မက္ကဆီကို ရေဘေး ၆၄ ယောက်သေပြီး ၆၀ ကျော်ပျောက်ဆုံး
မက္ကဆီကိုစီးတီး၊ အောက်တိုဘာ-၁၄-၂၀၂၅
ရတီ(VOM)
မက္ကဆီကို အလယ်ပိုင်းနဲ့ အရှေ့ပိုင်းမှာ ရေကြီးရေလျှံမှုတွေကြောင့် လူပေါင်း ၆၄ ယောက်သေဆုံးခဲ့ပြီး နောက်ထပ် ၆၅ ယောက် ပျောက်ဆုံးနေတယ်လို့ ကယ်ဆယ်ရေးသမားတွေက ပြောပါတယ်။
ပြီးခဲ့တဲ့ ရက်သတ္တပတ်အတွင်း မိုးသည်းထန်စွာရွာသွန်းမှုကြောင့် မက္ကဆီကိုပြည်နယ်အများအပြားမှာ ရေကြီးရေလျှံမှုတွေနဲ့ မြေပြိုမှုများ ဖြစ်ပေါ်ကာ လမ်းတွေ၊ တံတားတွေနဲ့ နေအိမ်တွေ ပြိုကျပျက်စီးခဲ့သည်။
ရေကြီးပြီးနောက် တနင်္လာနေ့မှာ ဒါဇင်နဲ့ချီတဲ့ ကျေးရွားတွေဟာ ကုန်းလမ်းနဲ့ သွားလာ၍မရတော့ဘဲ ဒေသခံတွေအတွက် စားနပ်ရိက္ခာနဲ့ လိုအပ်တာတွေ ထောက်ပံ့ဖို့ ကယ်ဆယ်ရေးသမားတွေက အပျက်အစီးနဲ့ လမ်းတွေကို ရှင်းလင်းခဲ့ပါတယ်။
ကယ်ဆယ်ရေး ကြိုးပမ်းမှုတွေရဲ့ တစိတ်တပိုင်းအဖြစ် တပ်ဖွဲ့ဝင် တသောင်းကို စက်လှေတွေ၊ ရဟတ်ယာဉ်တွေနဲ့အတူ ဖြန့်ကျက်ချထားပြီး ပိတ်မိနေသူတွေအတွက် အရေးပေါ် အစားအစာနဲ့ သောက်သုံးရေတွေ ပို့ဆောင်ဖို့ မက္ကဆီကို သမ္မတက ညွှန်ကြားထားပါတယ်။
နေရပ်စွန့်ခွာသူတွေအတွက် ကယ်ဆယ်ရေးစခန်းတွေ ဖွင့်လှစ်ထားပြီး ဆက်သွယ်ရေးတောက် နေသူတွေအတွက် လိုအပ်တဲ့ ပစ္စည်းတွေကို ရဟတ်ယာဉ်တွေနဲ့ ပို့ဆောင်ပေးနေပါတယ်။ “အစားအစာနဲ့ ရေအလုံအလောက် ပို့ဆောင်ဖို့ လေယာဉ်တွေနဲ့ပို့ဖို့ အများကြီး လိုအပ်တယ်” လို့ သမ္မတက ပြောပါတယ်။
မက္ကဆီကို အရပ်ဘက်ကာကွယ်ရေး အာဏာပိုင် အကြီးအကဲရဲ့ အဆိုအရ ဗီရာခရုဇ်၊ ဟီဒယ်လ်ဂိုနဲ့ ပူဘလာပြည်နယ်တွေမှာ မိုးသည်းထန်စွာ ရွာသွန်းမှုကြောင့် ရေကြီးတဲ့ဒဏ်ကို အဆိုးဆုံး ခံခဲ့ရတယ်လို့ ဆိုပါတယ်။
ဟီဒယ်လ်ဂိုပြည်နယ် တခုတည်းပင် လူ ၄၃ ယောက်ပျောက်ဆုံးနေတယ်လို့ ဆိုပါတယ်။ ပြီးခဲ့တဲ့ ၁၂ နာရီအတွင်း လူ ၄၇ ယောက်ထိ သေဆုံးခဲ့ပါတယ်။ မြို့တော် မက္ကဆီကိုစီးတီးမှာလည်း ယခုနှစ်အတွင်း စံချိန်တင်ရွာသွန်းခဲ့ပါတယ်။
