ထရမ့်နှင့်ပူတင်ဆွေးနွေးပွဲ၌ပါဝင်ရန် အသင့်ရှိဟု ယူကရိန်း ပြော
---------------------
ဟန်ဂေရီနိုင်ငံမှာ ကျင်းပမဲ့ ဒေါ်နယ်ထရမ့်နဲ့ ဗလာဒီမီယာပူတင်တို့ရဲ့ ထိပ်သီးဆွေးနွေးပွဲအတွက် ဖိတ်ကြားခံရ မယ်ဆိုရင် အသင့်ရှိနေတယ်လို့ ယူကရိန်း သမ္မတဇယ်လန်းစကီးက ပြောကြားလိုက်တာကို AP သတင်းမှာ ဖော်ပြထားပါတယ်။
အမေရိကန်နဲ့ ရုရှား သမ္မတတို့ဟာ ယူကရိန်းစစ်ပွဲနဲ့ ပတ်သက်ပြီး ထပ်မံ ဆွေးနွေးမှုတွေ ပြုလုပ်ဖို့ ဟန်ဂေရီ နိုင်ငံ ဘူဒါပတ်မြို့မှာ လာမဲ့သီတင်ပတ် အနည်းငယ်အတွင်း တွေ့ဆုံဖို့ စီစဉ်ထားတယ်လို့ ပြီးခဲ့တဲ့ ကြာသပတေးနေ့က ကြေညာခဲ့တာပါ။ ဇယ်လန်းစကီးက "ကျွန်တော်တို့ သုံးယောက် တွေ့ဆုံမဲ့ပုံစံမျိုး ဒါမှမဟုတ် ကြားခံသံတမန်ရေးလို့ခေါ်တဲ့ ပုံစံမျိုးနဲ့ ဖိတ်ခေါ်လာမယ်ဆိုရင်... ကျွန်တော်တို့ သဘောတူပါတယ်"လို့ သတင်းထောက်တွေကို ယူကရိန်း သမ္မတ ဇယ်လန်းစကီးက ပြောကြားလိုက်တာ ဖြစ်ပါတယ်။
ပြီခဲ့တဲ့သောကြာနေ့က ထရမ့်နဲ့ ဇယ်လန်းစကီးတို့ အိမ်ဖြူတော်တွေ့ဆုံပွဲမှာ အမေရိကန်က စစ်ပွဲအဆုံးသတ်ဖို့ အတွက် ရုရှားတို့ရဲ့ စည်းကမ်းသတ်မှတ်ချက်တွေကို လက်ခံဖို့ ယူကရိန်းကို တိုက်တွန်းခဲ့တယ်လို့ သိရပါတယ်။ ဇယ်လန်းစကီးက ထရမ့်နဲ့ တွေ့ဆုံမှုကို "ရိုးသားပွင့်လင်းတယ်"လို့ ဖော်ပြခဲ့ပြီး သူ့ရဲ့ အဓိကရည်မှန်းချက်ဟာ ငြိမ်းချမ်းရေး အလျင်အမြန်ရဖို့ မဟုတ်ဘဲ တရားမျှတတဲ့ ငြိမ်းချမ်းရေးသာ ဖြစ်တယ်လို့ ထရမ့်ကို ပြောကြားခဲ့ တယ်လို့ ဆိုပါတယ်။
ဒါ့အပြင် ထရမ့်-ပူတင် ဆွေးနွေးပွဲအတွက် ဟန်ဂေရီကို ရွေးချယ်သတ်မှတ်တာကိုလည်း ဇယ်လန်းစကီးက ဝေဖန်ခဲ့ပါတယ်။ ထရမ့်ကတော့ သတင်းထောက်တွေကို ပြောကြားရာမှာ "ကျွန်တော်တို့ သုံးယောက်အဖြစ် ပါဝင်မှာပါ။ ဒါပေမဲ့ သီးခြားစီ ဖြစ်နေနိုင်ပါတယ်" ဒါပေမဲ့ ခေါင်းဆောင်သုံးယောက်စလုံး "အတူတကွ တွေ့ဆုံဖို့ လိုအပ်တယ်"လို့ ပြောပါတယ်။
