မြေရှားသတ္တုဆိုင်ရာ သဘောတူညီချက် အမေရိကန်နဲ့ ဩစတြေးလျ လက်မှတ်ထိုး
အောက်တိုဘာ ၂၁
အမေရိကန်နဲ့ သြစတြေးလျတို့ဟာ မြေရှားသတ္တုနဲ့ အရေးပါတဲ့ တွင်းထွက်တွေ ထုတ်လုပ် ထောက်ပံ့ရေးအတွက် သဘောတူညီချက်တရပ်ကို လက်မှတ်ရေးထိုးလိုက်ပါတယ်။
ဒါဟာ မြေရှားသတ္တုတင်ပို့မှုကို ကန့်သတ်မှုတွေချမှတ်ထားတဲ့ တရုတ်နိုင်ငံရဲ့ ဈေးကွက်လွှမ်းမိုးမှုကို တန်ပြန်ဖို့ ကြိုးပမ်းမှုလို့ အကဲခတ်တွေက ဆိုပါတယ်။ ဒီသဘောတူညီချက်ကို ဒေါ်နယ်ထရန့်နဲ့ ဩစတြေးလျဝန်ကြီးချုပ် အယ်ဘာနီးစ်တို့က အိမ်ဖြူတော်မှာ လက်မှတ်ရေးထိုးခဲ့တာပါ။
သဘောတူညီချက်အရ အမေရိကန်နဲ့ သြစတြေးလျတို့ဟာ ခြောက်လအတွင်း နှစ်နိုင်ငံဆောင်ရွက်မယ့် စီမံကိန်းတွေအတွက် ဒေါ်လာ ၁ ဘီလီယံစတင်အသုံးပြုသွားမှာဖြစ်ပြီး မြေရှားသတ္တုနဲ့ အခြားအရေးပါတဲ့ ဓာတ်သတ္တုတွေ တူးဖော်ခြင်း၊ ပြုပြင်ခြင်းတွေအတွက် အမေရိကန်က ဒေါ်လာ ၈ ဒဿမ ၅ ဘီလီယံထိ ရင်းနှီးမြုပ်နှံမှာ ဖြစ်ပါတယ်။
သဘောတူညီချက်မှာတော့ သြစတြေးလျ၊ အမေရိကန်နဲ့ ဂျပန်တို့ ပူးပေါင်းပြီး တပိုင်းလျှပ်ကူးပစ္စည်းထုတ်လုပ်ရာမှာ အသုံးပြုတဲ့ ဂယ်လီယမ်ကို ပူးတွဲထုတ်လုပ်မယ့် စီမံကိန်းတခုလည်း ပါဝင်တယ်လို့ ဩစတြေးလျ ဝန်ကြီးချုပ်က ပြောပါတယ်။
ဩစတေးလျဟာ မြေရှားသတ္တု ထုတ်လုပ်တဲ့ အဓိကနိုင်ငံတစ်နိုင်ငံဖြစ်ပြီး လက်ရှိသဘောတူညီချက်ဟာ တည်ငြိမ်တဲ့ ထောက်ပံ့ရေးကွင်းဆက်ကို ထူထောင်ဖို့နဲ့ တရုတ်နိုင်ငံအပေါ် မှီခိုအားထားမှုမှ ရုန်းထွက်ဖို့ အမေရိကန်က ကြိုးပမ်းနေပုံရပါတယ်။
ဒါအပြင် AUKUS လို့ လူသိများတဲ့ အမေရိကန်၊ ဩစတြေးလျ၊ ဗြိတိန်တို့ရဲ့ လုံခြုံရေးမူဘောင်အောက်မှာ ဩစတြေးလျအတွက် အမေရိကန်လုပ် နျူကလီးယားစွမ်းအင်သုံး ရေငုပ်သင်္ဘောတွေ ပေးအပ်ရေး အစီအစဉ်ကိုလည်း ဒေါ်နယ်ထရန့်နဲ့ ဩစတြေးလျဝန်ကြီးချုပ်တို့က ဆွေးနွေးခဲ့ကြကြောင်း သိရပါတယ်။
