"သူကတော့ Native Speaker လို ပြောနိုင်လိုက်တာ၊ ငါကတော့ တတ်မှာမဟုတ်ပါဘူး။"
"Grammar ဆိုတာ ငါနဲ့မကိုက်ဘူး၊ ငါ့ဦးနှောက်က ဘာသာစကားအတွက် မကောင်းဘူး။"
ဒီလိုအတွေးတွေက သင့်ရဲ့ အင်္ဂလိပ်စာ တိုးတက်မှုကို သော့ခတ်ထားတဲ့ အကြီးမားဆုံး ရန်သူပါပဲ။
Stanford တက္ကသိုလ်က စိတ်ပညာ ပါမောက္ခ Dr. Carol Dweck ရဲ့ သုတေသနအရ၊ ဒါဟာ သင် "ညံ့" နေလို့ မဟုတ်ဘဲ၊ သင့်မှာ "Fixed Mindset" ("ဘောင်ခတ်" ထားတဲ့စိတ်။) ရှိနေလို့ပါ။
"Fixed Mindset" ဆိုတာ "ငါ့ရဲ့ ဉာဏ်ရည်ဉာဏ်သွေးက မွေးရာပါပဲ၊ ပြောင်းလဲလို့ မရတော့ဘူး" လို့ ယုံကြည်ထားတာပါ။
ဒီ Mindset က အင်္ဂလိပ်စာ လေ့လာသူတွေကို အတော်လေးအခက်တွေ့စေပါတယ်။
အမှားလုပ်မိတာနဲ့ "ငါ ညံ့တယ်" ဆိုတာ သက်သေပြလိုက်သလို ခံစားရပြီး၊ စကားပြောဖို့ လုံးဝ မကြိုးစားရဲတော့ပါဘူး။
ခက်ခဲတာကို ရှောင်ကြဉ်လာတတ်တယ်။
Grammar ခက်ခက်၊ Listening ဖိုင် ခက်ခက်တွေ တွေ့တာနဲ့ "ဒါ ငါနဲ့ မကိုက်ပါဘူး" ဆိုပြီး ချက်ချင်း လက်လျှော့ပစ်လိုက်ပါတယ်။
ကြိုးစားရတာကို ရှက်စရာလို့ ထင်တတ်တယ်။
"တကယ်တော်တဲ့သူဆိုတာ ကြိုးစားစရာမလိုဘဲ တတ်ရမယ်" လို့ ထင်ပြီး၊ ကြိုးစားနေရခြင်းကို "မတော်ဘူးလို့" လို့ ခံယူထားပါတယ်။
ဒါတွေကိုပြောင်းလဲပေးနိုင်မယ့် အဖြေကတော့ "Growth Mindset" (လေ့ကျင့်လေ သန်မာလေ" လို့ ယုံကြည်တဲ့စိတ်) ပါ။
"Growth Mindset" ဆိုတာက "ငါ့ဦးနှောက်က ကြွက်သား (Muscle) တစ်ခုလိုပဲ၊ လေ့ကျင့်လေ သန်မာလေပဲ။ ကြိုးစားရင် အရာအားလုံး ဖြစ်နိုင်တယ်" လို့ ယုံကြည်တာပါ။
ဒီ Mindset က သင့်ကို ဒါတွေကို ကူညီပေးနိုင်ပါတယ်။
အမှားတွေကို "လမ်းညွှန်" လို့ မြင်လာစေပါတယ်။
အမှားလုပ်မိတာကို "ငါ ဘယ်နေရာမှာ ပိုလေ့လာဖို့ လိုသေးလဲ" ဆိုတာကို ပြပေးတဲ့ "သင်ခန်းစာ" အဖြစ် ပျော်ပျော်ကြီး လက်ခံလာနိုင်ပါတယ်။
စိန်ခေါ်မှုတွေကို "လေ့ကျင့်ခန်း" လို့ သဘောထားလာတတ်တယ်။
ခက်ခဲတဲ့ လေ့ကျင့်ခန်းတွေကို "ငါ့ဦးနှောက် ကြွက်သားကို ပိုသန်မာအောင် လုပ်မယ့် လေ့ကျင့်ခန်းပဲ" လို့ မြင်ပြီး ပျော်ရွှင်စွာ လုပ်ဆောင်စေပါတယ်။
ကြိုးစားအားထုတ်မှုကို "သော့ချက်" လို့ ယုံကြည်လာတယ်။
"ကြိုးစားလေ၊ တော်လေ" ဆိုတာကို လက်ခံပြီး၊ အောင်မြင်မှုဟာ ဇွဲလုံလကနေပဲ လာတယ်ဆိုတာကို နားလည်သွားပါတယ်။
အခုချက်ချင်း ဘာလုပ်ရမလဲ- "YET" (သေး) ဆိုတဲ့ စကားလုံးကို သုံးပါ။
Mindset ဆိုတာ ပြောင်းလဲလို့ ရပါတယ်။ အဲ့ဒီပြောင်းလဲမှုကို စတင်ဖို့ အစွမ်းထက်ဆုံး စကားလုံးတစ်လုံးကတော့ "YET" (သေး) ဆိုတဲ့ စကားလုံးပါပဲ။
သင့်စိတ်ထဲမှာ ကိုယ့်ကိုယ်ကိုယ် အပြစ်တင်တဲ့ အတွေးတစ်ခု ဝင်လာတိုင်း၊ အဲ့ဒီဝါကျရဲ့ အဆုံးမှာ "YET" (သေး) ဆိုတာလေးကို ထည့်ပြီး ပြန်ပြောကြည့်ပါ။
"ငါ English စကား မပြောတတ်ဘူး" → "ငါ English စကား မပြောတတ်သေးဘူး။" (I can't speak English YET.)
"ငါ Grammar ကို နားမလည်ဘူး" → "ငါ Grammar ကို နားမလည်သေးဘူး။" (I don't understand grammar YET.)
"ငါ့အသံထွက် မကောင်းဘူး" → "ငါ့အသံထွက် မကောင်းသေးဘူး။" (My pronunciation isn't good YET.)
ဒီ "YET" (သေး) ဆိုတဲ့ စကားလုံးလေးတစ်လုံးက သင့်ဦးနှောက်ကို "ဒါ အဆုံးသတ်မဟုတ်ဘူး၊ ငါ ဆက်ကြိုးစားနေဆဲ၊ ငါ တိုးတက်လာဦးမယ်" ဆိုတဲ့ Growth Mindset ဘက်ကို ချက်ချင်း တွန်းပို့ပေးပါလိမ့်မယ်။