နေ့စားခကို ထောက်ပံ့ကြေး ၁၀၀၀ တိုးပေးမှုမှာ ဝန်ထမ်း ၁၀ ယောက်အောက်နဲ့ မိသားစုတနိုင်တပိုင်လုပ်ငန်းတွေမပါဝင်
အောက်တိုဘာ ၁၅
နေ့စားအလုပ်သမားတွေကို ထောက်ပံ့ကြေးအဖြစ် ၁၀၀၀ ကျပ်ထပ်တိုးခံစားခွင့်ပြုရာမှာ ချွင်းချက်အနေနဲ့ အလုပ်သမား ၁၀ ယောက်အောက်ရှိလုပ်ငန်းငယ်တွေနဲ့ မိသားစုတပိုင် တနိုင်လုပ်ငန်းတွေခံစားခွင့်မရှိဘူးလို့ အနည်းဆုံးအခကြေးငွေသတ်မှတ်ရေးဆိုင်ရာအမျိုးသားကော်မတီက အောက်တိုဘာလ ၁၄ ရက်မှာ ထုတ်ပြန်အသိပေးလာပါတယ်။
အစိုးရဌာနနဲ့ အဖွဲ့အစည်းတွေရှိ နေ့စားဝန်ထမ်းနဲ့နေ့စားအလုပ်သမားတွေကို တတိယအကြိမ်အဖြစ် ထောက်ပံ့ကြေး တရက်အတွက် ၁၀၀၀ ကျပ်ကို ယခုအောက်တိုဘာလ ၁ ရက်ကစပြီး ခံစားခွင့်ပြုကြောင်း ဝန်ကြီးဌာနရဲ့ ကြေငြာချက်အပေါ် ကော်မတီက ထပ်မံအသိပေးထုတ်ပြန်လာတာဖြစ်ပါတယ်။
ခုလို ထပ်တိုးထောက်ပံ့ကြေး ၁၀၀၀ ကျပ်ကို မိသားစုတပိုင်တနိုင်ငံလုပ်ငန်းနဲ့ အလုပ်သမား ၁၀ ဦးအောက်လုပ်ငန်းတွေမှာ လုပ်ကိုင်နေကြတဲ့ အလုပ်သမားတွေခံစားခွင့်မရှိကြောင်း သတ်မှတ်တဲ့အပေါ် အလုပ်သမားတွေအကြား ဝေဖန်မှုတွေရှိနေပါတယ်။
" အခု နေ့စားအလုပ်ခေါ်ကြတယ်။ သန့်ရှင်းရေးပေါ့။အဲဒါ ၆၀၀၀ ပဲရတာရှိတယ်။အိမ်အကူအလုပ်ဆိုလည်း စရိတ်ငြိမ်းမှ တသိန်းရတာရှိတယ်။စျေးဆိုင်အကူဆိုလည်းတသိန်းလောက်ရတာရှိတယ်။ အခုခံစားခွင့်ပြုလိုက်တဲ့ ၁၀၀၀ ရတဲ့သူတွေဆိုရင်လည်း တရက်ကိုအလုပ်ချိန် ၈ နာရီထက်ပိုလုပ်ရသူတွေများတယ်။ မနက် ၇ ည၇ ဆင်းရတာလည်းရှိတယ်။ဒါတွေလည်းကြပ်မတ်ဖို့လိုတယ်။အခု ၁၀၀၀ ကိုခံစားခွင့်မပြုဘူးဆိုတဲ့ လုပ်ငန်းမှာ လုပ်နေသူတွေက အလုပ်သမားမဟုတ်လို့လားမေးစရာရှိပါတယ်။ပြောချင်တာက သူတို့သတ်မှတ်တဲ့နေ့စားခထက်ပိုရသူတွေဆိုရင်တမျိုးပေါ့။သတ်မှတ်နေ့စားခထက်နိမ့်ရနေသူတွေဘက်ကိုလည်း သေချာလုပ်ပေးဖို့လိုအပ်ပါတယ်။" အလုပ်သမားရေးကူညီဆောင်ရွက်သူတယောက်ကပြောပါတယ်။
