ယခုရာသီ ပထမဆုံးဟက်ထရစ်သွင်းယူပြီး ၂၉ ဂိုးဖြင့် မေဂျာလိဂ်ရွှေဖိနပ်ဆု ရရှိလာတဲ့ လီယွန်နယ်မက်ဆီ
===================
လီယွန်နယ်မက်ဆီဟာ နက်ရှ်ဗီလီအား အင်တာမိုင်ယာမီတို့ ၅-၂ ဂိုးဖြင့် အနိုင်ရတဲ့ ပုံမှန်မေဂျာလိဂ်ရာသီသိမ်းပွဲတွင် ယခုရာသီ ပထမဆုံးဟက်ထရစ်သွင်းယူခဲ့ပြီးနောက် ၂၉ ဂိုးဖြင့် ရွှေဖိနပ်ဆု ဆွတ်ခူးလာပါတယ်။
အာဂျင်တီးနားနှင့် အင်တာမိုင်ယာမီအသင်းခေါင်းဆောင်ဟာ ၂၀၂၅ ခုနှစ်အတွင်း အကောင်းဆုံးခြေစွမ်းဖြင့် ကစားနိုင်ခဲ့တာ ဖြစ်ပြီး ၂၈ ပွဲတွင် ၂၉ ဂိုးသွင်းပြီး ၁၆ ကြိမ် ဖန်တီးမှု ပြုလုပ်နိုင်ခဲ့ပါတယ်။
မက်ဆီဟာ ယခု ၂၀၂၅ ခုနှစ် မေဂျာလိဂ်တွင် ပထမဆုံးဟက်ထရစ်သွင်းယူနိုင်ခဲ့တာ ဖြစ်ပြီး ဂိုးသွင်းဘုရင်ဖြစ်လာမှုနှင့်အတူ မေဂျာလိဂ်တန်ဖိုးအရှိဆုံးကစားသမားဆု ရရှိရန်အတွက် အလာအလားအကောင်းဆုံး ဖြစ်နေပြီလည်း ဖြစ်ပါတယ်။
တကယ်လို့များ လီယွန်နယ်မက်ဆီဟာ မေဂျာလိဂ်တန်ဖိုးအရှိဆုံးကစားသမားဆုအား ထပ်မံ ဆွတ်ခူးနိုင်မည်ဆိုပါက ဒီဆုကို နှစ်နှစ်ဆက် ဆွတ်ခူးနိုင်တဲ့ ပထမဆုံးကစားသမားဖြစ်လာပါမယ်။
ဒါ့အပြင် သူဟာ ပရီဒရစ်ရာဒိုဆာဗီဗစ် နောက်ပိုင်းတွင် ဒီဆုကို ၂ ကြိမ် ရရှိတဲ့ ပထမဆုံးကစားသမားလည်း ဖြစ်ပါတယ်။ ပရီဒရစ်ရာဒိုဆာဗီဒစ်ဟာ ဒီဆုကို ၁၉၉၇ နှင့် ၂၀၀၃ ခုနှစ်တို့တွင် ဆွတ်ခူးခဲ့တာ ဖြစ်ပါတယ်။
လီယွန်နယ်မက်ဆီဟာ ယခုမေဂျာလိဂ်ရာသီတွင် ဂိုးနှင့် ဖန်တီးမှု စုစုပေါင်း ၄၄ ကြိမ်အထိ ပြုလုပ်နိုင်ခဲ့တာ ဖြစ်ပြီး ဟောက်စတန်ဒိုင်နမို(သွင်းဂိုး ၄၃)၊ ကိုလိုရာဒိုရာပစ်(သွင်းဂိုး ၄၂ ဂိုး)၊ စိန့်လူးဝစ်စီးတီး(သွင်းဂိုး ၄၂ ဂိုး)၊ နယူးအင်္ဂလန်ရီဗော်လူးရှင်း (သွင်းဂိုး ၄၂ ဂိုး)၊ ပေါ့လန်းတမ်ဘား (သွင်းဂိုး ၄၁ ဂိုး)၊ အတ္တလန္တာယူနိုက်တက်(သွင်းဂိုး ၃၇ ဂိုး)၊ ရီးရဲလ်ဆဲလိတ် (သွင်းဂိုး ၃၆ ဂိုး)၊ မွန်ထရီရယ်(သွင်းဂိုး ၃၄ ဂိုး)၊ တိုရွန်တို(သွင်းဂိုး ၃၃ ဂိုး)၊ ဒီစီယူနိုက်တက်(သွင်းဂိုး ၂၉ ဂိုး) တို့ထက် သာလွန်နေပါတယ်။
ဒါ့အပြင် လီယွန်နယ်မက်ဆီရဲ့ ဂိုးနှင့် ဖန်တီးမှု စွမ်းဆောင်ရည်မှာ အယ်လ်အေဂလက်ဆီ တစ်သင်းလုံးရဲ့ သွင်းဂိုးနှင့်လည်း တူညီနေပါတယ်။
