ယူနိုက်တက်သို့ မပြန်တော့ဘဲ ဘာစီလိုနာတွင် ကာလရှည်ကြာ ကစားလိုကြောင်း လူသိရှင်ကြားဖွင့်ဟလာတဲ့ မားကပ်စ်ရက်ဖို့ဒ်
========================
မားကပ်စ်ရက်ဖို့ဒ်က ဘာစီလိုနာသို့ အပြီးသတ် ပြောင်းရွှေ့လိုကြောင်း ပြောကြားကာ ယူနိုက်တက်သို့ မပြန်လိုကြောင်း ဖွင့်ဟ ပြောကြားလာပါတယ်။
မားကပ်စ်ရက်ဖို့ဒ်ဟာ နွေရာသီတုန်းက ဘာစီလိုနာသို့ တစ်ရာသီအငှားဖြင့် ပြောင်းရွှေ့လာခဲ့သူ ဖြစ်ပြီး စာချုပ်အတွင်းတွင် ပေါင်သန်း ၃၀ ဖြင့် အပြီးသတ်ပြောင်းရွှေ့နိုင်မယ့်အချက်ကိုလည်း ထည့်သွင်းချုပ်ဆိုထားပါတယ်။
ရက်ဖို့ဒ်ဟာ ၂၀၂၂-၂၃ ရာသီတွင် ယူနိုက်တက်ကစားသမားဘဝ အကောင်းဆုံးရာသီအဖြစ် ဂိုး ၃၀ အထိ သွင်းယူနိုင်ခဲ့ပြီးနောက် ၂၀၂၈ ခုနှစ်အထိ စာချုပ်သစ်ချုပ်ခဲ့ပါတယ်။
ယင်းနောက်ပိုင်းမှာတော့ ရက်ဖို့ဒ်ဟာ ကွင်းတွင်း/ကွင်းပြင်ပြဿနာရပ်များနှင့် ရင်ဆိုင်လာရပြီး နည်းပြအဲရစ်တန်ဟက်၊ နည်းပြရူဘင်အမိုရမ်တို့နှင့် အဆင်မပြေဖြစ်ကာ ယခုနှစ် အစောပိုင်းတုန်းက ဗီလာသို့ အငှားဖြင့် ပြောင်းကစားခဲ့ရပါတယ်။
သူဟာ ဘာစီလိုနာသို့ ရောက်လာချိန်မှာတော့ ပြိုင်ပွဲအရပ်ရပ် ၁၂ ပွဲကစားထားရာမှာ ၅ ဂိုးသွင်းပြီး ၆ ကြိမ် ဖန်တီးမှု ပြုလုပ်ထားနိုင်ပါတယ်။ သူဟာ ဘာစီလိုနာတွင် ခြေစွမ်းပြနိုင်မှုနှင့်အတူ သောမတ်စ်တူချယ်ရဲ့ အင်္ဂလန်အသင်းတွင်လည်း ပါဝင်ခွင့်ရလာခဲ့ပါတယ်။
ရက်ဖို့ဒ်က "စပိန်မှာ နေရတာ အရမ်းပျော်တယ်။ ရာသီဥတုကတော့ အကောင်းဆုံးအစိတ်အပိုင်းတစ်ရပ်ပေါ့။ ဒါက တကယ့်ကို ကြီးမားတဲ့ အပြောင်းအလဲပါ။ နေ့တိုင်း သင်ယူနေတယ်။ အရမ်းပျော်တယ်။ ဒီမှာ အကြာကြီး ဆက်နေရဖို့ မျှော်လင့်တယ်။ ရွန်းနီ(ဘတ်ဂီ)၊ ဂျူးစ်(ခွန်ဒီ)၊ ဖရန်ကီ(ဒီယွန်)တို့နဲ့လည်း အရမ်းအဆင်ပြေတယ်။ အားလုံးရောယှက်စုစည်းထားတဲ့အသင်းတစ်သင်းပါ။ ကျွန်တော်တို့က စည်းလုံးတယ်။ ဒီအသင်းက အရမ်းကောင်းတယ်။ သင့်တော်တဲ့နေရာကို ရောက်လာတာပါ။ ဒီအတိုင်း ဆက်ကြိုးစားမယ်။ အကောင်းဆုံးဆက်ပြီး ကြိုးစားမယ်။ ဒီရာသီမှာ လုပ်စရာအများကြီးကျန်သေးတယ်"လို့ ပြောကြားသွားပါတယ်။
ဆက်လက်ပြီး ရက်ဖို့ဒ်က "ဒီဘောလုံးကလပ်မှာ ပျော်တယ်။ ဒီမှာ ရှိတဲ့လူတိုင်း ဘောလုံးကို ချစ်ကြတယ်။ ဘောလုံးသမိုင်းမှာ အကောင်းဆုံးကလပ်ထဲက တစ်ခုဖြစ်တဲ့ ဘာစီလိုနာအတွက် ကစားခွင့်ရတာ ဂုဏ်ယူစရာပါ။ သူတို့ ဖြစ်ချင်တာ ဖြစ်နိုင်တယ်။ ဘာစီလိုနာရဲ့အလားအလာကို ပြောတာ ပထမဆုံးအကြိမ်မဟုတ်ပါဘူး။အတိတ်တုန်းကလည်း ဒီအတိုင်းပဲ။ အခု ဖြစ်လာအောင် လုပ်ဖို့ ကျွန်တော့်မှာ အခွင့်အရေး ရနေပြီ။ အခု ပစ္စုပ္ပန်လို ကာလမရှိခဲ့ဘူးလို့တောင် ခံစားရတယ်"လို့ ပြောကြားသွားပါတယ်။
ဒါ့အပြင် မားကပ်စ်ရက်ဖို့ဒ်က ဘာစီလိုနာတွင် ကစားစဉ်အတွင်း ဘာသာစကား ပြဿနာ မကြုံရကြောင်းလည်း ဆိုသွားပါတယ်။
မားကပ်စ်ရက်ဖို့ဒ်ဟာ လာမယ့်တနင်္ဂနွေနေ့တွင် ဘာစီလိုနာကစားသမားဘဝ ပထမဆုံး El Clasico ပွဲစဉ်အဖြစ် ဘာနေဗျူးကွင်းသို့ သွားရောက်ကာ ရီးရဲလ်မက်ဒရစ်နှင့်ရင်ဆိုင်ကစားရပါမယ်။
