စားပွဲဝိုင်းသို့ ရောက်လာစေရေး ဖိအားပေးရန် ဒေါ်နယ်ထရန့်၏ ရည်မှန်းချက်ကို ပြသနေကြောင်း သတင်းက ဖော်ပြသည်။
စစ်ပွဲအား အလှည့်အပြောင်းဖြစ်စေရန် အမေရိကန်နှင့် ဥရောပမဟာမိတ်များထံမှ တာဝေးပစ်ဒုံးကျည်များ ရရှိရန် ကိဗ် က ကြိုးစားနေခြင်းကိုလည်း ပူတင်က သတိပေးခဲ့ကာ ရုရှားအတွင်းပိုင်းအထိ တိုက်ခိုက်လာမှုများအပေါ် မော်စကို၏တုံ့ပြန်မှုသည် အလွန်ပြင်းထန်လေးနက်မည်ဖြစ်ကြောင်း သတိပေးပြောကြားသည်။
ထိုအတောအတွင်းမှာပင် မိမိတို့ လိုချင်သောရလဒ် မရနိုင်ခြင်းကြောင့် သမ္မတပူတင်နှင့်အစည်းအဝေးကို အမေရိကန် က ဖျက်သိမ်းလိုက်ခြင်းဖြစ်ကြောင်း ဒေါ်နယ်ထရန့် က ဗုဒ္ဓဟူးနေ့တွင်ပြောကြားသည်။
“သမ္မတပူတင်နဲ့ တွေ့ဆုံတာကို ကျွန်တော်တို့ကဖျက်သိမ်းလိုက်တာဖြစ်ပါတယ်။ လုပ်သင့်တယ်လို့ ကျွန်တော့်ဘက်က မခံစားရဘူး။ ကျွန်တော်တို့ လိုချင်တဲ့နေရာ ရောက်မယ်လို့ မခံစားရဘူး။ ဒါကြောင့် ဖျက်သိမ်းလိုက်တာပါ။ နောင်ကျရင် ကျွန်တော်တို့ တွေ့ပါဦးမယ်။” ဟု ဒေါ်နယ်ထရန့်က အိမ်ဖြူတော်တွင် ပြောကြားသည်။
ထိပ်သီးဆွေးနွေးပွဲကို ရွှေ့ဆိုင်းလိုက်သည်ဟု ထရန့်က ဆို လိုခြင်းဖြစ်ပုံရကြောင်းပူတင်က ပြောကြားသည်။
ခေါင်းဆောင်နှစ်ဦးသည် ဩဂုတ်လက အမေရိကန်နိုင်ငံ ၊အလာစကာပြည်နယ်၌ တွေ့ဆုံခဲ့ကြသည်။
သတင်း-ရဲမင်း
ကိုးကား-Reuters
#နိုင်ငံတကာသတင်း
