#ယနေ့ထုတ်သတင်းစာ_နိုင်ငံတကာသတင်း
◾️ဇင်ဘာဘွေ အတိုက်အခံလွှတ်တော်အမတ် ဆင်ကိုကားဖြင့်တိုက်မိပြီး သေဆုံး
ဇင်ဘာဘွေအတိုက်အခံ လွှတ်တော်အမတ် ဒီဇိုင်ယာမိုယိုသည် ခရီးသွားလာနေစဉ် ၎င်း၏ကားနှင့်ဆင် တစ်ကောင်ကို တိုက်မိပြီး သေဆုံးသွားကြောင်း ဒေသတွင်း သတင်းဌာနများက အောက်တိုဘာ ၁၀ ရက်တွင်ဖော်ပြထားသည်။
မစ္စတာမိုယိုနှင့် အခြားလွှတ်တော်အမတ် လေးဦးတို့သည် အဝေးပြေးလမ်းမကြီးတစ်လျှောက် ခရီးသွား နေစဉ် အောက်တိုဘာ ၁၀ ရက် နံနက်အစောပိုင်းတွင် မတော်တဆမှုဖြစ်ပွားခဲ့ကြောင်း နိုင်ငံပိုင်ရုပ်သံလိုင်းဇက်ဘီစီက ပြောသည်။
အတူပါလာသည့် လွှတ်တော်အမတ်များ ဒဏ်ရာများရရှိခဲ့ပြီးမစ္စတာမိုယိုမှာမူ နေရာတွင် ပွဲချင်းပြီး သေဆုံးသွားခဲ့ကြောင်း အဆိုပါသတင်းဌာနက ဖော်ပြထားသည်။
အသက်(၄၆)နှစ်မြောက်မွေးနေ့မတိုင်မီ တစ်ရက်အလိုတွင် ကွယ်လွန်သွားခြင်းနှင့်ပတ်သက်၍ လုပ်ဖော်ကိုင်ဖက်များက ဝမ်းနည်းကြောင်း ပြောကြားထားသည်။
၎င်းသည် အတိုက်အခံ စီစီစီပါတီ၏ အဖွဲ့ဝင်တစ်ဦးဖြစ်ပြီး ဇင်ဘာဘွေပါလီမန်၏ အားကစား၊ အပန်း ဖြေမှု၊ အနုပညာနှင့် ယဉ်ကျေးမှုကော်မတီတွင် တာဝန်ထမ်းဆောင်ခဲ့သည်။ ၎င်းသည် ဆင်ကို နောက်မှ ဝင်တိုက်ခဲ့ပြီးနောက် ဆင်က ယာဉ်ကိုလှည့်ပတ်တိုက်ခိုက်ခဲ့သည်ဟုဆို၏။
ထိုသို့ တိုက်ခိုက်မှုကြောင့် မော်တော်ယာဉ်၏ ညဘက်အပေါ်ခြမ်းတွင် ပျက်စီးမှုအကြီးအကျယ်ဖြစ်ခဲ့ပြီး မစ္စတာမိုယို သေဆုံးခဲ့ကြောင်းသိရသည်။ ဖြစ်စဉ်သည် ဇင်ဘာဘွေအနောက်မြောက်ဘက်ရှိ ဆင်များ ကျင်လည် ကျက်စားရာနေရာတွင်ဖြစ်ပွားခဲ့ခြင်းဖြစ်သည်။
ကိုးကား-ဘီဘီစီ
