⬛ရွှေ့ပြောင်းလုပ်သားများအား အသိအမှတ်ပြုကတ်ထုတ်ပေးမည့် အစီအစဉ် ထိုင်းအစိုးရရွှေ့ဆိုင်း
ထိုင်းနိုင်ငံအတွင်း တရားမဝင် ရောက်ရှိနေထိုင်နေသည့် ရွှေ့ပြောင်းအလုပ်သမားများအား တရားဝင် နေထိုင်လုပ်ကိုင်ခွင့် (ပန်းရောင်ကတ်)ပြုလုပ်ပေးမည့် အစီအစဉ်ကို ရွှေ့ဆိုင်းလိုက်ကြောင်း ထိုင်းနိုင်ငံအလုပ်သမားဝန်ကြီးဌာနက ယမန်နေ့ (အောက်တိုဘာ ၁၆ရက်)တွင် ထုတ်ပြန်သည်။
ထိလွယ်ရှလွယ်ဖြစ်နေသည့် လက်ရှိနယ်စပ်အခြေအနေများကြောင့် အလုပ်သမားပြဿနာကို ကျယ်ကျယ်ပြန့်ပြန့် ဖြေရှင်းနိုင်ရေးအတွက် တရားမဝင်ရွှေ့ပြောင်းလုပ်သမားများအား မှတ်ပုံတင် ပြုလုပ်ပေးမည့်အစီအစဉ်ကို ရွှေ့ဆိုင်းလိုက်ခြင်းဖြစ်ကြောင်း ထုတ်ပြန်ချက်တွင်ဖော်ပြထားသော်လည်း မည်သည့် ကာလအထိ ရွှေ့ဆိုင်းလိုက်သည်ကို ဖော်ပြမထားပေ။
ထိုင်းအစိုးရသည် တရားမဝင်ရွှေ့ပြောင်းလုပ်သားများမှတ်ပုံတင်ခြင်း (ပန်းရောင်ကတ်ထုတ်ပေးခြင်း) လုပ်ငန်းစဉ်ကို အောက်တိုဘာ ၁၅ ရက်တွင် စတင်မည်ဟု ကြေညာထားပြီး အွန်လိုင်းမှတစ်ဆင့် အမည်စာရင်းပေးသွင်းနိုင်ရေးကိုပါ ပြင်ဆင်ခဲ့သော်လည်း ရုတ်တရက် ပြန်လည်ရွှေ့ဆိုင်းလိုက်ခြင်းဖြစ်သည်။
နိုင်ငံခြားသားများ တရားမဝင်အနေအထားဖြင့် အလုပ်လုပ်ကိုင်ခွင့်ရရေးအတွက် ဆက်လက်နေထိုင်ခွင့်ပြုရေးသည် အထူးကိစ္စရပ်အဖြစ် အထောက်အကူပြုဥပဒေများ ပြဌာန်းရန်လိုအပ်ကြောင်း ထိုင်းအစိုးရအလုပ်သမားဝန်ကြီးဌာနက ထုတ်ပြန်ချက်ကဆိုသည်။
ယခုကဲ့သို့ ပန်းရောင်းကတ်ထုတ်ပေးမည့် အစီအစဉ်ကို ရွှေ့ဆိုင်းလိုက်ခြင်းကြောင့် အခြားအာဆီယံနိုင်ငံအချို့မှ နိုင်ငံသားများအပါအဝင် ထိုင်းနိုင်ငံအတွင်း တရားမဝင်နေထိုင် အလုပ်လုပ်ကိုင်နေသည့် မြန်မာနိုင်ငံသားများအတွက်လည်း ထိခိုက်မှုများ ရှိလာကြောင်း ထိုင်းရောက်မြန်မာရွှေ့ပြောင်းလုပ်သားအရေးဆောင်ရွက်နေသူများကပြောသည်။
