ဂါဇာရှိ အစ္စရေးဓါးစာခံအားလုံး လွတ်မြောက်ပြီ
တဲလ်အဗစ်၊ အောက်တိုဘာ ၁၃
ဂါဇာကမ်းမြောင်ဒေသမှာ ဟားမတ်စ်အဖွဲ့ ဖမ်းဆီးထားတဲ့ နောက်ဆုံးဓားစာခံ အယောက် ၂၀ ဟာ အစ္စရေးကို ပြန်ရောက်နေပြီလို့ အစ္စရေးစစ်တပ်က အတည်ပြု ပြောဆိုလိုက်ပါတယ်။
သူတို့တွေကို ၂၀၂၃ ခုနှစ် အောက်တိုဘာ ၇ ရက်က တိုက်ခိုက်မှုအတွင်း ဟားမတ်စ်တို့က ဖမ်းဆီးခဲ့တာဖြစ်ပြီး ဒီကနေ့မနက်မှာ ပြန်လွှတ်ပေးခဲ့တာဖြစ်ပါတယ်။ သေဆုံးသွားတဲ့ ဓားစာခံ ၂၈ ယောက်ရဲ့ အလောင်းတွေကိုတော့ ပြန်မပေးသေးပါဘူး။
ဓားစာခံလဲလှယ်ရေးအစီအစဉ်အရ အစ္စရေးဟာ ပါလက်စတိုင်း အကျဉ်းသား ၂၅၀ နဲ့ အခြားထိန်းသိမ်းထားသူ ၁၇၀၀ ကျော်ကို လွှတ်ပေးခဲ့ပြီး ပထမအသုတ်ဟာ အစ္စရေး အကျဉ်းထောင်တွေကနေ ထွက်ခွာသွားပြီ ဖြစ်ပါတယ်။
အမေရိကန်သမ္မတ ဒေါ်နယ်ထရန့်ကတော့ အစ္စရေးမှာ ရောက်ရှိနေပြီး စစ်ပွဲပြီးဆုံးပြီလို့ ကြေညာခဲ့ပါတယ်။ ဒီနောက်မှာ အစ္စရေးပါလီမန်မှာ မိန့်ခွန်းပြောကြားခဲ့ပြီး ဂါဇာငြိမ်းချမ်းရေးဆွေးနွေးပွဲအတွက် အီဂျစ်ကို သွားရောက်မှာ ဖြစ်ပါတယ်။
ဒီဆွေးနွေးပွဲတက်ဖို့ အီဂျစ်သမ္မတက အစ္စရေးဝန်ကြီးချုပ် နေတန်ယာဟုကို ဖိတ်ကြားခဲ့ပေမယ့် ဂျူးအားလပ်ရက်နဲ့ နီးကပ်နေတာကြောင့် တက်ရောက်မှာ မဟုတ်ဘူးလို့ အစ္စရေးသမ္မတရုံးကထုတ်ပြန်ထားပါတယ်။
ငြိမ်းချမ်းရေးအတွက် ကြိုးပမ်းအားထုတ်မှုတွေအတွက် အမေရိကန်သမ္မတ ဒေါ်နယ်ထရန့်ကို ကျေးဇူးတင်တယ်လို့ ထုတ်ပြန်ချက်မှာ ဖော်ပြထားပါတယ်။ ဂါဇာအပစ်ရေပ်ရေး အောင်မြင်ခဲ့ပေမယ့် ရေရှည်ငြိမ်းချမ်းရေး သဘောတူညီချက်မရသေးတာကြောင့် ကမ္ဘာ့ခေါင်းဆောင် ၂၀ ကျော်ဟာ အီဂျစ်မှာ ဆွေးနွေးကြမှာဖြစ်ပါတယ်။
Ref:BBC
Photo:Reuters
Credit - Voice of Myanmar
#သတင်းဟင်းလေးအိုးကြီး
