ဘော်စတွန် ကလေးဆေးရုံ (Boston Children’s Hospital) က သိပ္ပံပညာရှင်တွေဟာ ကြွက်တစ်ကောင်ရဲ့ ကျောပေါ်မှာ လူ့နားရွက်ပုံစံအတိုင်း ပေါက်နေတဲ့ အရာတစ်ခုကို ဖန်တီးပြခဲ့ရာကနေ ကမ္ဘာတစ်ဝန်းရဲ့ အာရုံစိုက်မှုကို ရရှိခဲ့ပါတယ်
ဒီထူးဆန်းတဲ့ ပုံရိပ်ဟာ ခေတ်သစ်သိပ္ပံရဲ့ ပြယုဂ်တစ်ခုလိုတောင် ဖြစ်သွားခဲ့ပါတယ်
ဒေါက်တာ ချားလ်စ် ဗာကန်တီ (Dr. Charles Vacanti) ဦးဆောင်တဲ့ ဒီစီမံကိန်းဟာ သတ္တဝါနှစ်မျိုး ပေါင်းစပ်ထားတဲ့ သတ္တဝါတွေ ဖန်တီးဖို့ မဟုတ်ဘဲ၊ အသက်ရှိတဲ့ တစ်သျှူးတွေကို ခွဲစိတ်ပြုပြင်ရေးဆေးပညာအတွက် ရှုပ်ထွေးတဲ့ ပုံသဏ္ဌာန်တွေအဖြစ် ကြီးထွားလာအောင် လုပ်နိုင်-မလုပ်နိုင်ကို စမ်းသပ်ဖို့ဖြစ်ပါတယ်
သုတေသီတွေဟာ နွားအရိုးနုဆဲလ် (bovine cartilage cells) တွေ ထည့်သွင်းထားတဲ့၊ နားရွက်ပုံစံ ပြုလုပ်ထားတဲ့ ပျော်ဝင်လွယ်တဲ့ ထောက်ကူစင် (biodegradable scaffold) ကို ကြွက်ရဲ့အရေပြားအောက်မှာ ထည့်သွင်းခဲ့ပါတယ်
အဲဒီ ထောက်ကူစင် ပျော်ဝင်သွားတဲ့အခါ၊ ဆဲလ်တွေဟာ ကြွက်ရဲ့သွေ:-ကြောတွေကနေ အာဟာရရယူပြီး ပွားများကာ အရိုးနုတွေအဖြစ် ပြောင်းလဲသွားပါတယ်
ရလဒ်အနေနဲ့ ပြည့်စုံတဲ့၊ ခေါက်နိုင်လွယ်တဲ့ နားရွက်ပုံစံတစ်ခုကို ရရှိခဲ့ပြီး၊ အစားထိုးမယ့် ကိုယ်အင်္ဂါအစိတ်အပိုင်းတွေကို အသက်ရှိဆဲလ်တွေကနေ ကြီးထွားလာအောင် လုပ်နိုင်ကြောင်းကို သက်သေပြခဲ့ပါတယ်
ဆေးပညာ တိုးတက်မှုရဲ့ အုတ်မြစ်
"ဗာကန်တီ ကြွက်" (Vacanti Mouse) လို့ အမည်ပေးခဲ့တဲ့ ဒီစမ်းသပ်မှုဟာ ပြန်လည်ပြုပြင်ခြင်းဆိုင်ရာ ဆေးပညာ (regenerative medicine) အတွက် အရေးပါတဲ့ အချိုးအကွေ့တစ်ခု ဖြစ်ခဲ့ပါတယ်
အရင်က ပြန်လည်ဖြစ်ပေါ်ဖို့ မဖြစ်နိုင်သလောက်လို့ ယူဆထားတဲ့ အရိုးနု (cartilage) ကို သဘာဝပတ်ဝန်းကျင်ပြင်ပမှာ အင်ဂျင်နီယာနည်းနဲ့ ဖန်တီးထိန်းသိမ်းထားနိုင်ကြောင်းကို သက်သေပြခဲ့ပါတယ်
ဒီစမ်းသပ်မှုရဲ့ အောင်မြင်မှုဟာ ယနေ့ခေတ်မှာ ဓာတ်ခွဲခန်းထုတ် တစ်သျှူးများ (lab-grown tissues) ဖြစ်တဲ့ အရေပြားအတု၊ ဆီးအိမ်အတုနဲ့ အစောပိုင်း 3D ပုံနှိပ်ထားတဲ့ ကိုယ်အင်္ဂါများ အပါအဝင် တိုးတက်မှုတွေအတွက် အရေးကြီးတဲ့ အုတ်မြစ်တစ်ခုကို ချပေးခဲ့ပါတယ်
တစ်ချိန်က အံ့အားသင့်စရာ ပုံရိပ်တစ်ခုအဖြစ်ကနေ စတင်ခဲ့တဲ့ ဒီစမ်းသပ်မှုဟာ ဆေးပညာဆန်းသစ်တီထွင်မှုရဲ့ အဓိကကျောက်တိုင်တစ်ခု ဖြစ်လာခဲ့ပြီး၊ တစ်ကိုယ်ရေလိုအပ်ချက်နဲ့အညီ ကြီးထွားအောင်လုပ်ထားတဲ့
ကိုယ်အင်္ဂါတွေနဲ့ ပျက်စီးသွားတဲ့ အစိတ်အပိုင်းတွေကို အစားထိုးနိုင်မယ့်၊ ခွဲစိတ်မှုနဲ့ ကုသမှုနယ်ပယ်ကို ပြောင်းလဲပေးမယ့် အနာဂတ်အတွက် မျှော်လင့်ချက်ကို ပေးစွမ်းခဲ့ပါတယ်
Source : “Transplantation of Chondrocytes Utilizing a Polymer-Cell Construct to Produce Tissue-Engineered Cartilage in the Shape of a Human Ear.” Plastic and Reconstructive Surgery, August 1997