◾️သင်္ဘောများအပေါ်အမေရိကန် နှင့် တရုတ်အပြန်အလှန်ငွေကြေးကောက်ခံမည်
မနက်ဖြန်မှစ၍ အမေရိကန်ဆိပ်ကမ်းများသို့ ဝင်ရောက်ဆိုက်ကပ်သော တရုတ်သင်္ဘောများသည် အခကြေးငွေပေးဆောင်ရန်လိုအပ်တော့မည်ဖြစ်ရာ တရုတ်နှင့် အမေရိကန် ကြား ကုန်သွယ်ရေးစစ်ပွဲတွင် နောက်ထပ် စစ်မျက်နှာတစ်ခုဖြစ်လာခဲ့သည်။
အမေရိကန် ကုန်သွယ်ရေးကိုယ်စားလှယ်ဌာန(USTR) က ဧပြီလတွင် ကြေညာခဲ့သော အစီအစဉ်ကို တရုတ်ကလည်း တစ်ထေရာတည်းလက်တုံ့ပြန်ခဲ့ကာ မနက်ဖြန်မှာပင် အမေရိကန်သင်္ဘောများအပေါ် အလားတူ အခကြေးငွေများ ကောက်ခံသွားမည်ဟု သောကြာနေ့တွင် ပြောကြားသည်။
မြေရှားသတ္တုများနိုင်ငံခြားတင်ပို့်မှုကို တရုတ်က ထိန်းချုပ်ခဲ့ခြင်းကို လက်တုံ့ပြန်၍ တရုတ်အပေါ် အခွန် ၁၀၀ ရာခိုင် နှုန်းတိုးမြှင့်သွားမည်၊ ရှီကျင့်ဖျင်နှင့်ပြုလုပ်မည့် ထိပ်သီးဆွေးနွေးပွဲကို ဖျက်သိမ်းသွားမည်ဟု ပြီးခဲ့သည့် သီတင်း ပတ်တွင် ဒေါ်နယ်ထရန့်က ခြိမ်းခြောက်ခဲ့ပြီး တင်းမာမှုပိုဆိုးအောင် လုပ်ဆောင်ခဲ့သည်။
ကမ္ဘာ့သင်္ဘောလုပ်ငန်းကိုတရုတ်တို့ လွှမ်းမိုးထားခြင်းကို ကိုင်တွယ်ဖြေရှင်းရေး နှင့် အမေရိကန်နိုင်ငံတွင် သင်္ဘောများ ပိုမိုတည်ဆောက်လာစေရေးတို့မှာ အမေရိကန်ဆိပ် ကမ်း အခကြေးငွေကောက်ခံခြင်း၏ ရည်ရွယ်ချက်များအဖြစ် ဖော်ပြထားကြောင်း အေအက်ဖ်ပီသတင်းကဆိုသည်။
တရုတ်တို့၏ မျှတမှုမရှိသောစီးပွားရေးအလေ့အထများကြောင့် အ‌မေရိကန်သင်္ဘောတည်ဆောက်ရေးလုပ်ငန်း ပြန်လည်အားသစ်လောင်းမှုတွင် ကြီးမား သော အတား အဆီးတစ်ခုဖြစ်နေကြောင်း အမေရိကန်ဆောက်လုပ်ရေး မ ဟာမိတ်အဖွဲ့ အမေရိကန်သင်္ဘောလုပ်ငန်းဖွံ့ဖြိုးတိုး တက်ရေးအတွက် အဆိုပြုထားသော ဥပဒေကြမ်းကို ထောက်ခံရင်းပြောကြားသည်။
တရုတ်သင်္ဘောများအား အမေရိကန်သို့ လာရောက်သည့် အကြိမ်တိုင်းအတွက် ဆိပ်ကမ်းခကို ကောက်ခံသွားမည်ဖြစ်ကာ တစ်နှစ်လျှင် အများဆုံး ငါးကြိမ်ကောက်ခံသွားနိုင်ကြောင်း အမေရိကန် ကုန်သွယ်ရေးရုံးက ပြောကြားသည်။
