မန္တလေး - မိုးကုတ်ကားလမ်းပေါ် က ဖော့တောလမ်းဆုံကို နလအပြန်ထိန်းချုပ်လိုက်ပြီး တိုက်ပွဲတွေဆက်ရှိနေ

အောက်တိုဘာ ၁၅ ၊ ၂၀၂၅
GG (VOM)

မန္တလေး - မိုးကုတ်ကားလမ်းပိုင်းအတွက် အရေးပါတဲ့ သပိတ်ကျင်းမြို့နယ်ထဲက ဖော့တောလမ်းဆုံကို နလအတပ်က ပြန်လည်ထိန်းချုပ်လိုက်ပြီး ထိတွေ့ တိုက်ပွဲတွေကတော့ ဖြစ်ပွားနေဆဲဖြစ်တယ်လို့ စစ်ရေးသတင်းရင်းမြစ်ဆီကသိရပါတယ်။

ဖော့တောလမ်းဆုံအနီးက ဝါးဖြူတောင်ရွာကို တပ်က အရင်ထိန်းချုပ်လိုက်ပြီး အဲဒီကမှတဆင့် ဖော့တောလမ်းဆုံကို မြေပြင် စစ်ကြောင်း ၊လေကြောင်း ၊ လက်နက်ကြီးလက်နက်ငယ် သုံးပြီး အပြင်းအထန်ထိုးစစ်ဆင်တိုက်ခိုက်လာတဲ့အတွက် ဒေသတွင်း လက်နက်ကိုင်အဖွဲ့က ဖော့တောလမ်းဆုံကို မနေ့ကအောက်တိုဘာ ၁၄ ရက်မှာ လက်လွှတ်လိုက်ရတာဖြစ်တယ်လို့သိရပါတယ်။

" ဖော့တောလမ်းဆုံကိုစစ်တပ်ကပြန်ရသွားတာသေချာသလောက်ရှိပါတယ်။ လမ်းဆုံမှာလည်း အပျက်အစီးတွေများတယ်။ပစ်ခတ်မှုတွေကတော့ရှိနေသေးတယ်လို့သိရတယ်။ဖော့တောလမ်းဆုံ ပြန်ဖွင့်ဖို့မလွယ်လောက်တော့ဘူးထင်တယ်။လမ်းဆုံကနေ အညာဘက်လည်းသွားလို့ရတယ်။စဥ့်ကူးကနေလည်းမိုးကုတ်ကိုသွားလို့ရတယ်။ခုတော့လမ်းကြောင်းပြတ်သွားပြီ။ " လို့ စစ်ရေးသတင်းရင်းမြစ်ကပြောပါတယ်။

လက်ရှိမှာ စစ်တပ်က သပိတ်ကျင်းမြို့ကနေ ဖော့တောလမ်းဆုံအထိကို ပြန်လည်ထိန်းချုပ်ထားနိုင်လာတာဖြစ်ကြောင်း ဖော့တောလမ်းဆုံကိုထိန်းချုပ်နိုင်ဖို့အတွက် လချီကြာ တိုက်ခိုက်ပြီးနောက် ပြန်လည်ရရှိသွားတာဖြစ်တယ်လို့သိရပါတယ်။

ဖော့တောလမ်းဆုံဟာ မန္တလေး - စဉ့်ကူး - မိုးကုတ် ကားလမ်း နဲ့ မန္တလေး - စဉ့်ကူး -သပိတ်ကျင်း- ထီးချိုင့် - ဗန်းမော်လမ်း ကိုသွားလာနိုင်တဲ့ အဓိကအရေးပါတဲ့ လမ်းဆုံနေရာ ဖြစ်တာကြောင့် ဒေသတွင်းလက်နက်ကိုင်တပ်တွေကို လမ်းကြောင်းဖြတ်တောက်ဖို့အတွက် စစ်တပ်က ဖော့တောလမ်းဆုံကို ပြန်လည်ထိန်းချုပ်နိုင်ဖို့ အပြင်းအထန်တိုက်ခိုက်ရယူခဲ့တာဖြစ်တယ်လို့သိရပါတယ်။

ဖော့တောလမ်းဆုံဟာ သပိတ်ကျင်းမြို့နဲ့ ၁၀ မိုင်သာကွာဝေးပြီး မိုးကုတ်နဲ့ဆိုရင်လည်း အချိန် ၂ နာရီလောက်သာမောင်းရတဲ့ ခရီးဖြစ်တယ်လို့သိရပါတယ်။

နှစ်ဘက်တိုက်ပွဲကြောင့် လက်ရှိမှာ ဖော့တောလမ်းဆုံ အနီးရှိ ညောင်ပင်သာ ၊ ဇရပ်ကွင်း ၊ဝါးဖြူတောင်ရွာအပါ အဝင်ကျေးရွာ ၁၀ ရွာထက်မနည်းက ဒေသခံတွေ စစ်ရှောင်နေကြရတယ်လို့သိရတယ်။

" ဖော့တောလမ်းဆုံကို စစ်တပ်ကပြန်ရသွားပြီဆိုတော့ pdf တွေ လမ်းပြတ် သွားပြီ။သပိတ်ကျင်းကလည်းတပ်ကသိမ်းထားတယ်။အညာဘက်ကနေလည်းဝင်လို့မရတော့ဘူးဆိုတော့ အဲဒီဘက်တွေ ကုန်စည်စီးဆင်းမှုခက်ခဲသွားနိုင်တယ်။တဖက်မှာ ကျွန်တော်တို့မိုးကုတ်ကလည်း တခြားလမ်းကသွားရတော့မယ်။ဖော့တောဘက်က မိတ်ဆွေတွေလည်းစစ်ရှောင်နေကြရတယ်။အိမ်ကိုဒီတိုင်းထားခဲ့ရတာ။ " လို့ မိုးကုတ်ဒေသခံကပြောပါတယ်။

လက်ရှိမှာ ဖော့တောလမ်းဆုံပိတ်ထားတဲ့အတွက် မန္တလေး - မိုးကုတ်ကားလမ်းလည်းသွားလာလို့မရတာကြောင့် အချို့ကတော့ မိုးမိတ်ဘက်ကနေ ပတ်ပြီး မိုးကုတ် - မန္တလေး ကားထွက်နေကြတယ်လို့သိရပါတယ်။

ပြီးခဲတဲ့ ဇူလိုင်လမှာ စစ်တပ်က သပိတ်ကျင်းမြို့ကို ပြန်လည်ထိန်းချုပ်နိုင်ခဲ့တာဖြစ်တယ်လို့သိရပါတယ်။လက်ရှိမှာ ဝါးဖြူတောင်ရွာ၊ ဖော့တောလမ်းဆုံ အထိ ထပ်မံထိန်းချုပ်လိုက်ကြောင်းကို နလအဘက်က ထုတ်ပြန်ထားပါတယ်။

သပိတ်ကျင်းမြို့နယ် နဲ့ မိုးကုတ် - မန္တလေးလမ်းပိုင်းကိုတော့ ဒေသတွင်းလက်နက်ကိုင်တပ်တွေဟာ ၂၀၂၄ ခုနှစ် မှာ ထိန်းချုပ်နိုင်ခဲ့တာဖြစ်ပါတယ်။

Credit. - Voice of Myanmar

#centralnewsnaypyitaw