ရုရှားထံမှ ရေနံဆက်မဝယ်ရန် အိန္ဒိယကို ထရမ့် ထပ်မံသတိပေး
-------------------
ရုရှားရေနံကို ဆက်ပြီး ဝယ်နေမယ်ဆိုရင် အိန္ဒိယဟာ အမေရိကန်ဆီက ကြီးမားပြင်းထန်တဲ့ သွင်းကုန်အခွန် စည်းကြပ်မှုတွေကို မလွဲမသွေ ကြုံရလိမ့်မယ်လို့ အမေရိကန်သမ္မတ ဒေါ်နယ်ထရမ့်က သတိပေးခဲ့တာကို Reuters သတင်းမှာ ဖော်ပြထားပါတယ်။
အိန္ဒိယဟာ ရုရှားရဲ့ ရေနံကို ဆက်ပြီး ဝယ်ယူနေတာကို အရေးယူတဲ့အနေနဲ့ အိန္ဒိယရဲ့ သွင်းကုန်တွေအပေါ် အခွန် ပမာဏ တိုးမြှင့်ကောက်ခံဖို့ ထရမ့်က ဆုံးဖြတ်ခဲ့ပါတယ်။ ပြီးခဲ့တဲ့ သီတင်းပတ်မှာတော့ ထရမ့်က သူဟာ အိန္ဒိယဝန်ကြီးချုပ်မိုဒီနဲ့ ဖုန်းပြောဖြစ်ခဲ့ပြီး ရုရှားရေနံတွေကို ဆက် မဝယ်တော့ပါဘူးလို့ မိုဒီက ကတိပေးခဲ့ကြောင်း သတင်းထောက်တွေကို ပြောကြားခဲ့ပါတယ်။ အိန္ဒိယဆီက အဲဒီ လို ကတိမျိုး ရပြီးတဲ့အခါ တရုတ်ကိုလည်း အလားတူ တောင်းဆိုနိုင်ဖို့ သူမျှော်လင့်တယ်လို့ ထရမ့်က ဆိုပါတယ်။
ယူကရိန်းစစ်ပွဲကို အကြောင်းပြုပြီး ရုရှားရဲ့ ရေနံတင်ပို့မှု လမ်းကြောင်းတွေကို အနောက်မဟာမိတ်နိုင်ငံတွေက ဖြတ်တောက်ပိတ်ဆို့ အရေးယူထားပေမဲ့ အိန္ဒိယနဲ့ တရုတ်ကတော့ ရုရှားရေနံစိမ်းကို ဆက်လက် ဝယ်ယူတဲ့ အဓိက ဝယ်လက်တွေအဖြစ် ရပ်တည်နေဆဲပါ။ ထရမ့်က မိုဒီဟာ ရုရှားရေနံတွေ ဆက်မဝယ်တော့ပါဘူးလို့ ကတိပေးခဲ့ကြောင်း ပြောပေမဲ့ ချက်ချင်းဆိုသလိုပဲ အိန္ဒိယနိုင်ငံခြားရေးဝန်ကြီးဌာနကတော့ မိုဒီနဲ့ထရမ့်တို့ အဲဒီကိစ္စ ဆွေးနွေးခဲ့တယ်ဆိုတာ မဟုတ်ဘူးလို့ ငြင်းချက် ထုတ်ခဲ့ပါတယ်။
ဒါ့အပြင် အိန္ဒိယရဲ့ ရေနံစိမ်း ဝယ်ယူမှု မူဝါဒဟာ စျေးနှုန်းနဲ့ ရေရှည်ထောက်ပံ့နိုင်မှုတွေမှာ နိုင်ငံ အတွက် အမှန်တကယ် သင့်တော်အကျိုးရှိစေမဲ့ ရွေးချယ်မှုကိုပဲ ဦးစားပေးမယ်လို့ အိန္ဒိယက ကြေညာခဲ့ပါတယ်။
