ရီးရဲလ်မက်ဒရစ်အနေဖြင့် စီးရီးအေရဲ့ အကောင်းဆုံးလူငယ်အလယ်တန်းကစားသမားကို မည်သည့်အချိန်တွင်မဆို ခေါ်ယူနိုင်ခွင့်ရှိကြောင်း ကိုမို ဥက္ကဌဖွင့်ဟလာ
အောက်တိုဘာ ၁၄
ကိုမိုဥက္ကဌက ရီးရဲလ်မက်ဒရစ်အနေဖြင့် ၎င်းတို့ရဲ့ စီးရီးအေရဲ့ အကောင်းဆုံးလူငယ်အလယ်တန်းကစားသမားနီကိုပက်ဇ်ကို မည်သည့်အချိန်တွင်မဆို ပြန်လည် ခေါ်ယူနိုင်ခွင့် ရှိနေကြောင်း ဖွင့်ဟပြောကြားလာပါတယ်။
ရီးရဲလ်မက်ဒရစ်ဟာ ၂၀၂၄ ခုနှစ်တွင် အာဂျင်တီးနားပါရမီရှင်နီကိုပက်ဇ်ကို ကိုမိုသို့ ယူရို ၆ သန်းဖြင့် ရောင်းချခဲ့ပါတယ်။ ဒါပေမယ့် ရီးရဲလ်မက်ဒရစ်ဟာ နီကိုပက်ဇ်အား ၂၀၂၆ ခုနှစ် နွေရာသီတွင် ယူရို ၉ သန်းဖြင့်လည်းကောင်း၊ ၂၀၂၇ ခုနှစ် နွေရာသီတွင် ယူရို ၁၀ သန်းဖြင့်လည်းကောင်း ပြန်လည် ဝယ်ယူနိုင်မယ့်အချက်ကို အရောင်းစာချုပ်ထဲမှာ ထည့်သွင်းချုပ်ဆိုထားပါတယ်။
တဖက်တွင် နီကိုပက်ဇ်ဟာ ကိုမိုတွင် ဖာဘရီဂက်စ်လက်အောက်မှာ ထိပ်တန်းခြေစွမ်းဖြင့် ကစားနေပြီး ပြောင်းရွှေ့ကြေး ယူရိုသန်း ၇၀ သို့အထိ မြင့်မားနေပါတယ်။
သူဟာ ကိုမိုသို့ ပြောင်းပြီးနောက် ပထမဆုံးရာသီတွင် ပြိုင်ပွဲအရပ်ရပ် ၃၆ ပွဲကစားခဲ့ရာတွင် ၆ ဂိုးသွင်းပြီး ၉ ကြိမ်ဖန်တီးကာ စီးရီးအေရဲ့အကောင်းဆုံးလူငယ်ကစားသမားဆုကို ဆွတ်ခူးနိုင်ခဲ့ပါတယ်။
သူဟာ ပထမဆုံးစီးရီးအေရာသီတွင် ခြေစွမ်းပြနိုင်ပြီးနောက် စပါးစ်ရဲ့ ပေါင် ၆၁ သန်း (ယူရိုသန်း ၇၀) ဖြင့် ကမ်းလှမ်းခြင်းခံခဲ့ရပေမယ့်လည်း ကိုမိုတွင် ဆက်ကစားရန် ဆုံးဖြတ်ခဲ့ပါတယ်။
အလယ်တန်းတိုက်စစ်သမားဟာ ယခုရာသီတွင်လည်း ကိုမိုတွင် ဆက်လက်ခြေစွမ်းပြကစားကာ ၃ ဂိုးသွင်းပြီး ၃ ကြိမ် ဖန်တီးမှု ပြုလုပ်ထားနိုင်ပါတယ်။
ရီးရဲလ်မက်ဒရစ်ဟာ လာမယ့်နှစ် နွေရာသီတွင် အလယ်တန်းနှင့် ခံစစ်ကြောင်းကို ပြောင်းလဲ တည်ဆောက်ရန် စီစဉ်နေပြီး နီကိုပက်ဇ်ကို ပြန်လည် ခေါ်ယူရေး စီစဉ်ထားကြောင်းလည်း သိရပါတယ်။
နီကိုပက်ဇ်ဟာ နည်းစနစ်ပိုင်းကောင်းမွန်သူ ဖြစ်ပြီး အလယ်တန်းကစားသမားအဖြစ်လည်းကောင်း၊ တောင်ပံကစားသမားအဖြစ်လည်းကောင်း ကစားနိုင်တဲ့အပြင် လိုအပ်ပါက နောက်တန်းအစွန်လူအဖြစ်ပါက ကစားနိုင်သူ ဖြစ်ရာ အလွန်ဆိုအတွက် အားကိုးရသူတစ်ဦး ဖြစ်လာဖို့ ရှိနေပါတယ်။
ကိုမိုဥက္ကဌမာဝန်ဆူဝါဆိုက "ကျွန်တော်ကတော့ ဂရုမစိုက်ဘူး။ အစကတည်းက သဘောတူညီထားပြီးသားလေ။ ရီးရဲလ်မက်ဒရစ်မှာ ဆန္ဒရှိတဲ့အချိန်မှာ ပြန်ခေါ်ခွင့် ရှိနေတယ်။ နီကိုကပဲ ကျွန်တော်တို့နဲ့ ဆက်တွဲချင်လားဆိုတာ ဆုံးဖြတ်ရမယ်။ သူ ရှိနေလို့ ကျေနပ်တယ်။ ကိုမိုက သူ့အတွက် အိမ်တစ်ခု ဖြစ်အောင် တည်ဆောက်လိုတယ်။ သူလည်း ဒီရာသီမှာ ဆက်နေဖို့ ရွေးချယ်ခဲ့တယ်။ ကျွန်တော်တို့ တစ်နေ့ချင်းစီပဲ သွားတယ်။ လာမယ့်နှစ်မှာ သူ မက်ဒရစ်ကို ပြန်မလားဆိုတော့ မက်ဒရစ်မှာ လုပ်ပိုင်ခွင့် အပြည့် ရှိနေတယ်။ သူ့ ဒီမှာ ဆက်ရှိမလားဆိုတာ သူ့အပေါ်မှာပဲ မူတည်တယ်"လို့ ပြောကြားသွားပါတယ်။
နီကိုပက်ဇ်ဟာ ကိုမိုနှင့်သာမက အာဂျင်တီးနားတွင်လည်း အရေးပါတဲ့သူအဖြစ် ကစားနေရပြီး မက်ဆီရဲ့ ခြေရာကို နင်းမယ့်သူအဖြစ် သတ်မှတ်ခံထားရသူပါ။
#ဘောလုံးသတင်းစုံ
