#ယနေ့ထုတ်သတင်းစာ_ပြည်တွင်းသတင်း
⬛ဆီးဂိမ်း ကစ်ဘောင်ဆင်ပြိုင်ပွဲတွင်မြန်မာမှ ရှစ်တန်းစလုံး ယှဉ်ပြိုင်မည်
ထိုင်းနိုင်ငံက အိမ်ရှင်အဖြစ် လက်ခံကျင်းပမည့်(၃၃)ကြိမ်မြောက် အရှေ့တောင်အာရှအားကစား (ဆီးဂိမ်း)ပြိုင်ပွဲတွင် မြန်မာမှ ကစ်ဘောက်ဆင်ပြိုင်ပွဲအားလုံးတွင်ဝင်ရောက်ယှဉ်ပြိုင်မည်ဖြစ်ကြောင်း မြန်မာနိုင်ငံ ကစ်ဘောက်ဆင်အဖွဲ့ချုပ်မှ သိရသည်။
ဆီးဂိမ်းပြိုင်ပွဲ၌ ကစ်ဘောက်ဆင်ပြိုင်ပွဲသည် အတန်းရှစ်တန်းပါဝင်ပြီး ရှစ်တန်းစလုံး တန်းပြည့် ဝင်ပြိုင် မည်ဖြစ်ကာ ပြိုင်ပွဲအတွက်အကောင်းဆုံးရှစ်ယောက်ကို သက်ဆိုင်ရာနည်းပြများ၏ အကြံပေးမှုနှင့်အတူ ရွေးချယ်စေလွှတ်သွားမည်ဖြစ်ကြောင်း သိရသည်။
ကစ်ဘောက်ဆင်အားကစားသည် နှစ်မျိုးရှိပြီး ကြိုးဝိုင်းတွင်းထိုးသတ်သည့်ပြိုင်ပွဲနှင့် မြက်ဖျာပေါ်တွင် ထိုးသတ်သည့် ပြိုင်ပွဲတို့ဖြစ်ပြီး ယင်းပြိုင်ပွဲနှစ်ရပ်စလုံးတွင် မြန်မာနိုင်ငံ ကစ်ဘောက်ဆင်အဖွဲ့ချုပ်မှ အမျိုးသားအားကစားသမားငါးဦးနှင့် အမျိုးသမီးအားကစားသမားသုံးဦး စုစုပေါင်းရှစ်ဦး ဝင်ရောက် ယှဉ်ပြိုင်ရန် ရန်ကုန်မြို့သိမ်ဖြူလမ်းရှိ မြန်မာနိုင်ငံ ကစ်ဘောက်ဆင်အဖွဲ့ချုပ် လေ့ကျင့်ရေးခန်းမ၌ တစ်နေ့နှစ်ကြိမ် စခန်းသွင်းလေ့ကျင့်လျက်ရှိကြောင်း သိရသည်။
အဆိုပါဆီးဂိမ်းပြိုင်ပွဲဝင်မည့်ကစ်ဘောက်ဆင်အားကစားသမားများကိုမြန်မာနည်းပြများအပြင်အိုလံပစ်ကော်မတီမှ ပြင်သစ်နည်းပြက နှစ်ကြိမ်၊ မလေးရှားနည်းပြကတစ်ကြိမ် လာရောက်သင်ကြားပေးခဲ့ပြီး ပြိုင်ပွဲအောင်မြင်မှုရရှိရေးအတွက် ဂျပန်နည်းပြတစ်ဦးက အနီးကပ် ကြပ်မတ်သင်ကြားပေးလျက်ရှိကာ နိုဝင်ဘာ ၂ ရက်မှ ၁၂ ရက်အထိ ထိုင်းနိုင်ငံ ပတ္တရားသို့ ပူးတွဲ လေ့ကျင့်ရေး (Joint Training) သွားရောက်ရန် စီစဉ်လျက်ရှိကြောင်းလည်း သိရသည်။
