ယူနိုက်တက်အား ရှုံးနိမ့်ပြီးနောက် ဒိုင်လူကြီးမိုက်ကယ်အိုလီဗာအား ဘက်လိုက်တဲ့ ဒိုင်ဆိုပြီး လီဗာပူးပရိသတ်များ ဝေဖန်တိုက်ခိုက်နေကြ
=====================

လီဗာပူးပရိသတ်များဟာ မနေ့ညတုန်းက အန်ဖီးလ်တွင် ယူနိုက်တက်အား ၂-၁ ဂိုးဖြင့် ရှုံးနိမ့်ပြီးနောက် ဒိုင်လူကြီးမိုက်ကယ်အိုလီဗာအား ဘက်လိုက်တဲ့ ဒိုင်ဆိုပြီး ဝိုင်းဝန်းစွပ်စွဲ အပြစ်တင်နေကြပါတယ်။

လီဗာပူးပရိသတ်များဟာ ပွဲအစ ၂ မိနစ်မှာပင် ဘရိုင်ယန်အမ်ဘူမို သွင်းယူလိုက်တဲ့ ယူနိုက်တက်ရဲ့ ဦးဆောင်ဂိုးအား ခွင့်ပြုလိုက်မှုအပေါ် ဒိုင်လူကြီးအား အပြစ်တင်နေကြတာလည်း ဖြစ်ပါတယ်။

ဘရိုင်ယန်အမ်ဘူမိုက ယူနိုက်တက်အတွက် ဦးဆောင်ဂိုးအား မသွင်းယူမီ လီဗာပူးကွင်းလယ်ကစားသမားအလက်ဆစ်မက်အယ်လစ်စတာမှာ ကစားဖော်ဗန်ဒိုက်နှင့် တိုက်မိကာ ခေါင်းဒဏ်ရာရရှိပြီး ကွင်းမှာ လဲကျနေခဲ့ပါတယ်။

ဒါပေမယ့် ဒိုင်လူကြီးအိုလီဗာက ယင်းအဖြစ်အပျက်အား မမြင်တွေ့မှုနှင့်အတူ ပွဲကို ရပ်ဆိုင်းခြင်း မပြုဘဲ ဆက်ကစားစေခဲ့ရာ ယူနိုက်တက်က ဦးဆောင်ဂိုး ရရှိသွားခဲ့ပါတယ်။

ပရီးမီးယားလိဂ်စည်းမျဉ်းအရ ဦးခေါင်းဒဏ်ရာရရှိလာပါက ပွဲကို ရပ်ဆိုင်းရပါတယ်။ တဖက်တွင် VAR ကလည်း အမ်ဘူမိုရဲ့ ဂိုးတွင် ယူနိုက်တက်ဘက် ပြစ်ဒဏ်ကျူးလွန်ခြင်း မရှိရာ ဝင်ရောက်စွက်ဖက်လာခြင်း မရှိပါဘူး။

လီဗာပူးနည်းပြအန်းဆလော့ဟာ အယ်လစ်စတာ ကွင်းအတွင်း လဲကျနေစဉ် ပွဲကို မရပ်ဆိုင်းမှုအတွက် စတုတ္ထဒိုင်လူကြီးအား ဒေါသတကြီး စောကတက်ခဲ့တာ တွေ့ရပါတယ်။

လီဗာပူးပရိသတ်များဟာ အမ်ဘူမိုရဲ့ ဂိုးကြောင့်သာ ဒိုင်လူကြီးမိုက်ကယ်အိုလီဗာအား ဒေါသထွက်ခဲ့တာ မဟုတ်ပါဘူး။
၎င်းတို့ဟာ ပင်နယ်တီဧရိယာအတွင်း အာမက်ဒီရယ်လို လက်ထိဘောဖြစ်မှုအား ပင်နယ်တီ မပေးမှုအတွက်လည်း မိုက်ကယ်အိုလီဗာကို အပြစ်တင်နေကြတာပါ။ အိုလီဗာဟာ ယင်းအဖြစ်အပျက်ကို မတော်တဆမှုအဖြစ်သာ သတ်မှတ်ပြီး ဂိုးအဖြစ် မပေးခဲ့ပါဘူး။ VAR ကလည်း ကြားဝင်ခြင်း မရှိဘဲ အိုလီဗာရဲ့ ဆုံးဖြတ်ချက်ကို လက်ခံခဲ့ပါတယ်။

ဒါကြောင့်လည်း လီဗာပူးပရိသတ်များဟာ ဒိုင်လူကြီးမိုက်ကယ်အိုလီဗာအပေါ်တွင် အကြီးအကျယ်ဒေါသထွက်နေကြတာလည်း ဖြစ်ပါတယ်။

လီဗာပူးပရိသတ်တစ်ဦးက "ဘဝမှာ အဆိုးရွားဆုံး ဒိုင်စွမ်းဆောင်ရည် မိနစ် ၂၀ကို မြင်ရလိမ့်မယ်လို့ ထင်မှတ်မထားခဲ့ဘူး။ မိုက်ကယ်အိုလီဗာကို ထုတ်လိုက်သင့်ပြီ"လို့ ဆိုသွားပါတယ်။

အခြားလီဗာပူးပရိသတ်တစ်ဦးကလည်း "မိုက်ကယ်အိုလီဗာက အရှက်မရှိတဲ့ ဒိုင်ပဲ။ ခေါင်းဒဏ်ရာရနေတာ ပွဲမရပ်ဘူး"လို့ ဆိုသွားပါတယ်။

အခြားတစ်ဦးကလည်း "မိုက်ကယ်အိုလီဗာရေ အိုကေရဲ့လား။ ဒီလောက် ဘက်လိုက်တဲ့ ဒိုင် မဖြစ်ဖူးဘူး။ အထူးသဖြင့် လီဗာပူး-ယူနိုက်တက်လို ပွဲကြီးမျိုးမှာပေါ့"လို့ ဆိုသွားပါတယ်။