◾️ဟောင်ကောင်တွင် ကုန်တင်လေယာဉ်ပြေးလမ်းချော်ပြီး ပင်လယ်ထဲထိုးကျ၊ နှစ်ဦးသေဆုံး
ဟောင်ကောင်နိုင်ငံတကာလေဆိပ်တွင် ကုန်တင်လေယာဉ်တစ်စင်း ပြေးလမ်းမှ ချော်ထွက်ကာ ပင်လယ်ထဲထိုးကျသွားခဲ့ပြီး လေဆိပ်မှ မြေပြင်ဝန်ထမ်းနှစ်ဦး သေဆုံးခဲ့ကြောင်း သိရသည်။
ဒူဘိုင်းမှပျံသန်းလာသော အမ်းမရိတ်လေကြောင်း EK 9788 သည် နံနက် ၃ နာရီ ၅၀ မိနစ်တွင် ပြေးလမ်းချော်သွားချိန်တွင် လေဆိပ်ကင်းလှည့်ယာဉ်ကို ဝင်တိုက်မိခဲ့ခြင်း ဖြစ်သည်။
ယင်းနှင့်အတူ ကင်းလှည့်ယာဉ်ပေါ်မှ ဝန်ထမ်းနှစ်ဦးသေဆုံးသွားခဲ့ရသော်လည်း လေယာဉ်ပေါ်တွင် လိုက်ပါခဲ့သောဝန် ထမ်း လေးဦးမှာမူ အသက်ရှင်ခဲ့သည်။
ယင်းမှာ ဘေးကင်းလုံခြုံရေးနှင့်ပတ်သက်၍ မှတ်တမ်းကောင်းရှိသော ဟောင် ကောင်နို င်ငံတကာလေဆိပ်အ တွက် နှစ်ပေါင်းများစွာအတွင်း လူအသေအပျောက်အများဆုံးဖြစ်ရပ် ဖြစ်သည်။
လေယာဉ်ဆင်းသက်ချိန်တွင် ပြေးလမ်းနှင့်ပတ်သက်သော မေးခွန်းများရှိနေခဲ့ရာ အာဏာပိုင်များက စုံစမ်းစစ်ဆေးမှုများ စတင်ခဲ့သည်။
ကုန်တင်လေယာဉ်အား မှန်ကန်သော ညွှန်ကြားချက်များပေးခဲ့ကြောင်း နှင့် ပြေးလမ်းပေါ်တွင်လည်း လေယာဉ်ကို လမ်းညွှန်ပေးမည့် ဆိုင်းဘုတ်များလည်း ရှိနေကြောင်း လေ ဆိပ်တာဝန်ရှိသူများက ပြောကြားကြသည်။
လေယာဉ်လမ်းချော်သွားချိန်တွင် ကင်းလှည့်ယာဉ်က ပြေးလမ်းခြံစည်းရိုးမှ ခပ်လှမ်းလှမ်းတွင် ရှိသော လမ်းပေါ်တွင် မောင်းနှင်နေကြောင်း၊ လေယာဉ်ကပြေးလမ်းမှ ချော်ထွက်ပြီး ခြံစည်းရိုးကိုလည်း ကျော်ဖြတ်ကာ ကင်းလှည့်ယာဉ်ကို ဝင်တိုက်ခဲ့၍ ယာဉ်နှင့် ဝန်ထမ်းနှစ်ဦး ပင်လယ်ထဲသို့ ကျဆင်းသွားခဲ့ရကြောင်း လေဆိပ်လုပ်ငန်းအမှုဆောင် ဒါ ရိုက်တာ စတီဗင်ယူးက ပြောကြားသည်။
လေယာဉ်က ဆင်းသက်ချိန်တွင် ပြဿနာရှိနေသည်ဆိုသော အချက်ပြမှုလည်း မရှိကြောင်း မစ္စတာယူးက ဆက်ပြောသည်။
နောက်ပိုင်းတွင် ရေငုပ်သမားများက ကင်းလှည့်ယာဉ်ဝန်ထမ်းနှစ်ဦး အလောင်းကို ပင်လယ်ထဲမှ ရှာဖွေတွေ့ရှိခဲ့သည်။
ဟောင်ကောင်တွင် ဆင်းသက်ချိန်တွင် ၎င်းတို့လေယာဉ်ပျက်စီးမှုဖြစ်ပေါ်ခဲ့ကြောင်း နှင့် ဝန်ထမ်းများ ဘေကင်းကြောင်း အမ်းမရိတ်လေကြောင်းမှ ပြောခွင့်ရသူက ဘီဘီစီသတင်းအား ပြောကြားသည်။
ပြေးလမ်းချော်သွားပြီး မကြာမီပင်လေယာဉ်ဝန်ထမ်း လေးဦးက အရေးပေါ် တံခါးများကို ချိုးဖျက်ထွက်ခဲ့ကြပြီး ၎င်းတို့အား ယင်းနေရာသို့ နှစ်မိနစ်အတွင်း ရောက်ရှိလာသော လေဆိပ်မီးသတ်တပ်ဖွဲ့များက တွေ့မြင်ပြီး ကယ်ဆယ်ခဲ့သည်။
လေယာဉ်က နှစ်ပိုင်းကျိုးသွားပြီး ကိုယ်ထည် တစ်စိတ်တစ်ပိုင်းမှာ ရေထဲတွင် နစ်မြုပ်နေသည်ကိုတွေ့ရသည်။
ရာဇဝတ်မှုဆိုင်ရာ စုံစမ်းစစ်ဆေးမှုများကိုလည်း ဖယ်ရှားထားမည်မဟုတ်ကြောင်း ရဲအရာရှိတစ်ဦးက မီဒီယာများကို ပြောသည်။
black boxes ဟု သိရှိကြသော လေယာဉ်အချက်အလက်မှတ်တမ်းတင်ကိရိယာနှင့် လေယာဉ်မှူးအခန်းအသံ ဖမ်းစက် နှစ်ခုကို ပင်လယ်ထဲမှပြန်လည်ရရှိရန် ကြိုးစားနေဆဲဖြစ်ကြောင်း ဟောင်ကောင်လေကြောင်းမတော်တဆမှုစုံစမ်းစစ်ဆေးရေး အာဏာပိုင်အဖွဲ့ (AAIA) မှ အရာရှိတစ်ဦးက ပြောသည်။
လေယာဉ်ကွင်းမှ ထိခိုက်ခဲ့သော ပြေးလမ်းကို ပိတ်ထားပြီး ကျန်ပြေးလမ်းနှစ်ခုကို ဆက်ဖွင့်ထားကြောင်း သိရသည်။
သတင်း-ရဲမင်း
ကိုးကား-BBC
#နိုင်ငံတကာသတင်း
