စံပယ်ပန်း စိုက်ပျိုးနည်း....
-------------------------------
စံပယ်သည် ပူအိုက်စိုစွတ်သော ရာသီဥတုကို ကြိုက်နှစ်သက်သည်။ စံပယ်သည် ချုံပင်အမျိုးအစားဖြစ်သော်လည်း နှစ်ရှည်ခံပင်ဖြစ်သည်။ စံပယ်သည် သဲမြေမှ မြေစေးမြေနက် အထိ မြေအမျိုးအစားမရွေး ဖြစ် ထွန်းသော်လည်း မြေဆီသြဇာ ထက်သန်လျှင် ပိုမို ဖြစ်ထွန်းသည်။
စံပယ်ကို အစေ့မှ စိုက်ပျိုးလေ့မရှိ။ အကိုင်းမြေမြှုပ် မျိုးပွား၍ လည်း ကောင်း၊ ပင်ပွားတူစိုက်၍ လည်းကောင်း၊ ကိုင်းဖြတ်၍ လည်းကောင်း၊ စိုက်ပျိုးကြသည်။ ကိုင်းပျော့ကို မြေကြီးထဲ မြှုပ်ထားလျှင် တစ်လခန့် အကြာတွင် အဆစ်မှ အမြစ်များ ထွက်လာသည်။ ထိုအခါ အကိုင်းရင်းမှ ဖြတ်တောက်၍ စိုက်ပျိုးနိုင်သည်။ အကိုင်းမြေမြှုပ်၍ မစိုက်လိုပါက အပင်ခြေတွင် ပေါက်နေသော ပင်ပွားကို အမြစ်ပါပါအောင် တူးယူပြီး နေရာပြောင်း၍ စိုက်ပျိုးနိုင်ပါသည်။ အကိုင်းဖြတ်၍ စိုက်ပျိုးလိုပါက တစ် ပေ၊ တစ်ပေခွဲရှည်သော အဆစ်သုံးဆစ်မှ ငါးဆစ်ပါအကိုင်းများရအောင် ဖြတ်ယူပြီးနောက် ပျိုးသေတ္တာထဲတွင် အဆစ်နှစ်ဆစ်၊ သုံးဆစ်မြှုပ်၍ ပျိုးထောင်ပြီး ရေမှန်မှန်လောင်းပေးပါက အရိပ်ကြဲကြဲတွင်ထားသော် တစ်လ တစ်လခွဲကြာတွင် အချို့အကိုင်းမှ အမြစ်များထွက်လာသည်။ ထိုအကိုင်းများအနည်းငယ် အပင်သန်လာသောအခါ စိုက်ခင်းသို့ ရွှေ့စိုက်နိုင်သည်။
မိုးရာသီတွင် ရေမ၀ပ်တတ်က ဘောင်မဖော်ဘဲ.. လည်းကောင်း၊ ရေ၀ပ် တတ်က ဘောင်ဖော်၍ လည်းကောင်း၊ စိုက်ပျိုးနိုင်သည်။ အလျား၊ ပေသုံးဆယ် အနံပေငါးပေ၊ ထုတစ်ပေ ၉မြေပေါ် ခြောက်လက်မ၊ မြေအောက် ခြောက်လက်မ) ရှိသော ဘောင်များကို တစ်ဘောင်နှင့် တစ်ဘောင် လူသွားလမ်းတစ်ပေခြားကာ ပြုလုပ်ရသည်။ တစ်ဘောင် လျှင် စိုက်တန်းနှစ်တန်းထားရှိကာ စိုက်တန်းအတွင်း တစ်ပင်နှင့် တစ်ပင် သုံးပေခန့်ခွာ၍ စိုက်သင့်သည်။ စိုက်တန်းတစ်ခုစီမှ အပင်များသည် တစ်ခုနှင့် တစ်ခု မျက်စောင်းထိုး ရှိသင့်သည်။ စိုက်တန်းများသည် နီးစပ်ရာ ဘောင်နှုတ်ခမ်းမှ တစ်ပေခွဲ ကွာဝေးပြီး၊ စိုက်တန်းနှစ်ခုကြား အကွာဝေးသည် နှစ်ပေရှိသင့်သည်။ ဤနည်းအတိုင်း စိုက်လျှင် တစ်ဘောင်လျှင် အပင်နှစ်ဆယ်၀င်မည်။
စိုက်ပြီးနောက်အပင်အရင်းကို နာနာဖိပေးကာ ရေလောင်းပေးရသည်။ စံပယ်ပန်းများသည် အကိုင်းနုများမှ ပွင့်လာတတ်ကြသည်။ စံပယ်များကို ဆောင်းဦး၊ (ပန်းတုံးချိန်တွင်) ဘေးသို့နွယ်ကျနေသော အကိုင်းများကို ကိုင်းဖျားဖြတ်ပေးရသည်။ထိုအခါအညွန့်သစ်အကိုင်းသစ်များထွက်ပေါ်လာသည်။ ကိုင်းရှုပ်များ၊ ခြောက်နေသော ကိုင်းများ၊ ရောဂါရ ကိုင်းများ၊ မသန်စွမ်းဘဲ ကြုံလှီသော ကိုင်းများကို ဖြတ်တောက် ရှင်းလင်းပစ် ရသည်။
စံပယ်ပန်းများကို နံနက်စောစောတွင် အငုံကြီးမှ အပွင့် အထိ ခူးရသည်။
အစောဆုံး ခူးပြီး ရေအတော်အသင့် ဆွတ်ကာရေစိုအ၀တ်ဖြင့် ဖုံးအုပ်၍ ရောင်းချနိုင်သည်။ သီကုံး၍ လည်းကောင်း၊ စည်၍လည်းကောင်း ရောင်းချနိုင်သည်။
Credit: စိုက်ပျိုးရေးဦးစီးဌာန.....
#credit
