အစားအသောက်တွင် ဖော်မလင် ထည့်ပါက အရေးယူမည်ဟု FDA အသိပေး
အစားအသောက်မှာ တားမြစ်ဓာတုပစ္စည်း ဖော်မလင် (Formalin) ထည့်သွင်းသုံးစွဲတဲ့ ထုတ်လုပ်၊ ဖြန့်ဖြူး၊ ရောင်းချသူတွေကို အမျိုးသားအစားအသောက်ဥပဒေ ပုဒ်မ ၂၈ (က) နဲ့ အရေးယူမယ်လို့ အစားအသောက်နှင့် ဆေးဝါးကွပ်ကဲရေးဦးစီးဌာန (FDA) က အသိပေးကြေညာပါတယ်။
ဈေးကွက်မှာ ရောင်းချနေတဲ့ ပဲသွေး၊ ပဲပြား၊ မုန့်ဖတ် စတဲ့ အစားအသောက်မယ်တွေမှာ စားသူတွေရဲ့ ကျန်းမာရေးကို ထိခိုက်စေနိုင်တဲ့ တားမြစ်ဓာတုပစ္စည်း ဖော်မလင်ကို ထည့်သွင်းသုံးစွဲခွင့်မပြုကြောင်း ဆိုပါတယ်။
တာရှည်ခံစေဖို့ ရည်ရွယ်ပြီး ဖော်မလင် ထည့်သွင်းအသုံးပြုတဲ့ အစားအသောက်တွေကို စားသုံးမိရင် လတ်တလောမှာ ခေါင်းမူး/ ခေါင်းကိုက်ခြင်း၊ အော့အန်ခြင်း၊ ဗိုက်နာခြင်း၊ အသက်ရှုရခက်ခဲခြင်းတွေ ဖြစ်ပွားစေနိုင်တယ်လို့ FDA က ထုတ်ပြန်ပါတယ်။
ဖော်မလင်အသုံးပြု အစားအသောက်တွေကို ရေရှည်စားသုံးမိရင်တော့ အစာအိမ်အနာဖြစ်ခြင်း၊ အသည်း၊ ကျောက်ကပ်များ ပျက်စီးခြင်း၊ ကင်ဆာရောဂါတွေ ဖြစ်ပွားစေနိုင်တယ်လို့ ဆိုပါတယ်။
ဒါ့အပြင် ကိုယ်ဝန်ဆောင်အမျိုးသမီးနဲ့ ကလေးငယ်တွေမှာ ဖော်မလင်အဆိပ်သင့်မှု ပိုမိုဖြစ်ပွားနိုင်ပြီး စားသုံးမိရင် သန္ဓေသားဖွံ့ဖြိုးမှု ထိခိုက်ခြင်းနဲ့ ကလေးသူငယ်ကြီးထွားမှုပြဿနာတွေ ဖြစ်ပွားစေနိုင်တာကြောင့် စားသုံးမှုမပြုဖို့ အသိပေးထားပါတယ်။
ကျန်းမာရေးဝန်ကြီးဌာန၊ အစားအသောက်နှင့် ဆေးဝါးကွပ်ကဲရေးဦးစီးဌာန (FDA) အနေနဲ့ အရည်အသွေးစစ်မှန်ကောင်းမွန်ပြီး ဘေးအန္တရာယ်ကင်းရှင်းတဲ့ အစားအသောက်တွေကို အများပြည်သူတို့ စားသုံးနိုင်ဖို့ စဉ်ဆက်မပြတ် ဆောက်ရွက်နေတယ်လို့ ပြောကြားထားပါတယ်။
