#ယနေ့ထုတ်သတင်းစာ_နိုင်ငံတကာသတင်း
⬛ဩဇာအကြီးဆုံးနိုင်ငံကူးလက်မှတ်အဖြစ် စင်ကာပူနိုင်ငံကူးလက်မှတ်ရပ်တည်နေဆဲဖြစ်
အမေရိကန်ပြည်ထောင်စု၏နိုင်ငံကူးလက်မှတ်သည် နှစ်ပေါင်း ၂၀အတွင်း ပထမဆုံးအကြိမ်အဖြစ် ကမ္ဘာ့ဩဇာအကြီးဆုံး နိုင်ငံကူးလက်မှတ်၁၀ခုစာရင်းမှ ဖယ်ထုတ်ခံခဲ့ရကြောင်း အောက်တိုဘာ ၁၅ ရက်သတင်းများတွင် ရေးသားတင်ပြထားသည်။
ဗြိတိန်အခြေစိုက် ဟင်နလေနိုင်ငံတကာ အတိုင်ပင်ခံအုပ်စုကထုတ်ပြန်ခဲ့သော ဟင်နလေနိုင်ငံကူး လက်မှတ် အညွှန်းကိန်း(၂၀၂၅)တွင်အမေရိကန်နိုင်ငံကူးလက်မှတ်မှာမလေးရှား နိုင်ငံကူးလက်မှတ်နှင့် အတူ အဆင့် (၁၂) နေရာတွင် ရပ်တည်နေကြောင်း သိရသည်။
အမေရိကန် နိုင်ငံကူးလက်မှတ် ကိုင်ဆောင်ထားသူများအနေဖြင့်ကမ္ဘာ့နိုင်ငံနှင့်ဒေသပေါင်း ၂၂၇ခုအနက် ၁၈၀ သို့ ဗီဇာမဲ့ဝင်ရောက်ခွင့်ရှိသည်။
ဟင်နလေနိုင်ငံကူးလက်မှတ်အညွှန်းကိန်း(၂၀၂၅)တွင် ကမ္ဘာ့ဩဇာအကြီးဆုံး နိုင်ငံကူးလက်မှတ်အဖြစ် ရပ်တည်နေသော နိုင်ငံကူးလက်မှတ်မှာ စင်ကာပူနိုင်ငံကူးလက်မှတ်ဖြစ်ပြီး ယင်းနိုင်ငံကူးလက်မှတ်ဖြင့် ကမ္ဘာ့နိုင်ငံနှင့်ဒေသပေါင်း ၁၉၃ခုဆီသို့ ဗီဇာမဲ့ဝင်ရောက်ခွင့်ရှိသည်။
ဒုတိယဩဇာအကြီးဆုံး နိုင်ငံကူးလက်မှတ်မှာ နိုင်ငံနှင့်ဒေသ ၁၉၀သို့ ဗီဇာမဲ့ဝင်ရောက်နိုင်သော တောင်ကိုရီးယား နိုင်ငံကူးလက်မှတ်ဖြစ်ပြီးဂျပန်နိုင်ငံကူးလက်မှတ်မှာ ဗီဇာမဲ့ဝင်ရောက်နိုင်သော နိုင်ငံနှင့်ဒေသ၁၈၉ခုဖြင့် တတိယဩဇာအကြီးဆုံးနိုင်ငံကူးလက်မှတ်အဖြစ် ရပ်တည်လျက်ရှိသည်။
အမေရိကန် နိုင်ငံကူးလက်မှတ်သည် ၂၀၁၄ ခုနှစ်တွင် ကမ္ဘာ့ဩဇာအကြီးဆုံး နိုင်ငံကူးလက်မှတ်အဖြစ် ရပ်တည်နိုင်ခဲ့သော်လည်း နောက်ပိုင်းတွင် ဩဇာအရှိန်အဝါ တဖြည်းဖြည်းကျဆင်းခဲ့သည်။
ကိုးကား-ရိုက်တာ