နေ့စားခကို ထောက်ပံ့ကြေး ၁၀၀၀ ကျပ်ထပ်တိုးခံစားခွင့်ပြုလိုက်တာကြောင့် သတ်မှတ်အကျုံးဝင် နေ့စားအလုပ်သမားတွေဟာ တရက် လုပ်ခ ၈ နာရီအတွက် ၇၈၀၀ ကျပ်ကို ယခုအောက်တိုဘာကစပြီးခံစားခွင့်ရှိမှာဖြစ်တယ်လို့သိရပါတယ်။
ထောက်ပံ့ကြေး ဆိုတဲ့သဘောဟာ လုပ်ခလစာသတ်မှတ်ခြင်းမဟုတ်တဲ့အတွက် ထောက်ပံ့မှုကို အချိန်မရွေး ရပ်တန့်နိုင်ကြောင်း ၊ ထောက်ပံ့ကြေး ကိုရပ်လိုက်ပါက တရက်လုပ်ခက ၄၈၀၀ ကျပ်သာ ရရှိမှာဖြစ်တယ်လို့ သိရပါတယ်။
" ထောက်ပံ့ကြေး ၁၀၀၀ ကိုတောင် အလုပ်သမားတိုင်းကို ဘာလို့မပေးနိုင်ရတာလဲမသိဘူး။၁၀၀၀ က အသုပ်တပွဲတောင်မရတော့ပါဘူး။အခု ၇၈၀၀ ရတဲ့အထဲပါသူတွေလည်းလကုန်မှ တကယ်ရမရ သိရမယ်။ထောက်ပံ့ကြေးက သူတို့ပေးချင်ရင်ပေးမယ်။မပေးချင်တဲ့အခါရပ်ထားမယ်ဆိုတာလည်းပြောထားတော့ ပေးတဲ့အချိန်လေး အလုပ်သမားတိုင်းလိုချင်ကြတယ်။" လို့ နေ့စားအလုပ်သမားတယောက်ကပြောပါတယ်။
အစိုးရမှပေးတဲ့ ထောက်ပံ့ကြေးကို ဆံပင်အလှပြုပြင်ရေး ၊ လက်ဘက်ရည်ဆိုင်၊ ကားပြုပြင်ရေးဝပ်ရှော့ ၊ ဖုန်းအရောင်းဆိုင် ၊ အိမ်ဆောက်ပစ္စည်းအရောင်းဆိုင် စတဲ့ ဆိုင် အရောင်းဝန်ထမ်းအများစု ခံစားခွင့်မရရှိသလို အကြော်ဖိုလုပ်ငန်း စတဲ့ လုပ်ငန်းအများစုမရရှိကြဘူးလို့ မြေပြင်အခြေအနေအရသိရပါတယ်။
၂၀၂၃ ခုနှစ်၊ အောက်တိုဘာလမှာ နေ့စားဝန်ထမ်းနဲ့အလုပ်သမားတွေကို ထောက်ပံ့ကြေး ၁၀၀၀ ကျပ်စတင်ပေးခဲ့ပြီး ဒုတိယအကြိမ်အဖြစ် ၂၀၂၄ ခုနှစ်မှာ ၁၀၀၀ ကျပ်ထိပ်တိုးခဲ့ပါတယ်။ ယခုအောက်တိုဘာလမှာတော့ တတိယအကြိမ်အဖြစ် ထောက်ပံ့ကြေး ၁၀၀၀ ကျပ်ထပ်တိုးသတ်မှတ်ပေးခဲ့တာဖြစ်ပါတယ်။
ဓာတ်ပုံ - CJ
Credit - Voice of Myanmar
#သတင်းဟင်းလေးအိုးကြီး
