⬛အရှေ့မြောက်မုတ်သုံလေ အားကောင်းနေခြင်းကြောင့် မိုးပိုလာနိုင်ဟုဆို
အရှေ့မြောက်မုတ်သုံလေအားကောင်းနေခြင်းကြောင့် မြန်မာနိုင်ငံတောင်ပိုင်းဒေသများတွင်မိုးပိုလာနိုင်ကြောင်း မိုးလေဝသစောင့်ကြည့်လေ့လာသူ ဦးဝင်းနိုင်ကခန့်မှန်းသည်။
ယင်းအရှိန်များကြောင့်(အောက်တိုဘာ ၂၀ ရက်) ည ၁၀ နာရီမှအောက်တိုဘာ၂၅ ရက်၊ ည ၁၀ နာရီအထိ တနင်္သာရီတိုင်း၌ ငါးရက်အတွင်းမိုးရေချိန် ၆ ဒသမ ၇ လက်မမှ ၈ ဒသမ ၃ လက်မအထိ ရွာသွန်းရရှိနိုင်ကြောင်း ဦးဝင်းနိုင်ကခန့်မှန်းထားသည်။
ထို့ပြင် မွန်-တနင်္သာရီကမ်းရိုးတန်းတလျှောက်၊ ဒေါနတောင်ကြောတလျှောက်နှင့် ရခိုင်ကမ်းရိုးတန်း၊ ဧရာဝတီ မြစ်ဝကျွန်းပေါ်ကမ်းရိုးတန်းအနီးတလျှောက်ရှိဒေသများတွင်လည်း နေ့စဉ်မိုးထစ်ချုန်းရွာသွန်းနိုင်ကြောင်း မိုးလေဝသစောင့်ကြည့်လေ့လာသူ ဦးဝင်းနိုင်ကလူမှုကွန်ရက်တွင်ခန့်မှန်းရေးသားထားသည်။
မိုးလေဝသနှင့်ဇလဗေဒညွှန်ကြားမှုဦးစီးဌာန၏ ယနေ့(အောက်တိုဘာ ၁၉ ရက်) နံနက် ၉ နာရီ ၃၀ မိနစ်အချိန်တိုင်းထွာချက်များအရ ဖိလစ်ပိုင်နိုင်ငံ၊ လူဇုန်ကျွန်းတောင်ပိုင်း ပင်လယ်ကွေ့တွင်ဖြစ်ပေါ်နေသော အပူပိုင်းမုန်တိုင်း ‘ဖန်ရှန်’ သည် မြောက်-အနောက် မြောက်ဘက်သို့ရွေ့လျားနိုင်ပြီး လူဇုန်ကျွန်းသို့ဖြတ်ကျော်နိုင်ကြောင်း ထုတ်ပြန်ထားသည်။
သတင်း - အင်ကြင်း
ဓာတ်ပုံ - Win Naing/Fb
#ပြည်တွင်းသတင်း
