၁၁ ပွဲဆက် ဂိုးသွင်းကာ ရီးရဲလ်မက်ဒရစ်အား လာလီဂါဇယားထိပ်သို့ ပြန်ပို့လာတဲ့ ဘက်ပေး
======================
ရီးရဲလ်မက်ဒရစ်ဟာ မနေ့ညက ဂီတာဖေးနှင့်ပွဲစဉ်တွင် ကိုင်လီယန်ဘက်ပေးရဲ့ တစ်လုံးတည်းသော အနိုင်ဂိုးဖြင့် အနိုင်ရရှိပြီး လာလီဂါအမှတ်ပေးဇယားထိပ်ဆုံးနေရာကို ပြန်လည် ရယူလာပါတယ်။
ရီးရဲလ်မက်ဒရစ်ဟာ စနေနေ့တုန်းက ဂီရိုနာကို ၂-၁ ဖြင့် အနိုင်ရရှိခဲ့တဲ့ ဘာစီလိုနာကို အမှတ်ပေးဇယားထိပ်ဆုံးနေရာ လွဲပြောင်းပေးထားရပြီး ဂီတာဖေးနှင့်ပွဲစဉ်တွင် အနိုင်ရရှိရန် လိုအပ်နေခဲ့တာပါ။
ကိုင်လီယန်ဘက်ပေးဟာ ပွဲချိန်မိနစ် ၈၀ မှာ အာဒါဂူလာရဲ့ ချပေးမှုကနေ ရီးရဲလ်မက်ဒရစ်အတွက် တစ်လုံးတည်းသော အနိုင်ဂိုးကို သွင်းယူခဲ့တာလည်း ဖြစ်ပါတယ်။
ဒီဂိုးကြောင့် ဘက်ပေးဟာ ကလပ်နှင့် နိုင်ငံအတွက် ၁၁ ပွဲဆက် ဂိုးသွင်းလာနိုင်ပါတယ်။
ဘက်ပေး အနိုင်ဂိုးမသွင်းမီ ၆ မိနစ်အလိုတွင် ဂီတာဖေးဟာ အန်ယွမ် တိုက်ရိုက်အနီကတ်ပြထုတ်ပယ်ခံရလို့ တစ်ယောက်အလျှော့ဖြင့် ကစားခဲ့ရပါတယ်။ ဝက်ဖို့ဒ်နှင့် ဝက်စ်ဘရွန်းနောက်တန်းအစွန်လူဟောင်းဟာ လူစားဝင်ရောက်လာပြီး ၄၄ စက္ကန့်အကြာမှာဘဲ ဗီနီရှပ်စ်ဂျူနီယာကို တံတောင်ဖြင့် တွက်လို့ တိုက်ရိုက်အနီကတ်ပြထုတ်ပယ်ခံခဲ့ရတာလည်း ဖြစ်ပါတယ်။
ဒါ့အပြင် ဂီတာဖေးဟာ ပွဲချိန် ၈၄ မိနစ်မှာလည်း ဆန်ခရစ် ဗီနီရှပ်စ်ကို ပြစ်ဒဏ်ကျူးလွန်မှုကြောင့် နှစ်ဝါတစ်နီနှင့် အထုတ်ခံရကာ နှစ်ယောက်အလျှော့ဖြင့် ကစားခဲ့ရပါတယ်။
နှစ်ယောက်အလျှော့နဲ့ ကစားခဲ့ရပေမယ့် ဂီတာဖေးဟာ နာကျင်အချိန်ပိုမှာ အပိုင်အခွင့်အရေး ရရှိခဲ့တဲ့ သီဘောက်ကော့တွိုက်စ် ဖျက်ထုတ်လိုက်နိုင်လို့ ရီးရဲလ်မက်ဒရစ်တို့ သက်သာရာ ရခဲ့တာပါ။
အခုပွဲစဉ်မစတင်မီမှာ နှစ်ဖက် ကစားသမားများဟာ ပွဲအစ ၁၅ စက္ကန့်ကို မကစားဘဲ လာလီဂါရဲ့ နိုင်ငံခြားတွင် ပွဲကစားမှုကို သပိတ်မှောက်ခဲ့ကြပါတယ်။
ယခုအပတ် လာလီဂါပွဲစဉ်များတွင် ကစားသမားများဟာ ဗီလာရီးရဲလ်နှင့် ဘာစီလိုနာတို့ရဲ့ လာလီဂါပွဲစဉ်အား မိုင်ယာမီတွင် ပြောင်းကစားရန် ဆုံးဖြတ်မှုကို ကန့်ကွက်တဲ့အနေဖြင့် ပွဲအစ ၁၅ စက္ကန့်ကို မလှုပ်ရှားဘဲ သပိတ်မှောက်ခဲ့ကြပါတယ်။
ရီးရဲလ်မက်ဒရစ်ဟာ ကြားရက်မှာ ဂျူဗင်တပ်နှင့် ချန်ပီယံလိဂ်ပွဲကစားပြီးလျှင် ခါးသီးတဲ့ပြိုင်ဘက် ဘာစီလိုနာကို ဘာနေဗျူးမှာ ဧည့်ခံကစားရပါမယ်။