တရုတ်နိုင်ငံတွင် တည်ဆောက်ထားသော သင်္ဘောများက တစ်တန်လျှင် ၁၈ ဒေါ်လာ သို့မဟုတ် ကွန်တိန်နာတစ်လုံးလျှင် အမေရိကန်ဒေါ်လာ ၁၂၀ ပေးဆောင်ရမည်ဖြစ်ကာ ရှေ့လာမည့် သုံးနှစ်တွင် တစ်နှစ်လျှင် ၅ ဒေါ်လာစီ တိုးမြှင့်သွားမည်ဖြစ်သည်။
ကမ္ဘာ့သင်္ဘောတည်ဆောက်ရေးလုပ်ငန်းတွင် အမေရိကန် ၏ပြည်တွင်းလုပ်ငန်းက သုည ဒသမ ၁ ရာခိုင် နှုန်းသာပါ ဝင်နေရာ ယင်းဝေစုတိုးတက်လာရေးကို အမေရိကန်က အလိုရှိနေခြင်းနှင့်အတူ ယင်းလုပ်ငန်းပြန်လည် ကြီးထွားလာရေးကို ရည်ရွယ်၍ သင်္ဘောတည်ဆောက်ရေးဆိုင်ရာ အိမ်ဖြူတော်ရုံးကို ဖွဲ့စည်းလိုက်ကြောင်း သမ္မတ ထရန့်က မတ်လတွင် ကြေညာခဲ့သည်။
အမေရိကန်တို့က ၎င်းတို့၏ သင်္ဘောများအပေါ် အခ ကြေး ငွေ ကောက်ခံမှုများကို တရုတ်အစိုးရက သောကြာနေ့တွင် တုံ့ပြန်ခဲ့ပြီး အမေရိကန်နိုင်ငံတွင်ထုတ်လုပ်သော သင်္ဘောများ သို့မဟုတ် အမေရိကန်ကုမ္ပဏီများနှင့် ဆက်စပ်သော သင်္ဘောများအပေါ် အထူးအခွန်များ ကောက်ခံသွားမည်ဟု ကြေညာခဲ့သည်။
အမေရိကန်သင်္ဘောများသည် တင်ဆောင်လာသော ကုန် ပစ္စည်းတစ်တန်လျှင် ယွမ်ငွေ ၄၀၀( အမေရိကန်‌‌ဒေါ်လာ ၅၆ ) ပေးဆောင်ရမည်ဖြစ်ကာ ၂၀၂၆ ဧပြီလတွင်ဒေါ်လာ ၉၀ အထိ တိုးမြှင့်ပေးဆောင်ရမည်ဟု တရုတ်အစိုးရ ကြေ ညာချက်က ဖော်ပြသည်။
“ ခင်ဗျား ထိန်းချုပ်မှုမရှိတဲ့ ကမ္ဘာ့ထောက်ပံ့ရေးကွင်းဆက်ကို မှီခိုနေရတယ်ဆိုရင် ပြဿနာရှိပါတယ်။ ဒါ‌ဟာ အမျိုး သားလုံခြုံ‌ရေး အန္တရာယ်တစ်ရပ်ဖြစ်ပါတယ်။” ဟုအမေရိကန်သင်္ဘောတည်ဆောက်ရေးကုမ္ပဏီပေါင်း ၁၅၀ ကျော်ကို ကိုယ်စားပြုသော အမေရိကန်သင်္ဘောတည်ဆောက်သူများကောင်စီ (SCA) ဥက္ကဌ မက်ပက်စ်တန် က ပြောကြားသည်။
“ကွန်မြူနစ်တွေ ထိန်းချုပ်ထားတဲ့ အစိုးရပိုင်လုပ်ငန်းတွေပေါ်ကို လုံးလုံးလျားလျား မှီခိုတာမျိုး မလုပ်ချင်ပါဘူး။” ဟု ၎င်းက တရုတ်အား ရည်ညွှန်း၍ပြောသည်။
သတင်း-ရဲမင်း
ကိုးကား-AFP
#နိုင်ငံတကာသတင်း