ပန်းရောင်ကတ်အသစ်ထုတ်ပေးမည်ဟ ထိုင်းအစိုးရက ကြိုတင်ကြေညာထားခြင်းကြောင့် ပွဲစားများထံ အခကြေးငွေပေးကာ စောင့်ဆိုင်းနေသည့် မြန်မာရွှေ့ပြောင်း လုပ်သားအများအပြား အခက်ကြုံရနိုင်ကြောင်း မြန်မာလုပ်သားများအရေးဆောင်ရွက်နေသည့် MHAC မဟာမိတ်အဖွဲ့ထံမှသိရသည်။
ပန်းရောင်ကတ်ထုတ်ပေးမည့် အစီအစဉ်ကို ရွှေ့ဆိုင်းကြောင်း ထိုင်းအစိုးရက ကြေညာသည့် ယမန်နေ့မှာပင် စာမွတ်စာခွန်ခရိုင် မဟာချိုင်နယ်မြေရှိ လူနေတိုက်တန်းလျားတစ်ခု၌ တရားမဝင်နေထိုင်သည့် မြန်မာနိုင်ငံသား ၁၃၁ဦးကို ထိုင်းရဲတပ်ဖွဲ့နှင့် လဝကဌာနတို့က လာရောက်ဖမ်းဆီးသွားကြောင်းလည်း သိရသည်။
“ထိုင်းလူမျိုးအရာရှိတစ်ဦးက ထိုင်းရဲတွေ၊ထိုင်းလဝကတွေလည်း မဖမ်းချင်ဘူးတဲ့၊ဒီလူတွေအကြွေးတွေနဲ့ တက်လာကြတာသိတယ်တဲ့။ သနားတယ်တဲ့။ ဒါပေမဲ့ သူတို့လူတင်ထားတဲ့ မြန်မာပွဲစားအချင်းချင်း အဝေမတည့်မနာလိုဖြစ်ပြီး ပွဲစားတစ်ဦးက နေရာအတိအကျနဲ့ထိုင်းလဝကမှာတိုင်လို့ မဖြစ်မနေဝင် ဖမ်းရတာတဲ့ ကျွန်တော့်ကိုသေချာရှင်းပြတယ်”ဟု ထိုင်းရောက်မြန်မာအလုပ်သမားအရေး ဆောင်ရွက်နေသူတစ်ဦးက ဆိုသည်။
အဆိုပါ ဖမ်းဆီးခံရသည့် မြန်မာနိုင်ငံသားများသည် ပန်းရောင်ကတ်လုပ်ခအပါအဝင် မြန်မာနိုင်ငံမှ ထိုင်းနိုင်ငံသို့အရောက် ပွဲစားခအဖြစ် တစ်ဦးလျှင် ကျပ်သိန်းရှစ်ဆယ်အထိ ပေးသွင်းကာ ရောက်ရှိနေသူများဖြစ်ကြောင်း သိရသည်။
“ဒီမနက်ပဲ လူးသစ်ဘတ်(ပန်းရောင်ကတ်)မရိုက်ဖြစ်ကြောင်းထုတ်ပြန်တယ်။ ဒီညနေ လူသစ်ဘတ်ရိုက်ဖို့ စောင့်နေတဲ့လူသစ်တွေကို ဝင်ဖမ်းတယ်” ဟု ၎င်းကယမန်နေ့ညနေပိုင်းတွင်ပြောသည်။
ထိုင်းအစိုးရသည် ၎င်းတို့နိုင်ငံအတွင်းဖမ်းမိသည့် တရားမဝင် ဝင်ရောက်လာသူများကို သက်ဆိုင်ရာ နိုင်ငံဆီ ပြန်လည်ပို့ဆောင်ခြင်းများပြုလုပ်လေ့ရှိပြီး ထိုင်းနိုင်ငံအတွင်း နည်းအမျိုးမျိုးဖြင့် ဝင်ရောက် အလုပ်လုပ်ကိုင်ရန်ကြိုးပမ်းသည့် မြန်မာနိုင်ငံသားရာချီ လစဉ်ဖမ်းဆီးခံနေရသည်။
သတင်း - စံတော်ချိန်ဒစ်ဂျစ်တယ်
ဓာတ်ပုံ- ထိုင်းအလုပ်သမား၀န်ကြီးဌာန
#ပြည်တွင်းသတင်း